係同屋室友?定係同居密友?: (S3)46. 筆跡證據

「麻煩鄭先生為大家講解下，苗博士嘅書寫習慣」
 
鄭先生撳出一張Slide「呢張係苗博士做實驗時寫嘅LOG BOOK，用嘅係普通原子筆，基本上同佢而家工作一樣，只要係遇上唔重要、或者比較rough嘅文件、簽名等等情況下，佢係會用普通嘅原子筆」
 
「咁係咩情況下，苗博士會使用鋼筆?」
 
鄭先生撳出一張Slide「相信大家之前都睇過，呢本係苗博士俾指導教授睇嘅LOG BOOK，簿上筆跡同之前嘅Slide係同一人所寫，唔同嘅係，苗博士今次用嘅係一枝鋼筆，而且筆尖係極幼，EF尖，係一枝日本鋼筆」
 
「而工作上，只要唔係苗博士自己草稿的話，差唔多全部內容都係會用同一枝鋼筆所書寫」
 




「咁我地可唔可以推斷出，苗博士簽文件係會用同一枝鋼筆?」
 
「呢個可能性係極大」  「原因呢?」
 
「因為係用筆習慣上，苗博士明顯係官方或者重要文件上會使用鋼筆」
 
「咁苗博士嘅簽名呢?三個簽名俾人冒簽嘅機會大唔大?」
 
鄭先生撳出苗學翹三個簽名
 




「第一個，就咁一個alpha嘅簡簽，應該個個都簽到。所以用嘅地方定會係比較簡單場合，就好似醫生簽收據或者醫生紙咁嘅時候使用，所以苗博士係log
book時使用係好正常，亦係所有理科生嘅習慣」
 
「而第二個簽名，係苗博士簽普通文件使用，寫嘅係佢英文名，但係即使係普通文件，從筆跡黎睇，苗博士每一次都係用同一枝鋼筆去簽名。而第三個簽名，都係利用鋼筆，雖然字嘅顏色唔一樣，但係都睇得出係同一款色同埋同款筆尖，只係用嘅墨水唔同」
 
「咁即係可以話，只要係簽法定文件，或者係比較正式嘅文書，苗博士都係會用鋼筆?」
 
「冇錯」
 
「法官閣下，我再冇問題」




 
 法官睇完文件後對專家證人詢問
 
「證人，本席要求閣下為控方證據，被告人嘅承諾書上嘅簽名以及筆跡作出鑑別，請問是否已經有結果?」
 
「法官閣下，經過事前法庭送到化驗所，以及上午我係會議室聯同同事一齊分析過後，經果已經有」
 
「請問你可以先解釋一下你嘅分析嗎?」
 
「法官閣下，可以」
 
法庭書記幫鄭先生準備好所有用具後，專家證人開始作供
 
「首先講習慣，剛先我已經講過，苗博士會係比較重要文書同文件上，用上佢自己英文名作簽名，我而家展示出苗博士平日嘅英文簽名」
 




「Cleverly，C-L-E-V-E-R-L-Y，每一個英文字，都可以清楚睇到」
 
「挑!承諾書上邊夠係睇到哂啦，呵?」肖師奶同自己兩個女講
 
「首先講下用筆方面，苗博士所有文件都係用鋼筆簽名，我想問下苗博士，而家果枝筆有冇放係身上?」
 
苗學翹對法官講「有，法官大人」
 
「可以拎出黎俾大家望一望?」
 
苗學翹係袋中拎出一個筆套，係入邊拎左一枝筆
 
專家證人雙手接過後打過筆蓋睇睇「唔該哂苗博士，法官大人，正如我嘅分析一樣，苗博士所用嘅鋼筆，係EF極幼尖」
 
「大家再睇睇控方承諾書上嘅簽名同筆跡，明顯地係用一樣平價藍色原子筆所寫，而且字嘅軌跡之中有大量我地稱之為墨屎嘅出墨唔順情況，所以我可以肯定，呢個簽名並唔係苗博士用佢自己專用嘅鋼筆所寫，極有可能係用一枝贈品原子筆所寫」