𣎴能愛上的星級女神: 真心話大冒險（下）

True or Dare這次轉到Candice，Mark哥立刻搶着問：「如果向瑾瑜同你表白，想你做佢女朋友，你會唔會應承？」Terris仿佛也在期待她的答案。她故意盯着了我，冷傲地拒絕：「唔會！」Mark哥和Paco也望向我們一副不理解的樣子。老實說，她拒絕那一下有點兒像在我心頭上劃了一刀，但她還是更似故意報復我。問題一條接一條，每個人都被問過，又重新轉到我身上，這次Terris主動了解我：「介唔介意我問吓，你對Candice有冇好感？」
「瑜哥你再skip就要…」Mark哥說了一半，我已經把上衣脫下。若嵐應該是最驚訝的那個。我走到樓梯位置二話不說便跳了下海，順道令自己清醒一下不再亂想像什麼。
「毛巾啊…快啲…」Paco去拿毛巾，Mark哥立刻過來把我接上岸，他們都被我嚇一跳。Paco邊把毛巾放到我身上，邊罵我：「瑜哥你係咪傻㗎？你飲咗酒就唔好落水啦！好危險㗎…」只見Candice聽到這句後呆了，臉色鐵青，走到我跟前很惡地鬧我：「向瑾瑜！係啊，我係唔夠可愛、唔夠純真、唔夠得人中意。你對我冇好感咪講囉！我唔介意㗎喎。唔使搵自己條命黎較飛㗎…」從來未見過她這麼生氣，其他人也被她的語氣震驚到。
「係呀，我對你冇乜好感，咁得未？」我按耐著心中的情緒，故意冷冷地說。她眼泛淚光、很生氣地大力推了我一下，便走開了。
「瑜哥你去沖個涼，我哋睇住佢。」Paco拍拍我肩，Terris好似也有跟上去。

我洗了個澡出來，Mark哥和Paco把我拉到船頭聊天。
「咩事呢兩位大佬？」我邊抹乾淨頭髮水份邊問。
「老老實實，你真係唔諗住同Terris哥爭咩？」Paco問。
「爭咩呢？」




「拿唔好再扮嘢啊！」Mark哥兇狠地壓住我肩。
「咁你地唔問下朱浩婷先？呢啲嘢好似唔係我決定㗎喎。」我回答。
「你再係咁唔嗲唔吊冇表示嘅話，Candice話會比機會Terris哥架啦！你行唔行動啊？」Mark哥大力拍我膊頭。我沒有回應，只是默默地抹乾頭髮。
「若嵐你又唔揀，Candice你又唔爭。瑜哥，你想點架？話你憑實力單身真係冇錯。」Paco拍拍我肩，他們走回船尾。我在船頭躺了一會，回去時他們已經在玩飲酒遊戲。

「瑜哥返黎拿？仲以為你唔敢黎…」Mark哥取笑我，「唔敢？我邊忽似呀？」「我哋玩鬥大，一隻牌放額頭估自己定對方大，輸咗就飲一shot。」「黎啦！」……我們輪流鬥，大家也喝了幾shot，有點醉意。
「若嵐姐！你成日呃酒飲！」
「講到我…想成日輸咁……瑾瑜…」若嵐伏在我肩上，Mark哥有點微醺地說：「而家…Terris同瑜哥贏得最多，你哋pk！」Mark哥耳朵泛紅，奸笑著拍拍Candice的肩補充說：「贏咗…可以獲得Candice姐一個…」
「我唔係獎品啊…」有點醉意的Candice特別溫柔，「咁啦，你哋邊個贏左…我下個禮拜同邊個…去街…」Candice瞇起眼，有點醉意傻笑著。
「瑜哥，你敢唔敢賭？」Terris即使喝了些酒，說話依然很穩重不輕浮。




「我先唔想同佢去街！」我違心冷淡地說。看見他額上是Q，相信我比他大的可能性比較低。但他的表情似乎表示着我的牌也很大。
「瑜哥，你答我一個問題，我可以話你知你隻牌係咩。」
「冇可能。你知我唔會答你。」我猜到他想問什麼。
「你係King。」他先說再問：「你係咪中意Candice？」此刻連Candice在內大家也特別清醒地望向我和Terris。
「Terris哥，我欣賞你敢愛敢恨。」我選擇相信他，所以我故意這樣說：「我張牌細過你。」我們一起開。他是Q，我是K，他贏了，但所有人也沉默了。只有Candice望向我失望的眼神令我最心不在焉。

大家也差不多醉醒了，船泊回岸邊，大家也各自離開。「Candice我送你返去。」Terris的司機到了，主動邀請她上車。我不敢再望向她，只是默默把若嵐和Renees扶上我車的後座，準備負責送兩位女士回家。但Terris看見我這樣，把司機帶了來我旁邊，說：「你頭先飲咗酒，可能未散晒，我叫亨哥車佢哋同你返去先。我有架遊艇泊咗喺度，我應間先走。」他再問：「Candice你要唔要跟佢哋車走先？」Terris這份風度，實在令我無地自容。
「我架車冇咁多位，Candice姐唔好意思。」我故意說，她沒有理我：「唔洗啦，Terris你自己一個人，我陪你啦。」
「咁唔該曬Terris。麻煩晒亨哥。」我頭也不敢回便上了車。