𣎴能愛上的星級女神: 人生沒有綵緋（上）

經過了一輪準備功夫、圍讀等，即將開始拍攝。劇情是關於男主角孫家燊，即是我，和女一若嵐飾演的袁希瑤本來是互相喜歡的青梅竹馬富二代，因為家族生意即將訂婚。但於訂婚之前女一的家族生意破產，男主角的家人立刻取消訂婚，之後女一亦離開了香港。數年後男主角的公司和女二Candice飾演的李梓雯的家族公司因生意而認識，亦發展出感情。不久之後女一代表著世界頭十的跨國集團再次出現，開展了公私的競爭。「預備…Action！」

「阿爸，就算希瑤屋企破咗產，我都一樣希望可以娶佢。」
「家燊，你聽住。商場如戰場，我地得你一個仔，海天國際遲早都係你打骰。袁氏集團嘅誠信已經破產，如果你同袁希瑤結婚，對海天國際會造成好大影響。你已經係大人，孫家燊，阿爸希望你可以諗清楚。」……

「你陪我對咗成日戲，同你去食d好野啦！」在家排練了整天，我拉住程心出外呼吸新鮮空氣。
「你知唔知，我對眼簡直好似唔係自己嘅咁呀！你真係要請我食好嘢補償下。」雖然口中這樣說，但她沒有留下我的劇本在家，反而一直跟身。
「你咁有興趣，中學嗰陣叫過你一齊玩drama你又唔制…」我把她帶到她最喜歡的日本餐廳，買走一大堆外賣回我家。
「唔緊要啦！如果我跟埋你去玩，實會阻住你識萬若嵐。」她淡淡地回應，我笑了：「你咁嘈，－定嚇死若嵐！」
「所以你果陣次次都特登唔比我見萬若嵐！」




「關咩事啊，嗰陣淨係同佢曖昧，最後都冇確立關係。」我回想起那些回憶，反吐嘈她：「反而係你，果陣一見到我同若嵐就避開我地，搞到我以為你唔鍾意佢。」
「我費事阻住你哋拍拖呀嘛。」我把她喜歡的食物也點了，她說完匆匆低頭吃東西。我忽然想起早幾天Candice告訴我的事，看見她每每提起若嵐時，神色確實不好。

「程心，你食完之後，我有啲嘢想問你。」她見我停了手，她也彷彿有點緊張，問我：「係…咩事啊？」
我呷了口水，直接問她：「你係咪離咗婚？」
「點解…突然間咁問嘅？」她仿佛有些心虛。
「你嗰日去廁所傾電話，Candice佢喺度。」她低下頭，無力地靠在沙發背苦笑：「你講真架？」
「其實Candice佢唔係有心聽到你講電話，佢只係想我對自己感情事負返d責任。佢覺得我應該搞清楚你嘅諗法。另一方面，佢都叫我，如果真係鍾意萬海昕，唔好再拖泥帶水，直接同佢表白。」
「我知…其實我知你由始至終，淨係鍾意萬若嵐一個。」她歎了口氣，微笑但眼角有淚地對我說：「本身我都以為同左Charles 一齊之後就可以慢慢放低你，但係自從你撞返萬若嵐，我發現我仲未完全放低曬，我唔想對Charles唔公平，所以同佢散咗。不過呢，而家咁坦白同你講，雖然搞到我有啲啲尷尬，但係我覺得…感覺幾好。雖然我以前係有諗過同你一齊，不過過咗咁多年，我其實都已經冇乜野喇！所以呢，我好多謝你問我，證明我嗰陣冇鍾意錯人。」
「程心，以前每次有事你都係我身邊，仲會借錢俾我渡過難關，我知道呢啲都唔係必然。今次其實你應該多謝朱浩婷先啱。你願意嘅話，我一世都係你好兄弟。」我拍拍胸膛說，心中再次浮現那個變得淡淡然的Candice。這個既是情敵又是知音的女人，無論是上次特意走來若嵐家樓下陪我，還是這次為我化解了程心的心結，也是她，朱浩婷。




「咁梗係啦！」她也拍拍胸口，心情仿佛頓時和之前不一樣，釋懷了。

這天回片場，李栢言一看見我便把我拉到公司員工餐廳喝咖啡。