係同屋室友?定係同居密友?: (S3)57. 訪問

又一星期後，節目再次播出，上星期節目收視唔錯，所以電視台繼續播放
 
一開始，就係香港孔雀電視台係苗老太屋企徘徊，並成功遇上剛探完苗老太嘅苗學翹
 
「先生先生，你好呀，我們是….」(又係普通話)
 
「借錢免問」苗學翹好快行開
 
「呀腥生腥生，我們是孔雀電視台的，內地友台托我們對你進行訪問的」
 




「冇時間」
 
「呀!!!是關於你在內地福田的未婚對象的!!!她家上了友台控訴你始亂終棄的!!!可以發表一下嗎?」
 
苗學翹聽到一頭霧水，咩始亂終棄，咩未婚對象佢完全聽唔明
 
「我唔知貴台講咩喎，我只有一個女朋友」
 
「就是她啊!!」
 




「下?我女朋友係香港人，冇係內地生活喎」
 
聽到有人可能中傷小祺，學翹都立即停步
 
「那你可以接受訪問嗎?」
 
「啊….可以的」
 
「那….我們用廣東話啦好唔好?」
 




「我D普通話真係…….」苗學翹面有難色之下
 
「真的很爛….」連主持人都有D尷尬
 
播到呢到，現場有D人都已經笑緊，因為苗學翹D普通話真係爛到一個點
 
係一個餐廳內，苗學翹飲住茶準備接受訪問，期間主持人仲教佢少少普通話
 
「一陣有冇格仔打?」
 
「有架，唔好擔心，我地都要守返香港法律」

係電視台內，苗學翹接受訪問
 
「你在內地的對象向友台求助，說你準備和她領證之前，帶上小三，而且否認婚事，這是真的嗎?」




 
苗學翹一頭霧水，不停R頭「我係內地嘅女朋友?未婚妻?」
 
「是呀」
 
「我都未曾係內地識過女仔」
 
苗學翹嘅答案嚇親主持人，所以對方想再問清楚
 
「但係你去年不是透過家人，認識了一個內地的女生嗎?」主持人向佢覆問
 
「去年?」
 
「是啊……嘻……呀先生，我們還是用廣東話吧…大約舊年中秋，你透過屋企人係唔係識左個內地女仔?」
 




苗學翹諗一諗，終於諗起村姑「啊!!我應該知妳講邊個啦」
 
主持人見苗學翹記起，就立即追問「咁點解你會拒絕承認婚約呢?係有D咩原因呢?」
 
「婚約?我同佢見過兩次，傾唔唔夠10句野就有婚約?唔好玩我啦」
 
主持人見到雙方講出嘅事實相差咁遠，所以立即同苗學翹確認一下，而學翹都將成件事由頭到尾講出黎，主持人好細心咁聽同jot低要點
 
過左一陣後，主持人聽哂苗學翹呢一邊嘅版本
 
「即係話，成件事如果照你嘅講法，即係你完全冇對佢有任何承諾?」
 
「係呀，我連佢叫咩名都未知，如果識三個月就要結婚，會唔會太兒戲?我唔清楚內地慣例啦，但我肯定唔會咁做囉」
 
「如果要你同佢地兩個當面面對面對質又可唔可以呢?」




 
「呢個…就麻煩D喎，我入境內地比較麻煩」
 
「都係用回鄉證過一過關者，好簡單」
 
苗學翹再講另一個原因出黎後，主持人就知道，雙方肯定有一邊係講大話以達成目標，所以好值得佢跟進落去