情人節那天，我在衣櫃中找到我生命中的天使: 第十五章：毒男發火，非同小可。

 
  我隨手喺褲袋到拎左部手機出嚟一野飛落佢下面，好彩因為佢兩隻手都係捉住左我隻腳，喺冇辦法抵擋之下直接命中。結果佢痛到立即放開我隻腳，然後用手禁住下面喺咁「嗚呀嗚呀」叫。雖然我部電話唔係咩3310咁堅，只不過係一部好普通既智能電話，但全力投出去既威力點都會令佢下面痛到飛起掛。
 
  然後我慢慢咁行去佢身邊，用頭先比佢捉住嗰隻腳，輕輕咁放喺佢禁住下體嗰到嗰隻手上面，慢慢再施加壓力。呢個呀叔當堂嚇到個人震曬，連尿都瀨埋出嚟，眼見地下愈嚟愈濕，佢旁邊啲去死去死團員全部都嚇到O曬嘴冇一個敢膽郁，更加唔好講話乜野幫拖之類。
 
  「你頭先唔係好想我反擊架咩？我宜家咪聽你說話去做囉，點解你好似好驚青咁呀？」
 
  「我知我唔啱啦，求下你千祈唔好踩落嚟呀，你要我做乜都得架。」
 
  「知驚既仲唔快啲同我走！」


 
  就係咁，呢班咁麻煩既呀叔終於走左。今次特別在唔係靠羨婷既力量，而係我用自己既力量嚇走呢班呀叔。
 
  真係估唔到我呢個毒男都會有咁英勇既一刻，真係講出嚟我自己都唔信，我簡直就係新世代既威猛先生呀。如果我頭先既表現比其他女仔見到一定迷死佢地呀。
 
  不過宜家睇嚟絕對唔係一個適合既時間繼續比自己一個喺到自High，都係快啲去睇下羨婷佢點先。
 
  都唔知好彩定唔好彩，雖然啲呀叔未對羨婷出手就比我嚇走左，所以羨婷一直可以好安心咁喺到訓覺，但係咁即係話我頭先既英勇表現佢一啲都睇唔到囉，有冇搞錯呀？！唉，不過既然佢一啲事都冇，咁樣就算數啦。
 
  之後我乜野都冇諗，一下就將羨婷佢抱住，仲要抱到實一實，驚佢會離開我咁。不過我自己都唔知點解會咁做，只係個身體好自然就咁行動，完全冇諗過任何野。而喺我抱佢既時候，羨婷佢終於醒左。


 
  「主…主人，點解你會喺到架。」
 
  「仲問我喺邊？你知唔知你自己差啲比人打啦。」
 
  「之不過……」
 
  「你一啲事都冇……咁真係太好啦……」
 
  「主人你唔好抱得我咁緊啦……不如我地坐底先啦……好唔好？」


 
  聽到羨婷咁講之後我至冷靜番落嚟。我地宜家又好似頭先咁坐左喺張長凳到繼續傾計，之不過羨婷佢好明顯好小心咁講野，睇嚟佢驚唔小心又踩中地雷激嬲我。
 
  「點呀你冇事呀嘛？」
 
  「無啦啦點會有事呀？」
 
  「唔係呀化，你真係訓到咁冧呀？你知唔知呀，頭先我嚟到既時候居然比我見番嗰班去死去死團喎，之後呢，我就……」
 
  我將成件事既過程慢慢咁講曬比羨婷知，咁當然啦，既然佢頭先訓左覺，咁我吹大少少都冇所謂啦，反正呢啲…呢啲叫特別既說話技巧呀嘛。不過呢，我都只係吹大咗少少啫……我諗。
 
  「……之後我轉身再凌空飛踢，佢地就咁比我嚇走啦。嘩，我宜家諗返起都覺得自己勁呀。呀…不過我諗你都唔會信架啦……」
 
  「唔會…只要係主人你講既話…我都會信架。之不過……」
 


  「之不過」？！佢講得呢三個字即係話佢唔信啦，唉，早知就死死地直接講個真相就算，萬一一陣佢問左啲我答唔到既野點算呀？
 
  「之不過……點解主人仔要返嚟呢到呀？主人你唔去揾阿怡？」
 
  「阿怡……？點解你會知道頭先我去左揾阿怡架？」