情人節那天，我在衣櫃中找到我生命中的天使: 第一章：衣櫃入面有人既？！

 
  大家好，我叫阿傑，係一個好平凡好平凡既大學生。平時做既野嚟嚟去去都不過係上堂，返工咁，永遠都係得自己一支弓。不過冇法子啦，鬼叫自己一日到黑都成身恤衫，又戴曬粗框眼鏡咁一副毒撚相，比我係女仔都唔會想走過嚟。不過咁都未算係最慘，最慘係我僅餘既朋友入面個個都出曬Pool，每次企係佢地身邊都覺得自己毒多幾錢重。
 
  話說早排同佢地一齊去飲野，當人人都飲到High High 地既時候我居然比佢地問起我毒左咁耐究竟出左Pool未，點知當時飲野飲到自己好似痴左線咁大大聲話有，仲要作到佢係靚到爆，身材又正，佢地班友既女朋友冇一個比得上我女朋友既十分之一。可能就係最尾嗰下吹大左，結果佢地就話不如二月十四情人節既時候人人都帶自己女朋友出嚟一齊玩，順便同我個「女朋友」見一見面。而我就好爽快咁答應左……
 
  其實最後個個都飲到醉曬，而我第二日醒翻都唔記得左呢件事。直至二月十三號嗰晚我收到個咁既電話……
 
  「喂阿傑，家豪呀，記唔記得嗰日我地一齊飲野，話左個個聽晚一齊帶自己個女朋友出嚟，你記得既下話？係咁八點係銅鑼灣SUGO門口等啦，記住嚟呀！」
 
  喺我連回應既機會都冇既時候就Cut左我綫，咁即係局住我要去啦。到時人人都有伴，得我一個係單身，實比佢地笑到面都黄，唉，呢鋪真係大檸樂。


 
  聽完個電話之後我個腦真係一片空白，唔知做咩至好，一直係屋企入面走嚟走去，幾乎行曬全屋所有角落，但係自己依然係好緊張。結果一直行到個天都光埋，最後攰得滯走左去訓覺，訓嗰時仲希望一起身會咩事都冇，一切都只係自己諗多左。
 
  我訓醒起身拎一拎部電話睇，食屎了原來已經六點鐘，呢次真係死得人，就算我宜家打比我既女仔Friend 叫佢地扮住我女朋友先都冇時間。唔通呢次真係要企定定係佢地面前比佢地當傻仔咁笑？
 
  原來當一個人驚得滯既時候真係可以做出一連串莫名奇妙既事情，而我最後選擇左……躲藏係衣櫃入面。其實到底係咩原因我都唔知，可能諗住閂左門就可以將自己遠離現實世界，唔會有人揾到自己。之不過係我屈曲左個身坐係個衣櫃入面之後，忽然感覺到背脊好似比兩個軟軟地既波頂住個，有種講唔出口既奇怪感覺。係我印象入面衣櫃到應該係得啲衫，點解無啦啦會有兩個波呢？
 
  我立即轉頭望下到底係咩嚟，居然係一個女仔，而個樣同身材仲要係同我作既版本一模一樣樣，樣靚身材正，唯一既分別就係我眼前既女仔係一絲不掛，個樣睇落仲好似剛剛訓醒咁，唔知係唔係比我個背脊撞醒左呢？不過呢樣都唔係重點，好地地一個毒男既屋企又點會有個咁正既女仔先得架？都係快快手叫佢起身問佢發生咩事之後打發佢走，萬一屋企人返嚟誤會我帶個女仔返嚟仲要玩到入衣櫃，到時真係水洗都唔清。
 
  係呢個咁緊張既時刻，我屋企個門鐘響左……