係同屋室友?定係同居密友?: (S3)34. 否決權

控方俾麥大狀出呢一手，打到不知所措，而且肖家大女比肖翠君學歷更低，所以佢地就拎肖家有缺憾嘅成員作為爭產手段
 
林大狀覆問肖翠君「肖小姐，請問妳屋企係咪有家人係殘疾人士?」
 
「係，我其中一個家姐係有殘疾」
 
「如果妳地成功加名係苗先生物業後，會唔會考慮住入該單位?」
 
「會」
 




「原因?」 「係方便屋企人覆診」
 
「即係妳地為左屋企成員，而要求苗先生容許妳地搬入該物業單位?」
 
「係」
 
「法官閣下，控方覆問完畢」
 
首席法官點頭後問辯方「辯方有否覆問?」
 




「辯方會於主問時再問控方證人」
 
「控方傳召第二被告人苗學雯女士」
 
苗學雯進入作供欄，其時肖師奶一貫作風，手指指同其他人講「呢個就係佢家姐啦」
 
林大狀去苗學雯面前詢問
 
「苗女士，請問妳是否案中單位業權人之一?」  「係」
 




「請問妳係該單位購買時，有冇出過任何錢?」 「冇」
 
「咁理論上，妳冇權去反對苗先生俾我當事人加名上樓契」
 
林大狀咁講，係旁聽席嘅肖家非常高興
 
「呢一份係joint tenant，又如何?我可以唔加」
 
「但係妳一蚊都冇出過，係咩立場妳都冇權阻止妳細佬將我當事人嘅名加上樓契。法官閣下，我冇野再問」
 
肖家聽到林大狀咁講，佢地就更開心，因為唯一阻止佢地嘅人原來係冇權
 
「法官閣下，辯方冇任何問題」
 
「呵!今次我地仲唔贏哂!!」肖師奶非常高興，佢以不屑眼光望一望苗學翹。不過苗學翹等人就一面鬆容




 
「控方傳召第一被告，苗學翹博士」
 
「苗先生，剛才我已經講過，苗女士冇權阻止你加我當事人名上樓契。請問你會否遵守承諾，加我當事人名呢?」
 
「唔會喎」
 
苗學翹咁講，旁聽席都一遍嘩然
 
「但係你之前話會加我當事人名上樓契，你有冇講過?」
 
「我冇講過」
 
「苗先生，要知道法庭上俾假口供係犯法行為」
 




「我知呀」
 
「咁點解你要推翻之前所有事情?」
 
「因為我根本冇講過囉」
 
苗學翹同林大狀呢一刻就好似…..
 
「呢到唔俾食煙架喎」  「唔準搭我膊頭」
 
「你唔食我咪唔搭囉」  「你唔搭我咪唔食囉」
 
林大狀拎起文件「你係當日講過，會將物業交俾自己人管理，係唔係?」
 
「係呀，so?」苗學翹一個WFC嘅手勢攤出黎




 
「咁你而家話唔加我當事人名上樓契，即係俾假口供作證!」
 
「乜我有話過我口中所講嘅自己人就係佢地姓肖嘅一家人咩?」
 
林大狀呆一呆
 
「咁點解你之前應承左我當事人加佢名後，最後又要反口?」
 
「我突然間又唔想加呀，而且我都冇話佢地係自己人」
 
「當時你同肖小姐係情侶關係，係唔係?」
 
「係呀」
 




「咁點樣會唔係自己人?而且你地計劃會結婚」
 
「我由頭到尾都冇打算同肖小姐結婚或者求婚喎，麻煩控方大狀先認清事實」
 
學翹咁樣反將林大狀一軍，遠遠超出左林大狀所預料
 
係旁聽席嘅苗學雯同黎大狀都微微咁笑
 
「學翹佢好犀利呢?」學雯對小祺講，小祺連連點頭
 
「佢個腦轉得好快，同我老公一樣，佢地兩個辯材不分伯仲」
 
林大狀俾苗學翹打窒道氣，面灰灰咁坐返低
 
「法官閣下，辯方冇任何提問」
 
法庭書記企起「控方提問完畢，而辯方提問會於明天10時正於本庭繼續審理」
 
「林大狀，我地贏嘅機會大唔大呀?」肖氏一家去到法庭旁嘅會議室傾
 
林大狀飲一飲水「暫時都係一半一半，對方理據好勉強，個官應該唔信」
 
「咁就好囉」
 
「而且妳地仲有醫生證明，我地等對方問完後就拎出黎，贏面好大」
 
心急嘅肖太又一次準備再訂傢俬，佢認為今次實食冇痴牙