情人節那天，我在衣櫃中找到我生命中的天使: 第十九章(最終章)：嘩……

 
    就係咁，我喺情人節呢一日同天使邂逅既故事就咁完結。到左第二日，我既生活亦都變返做平時咁，一起身就換衫返大學上堂，情況同情人節之前既我一樣。
 
  雖然今日我只係得一堂八半要上，而且仲要唔洗翻工，之不過返完學之後我冇立即返屋企，而係一個人走左去尋晚行過既尖沙咀海邊吹下風。一路直到六點幾我先返到屋企，然後一個人靜靜咁返咗入房。
 
  「唉，今日出左街成日，都係沖個涼先啦。」
 
  就喺我打開衣櫃準備拎衫沖涼既時候，最估唔到既事終於發生左，我居然再次見到羨婷坐左喺個衣櫃入面，而且仲要係喺一件衫都冇著既情況下。
 
  「你返嚟啦主人，嘻嘻。」


 
  見到羨婷既時候我個心真係開心到唔知形容至好，結果我一句野都冇講就喊左出嚟然後抱住佢。而我好肯定自己抱緊真係羨婷本人，唔係一個好似羨婷既幻象。
 
  「主人你唔好抱得咁緊啦。」
 
  「點解…點解你會番嚟架？」
 
  「本來我真係要返天堂架，之不過似乎我喺凡間呢到用得太多魔法，搞到我啲天使點數只係夠轉送到我啲衫返去天堂喳，宜我個人呢就留左喺凡間。除非我喺凡間呢到幫返多啲人去儲多啲點數，如果唔係就返唔到上去架啦。」
 
  「你唔怕咁樣會比啲警察天使話你非法逗留咩？」


 
  「唔怕既，我諗今次可以算係特別案例，可以網開一面掛，嘻嘻。」
 
  「估唔到件事最後會發展成咁。」
 
  「咁既話即係我又可以陪喺主人你身邊，真係太好啦。」
 
  「唉，真係冇你收呀，是但啦。」
 
  「不過話時話呢，我記得臨走既時候主人你好似話中意啲唔知乜野架喎，我唔係好聽得清楚呀，你可唔可以講多次呀？」


 
  「呀……呀……有咩？我有咁講過咩？多事啦你。」
 
  大佬，呢啲野對我呢個毒男嚟講要鼓起好大勇氣至講到架嘛，你突然要我講又點會講到呀！唉，一時之間比你咁問一問我都唔知點做好。
 
  「叮咚、叮咚、叮咚……」
 
  好彩個門鐘而家響喳，等我把握呢個機會改個話題引開佢注意先，萬一佢繼續問落去我諗真係會全場dead曬。
 
  「我知今次又係天堂嗰邊又送返啲衫嚟係咪呢？你留喺到啦，等我去開門幫你拎就得架啦。」
 
  「嗯……」
 
  望到佢「嗯」嗰下成塊面紅卜卜咁真係好可愛呀，老實講我真係想唔理個門鐘一路望住佢囉。不過羨婷宜家一件衫都冇著，我都係唔好望住先，等我快快手拎番啲衫比佢著，如果佢冷親就大件事啦。
 


  正如我之前都講過，我平時開門都中意望下個防盜鏡先，就算有時明知係屋企人返嚟我都會咁做，之不過唔知係唔係因為羨婷喺我意料之外既情況下返左嚟搞到我個人太興奮，結果我一心只係諗住要幫佢拎返啲衫，喺睇都冇睇過個防盜鏡既情況下直接打開咗屋企道門。
 
  但係喺我打開左道門之後第一時間見到既居然唔係之前見到嗰個速遞員，而係……我阿媽！！！
 
  食屎啦呢鋪，點解我阿媽好返唔返，會揀喺呢個時候返架？！
 
  不過呢樣都唔係最大問題，最大問題係喺呢個時候……
 
  「主人，你唔係話幫我拎衫架咩？」
 
  羨婷佢又再次一絲不掛咁由我間房到行左出嚟，而今次仲要同我呀媽撞到正。
 
  「呀仔！」
 
  「主人！」


 
  「呢個係咩人嚟架！！！」
 
  一個女人喺我右邊，另一個就喺我左邊，兩個仲要同時喺到大叫，呢個環迴立體聲真係唔講得少。
 
  「救命呀！有冇多一個天使嚟幫我解決宜家呢個問題呀！！！」
 
  睇嚟唔止情人節嗰日，我同羨婷既故事以後都會繼續落去……