彩虹髮型屋: 2.3

「今次我再鏟短咗，我覺得你應該carry到。」她將我從思緒拉出來：「O唔OK? 不過你唔OK都太遲啦。」

她略帶奸狡地一笑，似乎把我當作她的實驗品，我對此毫無意見。

「我OK啊，不過你唔係應該問咗客人先㗎咩？」我微笑回應。

「咁你鍾唔鍾意剪頭髮？」她沒有正面回答。

「ehh，都算鍾意嘅。」我被她突然轉變話題已沒有立刻回答：「啲人話好似剪走煩惱咁呀嘛。」





「你都可以咁講嘅。」她忽然停下手中動作，再緩緩道：

「我反而覺得每一條頭髮就好似人生嘅每一個過客，有毛孔嘅地方係注定，遇到啲乜嘢人都係注定嘅，冇得改變。而剪頭髮就係我哋點樣面對呢啲過客，你可以剪短佢，電攣佢，染到佢五顏六色，總之你想用咩態度面對人生之中嘅每個人都得。而我就係幫所有人表達佢哋嘅態度。」

艾莉回過神來，繼續手中動作，又說笑道：「所以偷薄剪短，ummm點講呢？應該話係簡單直接，定係求求其其呢？」

我沒有回答，可能是還在咀嚼她的一番話，又或者是在讚嘆艾莉不只是藝術家，更是文學家、哲學家⋯⋯

無論如何，對於她的問題，我心目中是有答案的：對於身邊的一切事物和人，我都是抱持得過且過的心態，渾渾噩噩地過日子。