第一章:除夕嚟講呢,點睇都係追女仔既好時機
 
  「如果一個男仔喺除夕倒數既時候攬住自己心儀既女仔,然後答正十二點可以同佢表白既話,咁樣佢地之後嗰一年就會好似糖痴豆咁,想分都分唔開佢地。所以呢……各位單身既毒男,識做啦。以上資訊,係由最叻煮牛河既牛河博士話你知……」
 
  牛河博士?!好地地一個牛河博士點解會講埋啲咁既野架?宜家既電視台做個節目都hea成咁,仲點叫啲市民比面呀?好心呢啲野就比個風水佬或者算命師傅講啦。
 
  我望住茶餐廳部電視機,我望唔透,我望唔清而家電視業既前景,我望唔清點解牛河博士要講啲咁既野……我帶住好多諗唔明既野,嘆咗一口氣。
 
  不過其實令到我嘆氣既,又點止呢啲呀……
 
  「主人呀,不如呢……」


 
  我感覺到身邊有一股好期待既眼神望住我,而且我幾乎唔洗睇都可以估到係邊個望住我。冇錯,就係我眼前呢個人…呀,講錯添,應該係話呢一個天使…… 話說羨婷佢唔夠天使點數返上天堂所以留咗喺人間,為咗隱藏佢係天使呢個身份,佢入埋嚟大學同我一齊上堂,扮做一個唔知邊到嚟既exchange student,順便睇下有冇機幫下人,賺返啲天使點數。咁當然,入學手續呢啲野全部都係佢用僅餘既魔法搞掂啦。
 
  「冇不如呀。」
 
  「點解冇喎,人地咩都未講……主人你知我想講乜野咩?」
 
  「仲有啲乜野呀,你實係想我同你喺除夕倒數嗰晚去玩啦。」
 
  「一於去啦,我諗除夕倒數一定會好好玩架啫。主人你知唔知呀,我地天堂嗰到係冇倒數呢一個活動架。」


 
  「倒數呢啲野好麻煩架,你都係咪預我。」
 
  羨婷佢嘟長個嘴,兩隻手握住拳放喺下巴附近,扮到成隻可憐既貓仔咁。不過呢……我都唔受呢套既。
 
  「唔去呀……」
 
  「咁…咁好啦……」
 
  羨婷佢好唔開心咁耷底頭,繼續食住佢嗰碟雜扒飯;而我都一樣耷底頭,慢慢咁食我碟飯。


 
  「你今次一定要幫我呀阿傑。」
 
  唉,估唔到羨婷佢真係對倒數咁有興趣。不過點講到好,我都係唔會應承佢既。
 
  「都話咗唔得啦,點解你仲要喺到問架?」
 
  就喺我好唔耐煩咁講完之後,羨婷抬起頭,呆呆地咁望住我。佢本來細細既嘴而家變到好似成個波咁,應該係頭先比我拒絕完之後,化悲憤為食量,將啲飯同扒塞曬入個嘴到。如果要我用一種動物去形容佢既話,我可以好肯定咁講佢係一隻塞滿瓜子既倉鼠。
 
  「主人@#&@Q$()@#*&」@#$?」
 
  老實講我見到佢個嘴變到成個波既時候已經好想笑,不過我都叫忍得住,但係佢宜家仲要用個咁既樣去講一堆我聽唔明既說話,你仲叫我點忍住唔笑呀?!
 
  咪…咪住先,既然羨婷佢個嘴都塞到成隻倉鼠咁,咁頭先係邊個同我喺到講既呀?照計啲伙記都唔識我架……唔係日頭都咁猛下話?
 


  就喺呢個時候,我既身邊出現咗一個男人既身影。
 
  呢個男人同我一樣著住恤衫,塊面四四方方,頭髮就gel到成個八神太一咁,而表情就睇落好似好緊張好趕時間,即使我唔係貼近佢塊面都可以好清楚咁聽到佢既喘氣聲。
 
  「阿傑你今次一定要幫我呀,我以後食粥食飯都係靠你架啦。」
 
  「阿…阿敬?點解你會喺到架?」
 
  眼前呢個男人原來就喺我既大學同學 – 阿敬。
 
  「咪話咗叫你幫我囉。」
 
  「幫你?你喘曬氣咁,係唔係跑過嚟呀?不如你坐底抖返順條氣先啦。」
 
  「喺囉,你都喺[email protected]#$*#%#%&先啦。」


 
  我同阿敬一齊望住羨婷,雖然我地都唔係好知到底佢想講咩,不過我地都冇追問落去,而且仲不約而同咁擰轉頭,扮到頭先咩都見唔到。
 
  阿敬接過侍應比佢既一杯水,飲完之後佢就冇再喘氣,成個人終於平靜落嚟。
 
  「係啦阿敬,點解你會知我地會喺到食飯既?」
 
  「你個毒男仲會去得邊呀?次次同羨婷一齊都會嚟呢到食飯既,有腦既人都會嚟呢到搵你啦。唔止呀,你平時得閒仲會呢……」
 
  阿敬你條友係咪邊間報館做intern架?調查得我咁仔細既?!
 
  望住坐喺我對面既羨婷不停點頭,非常之同意阿敬對我既分析,老實講真呢個moment我真係想爆,不過唔係漿爆,係樣衰到爆呀!我覺得自己好似被迫喺到跳脫衣舞,仲要係冇得比我揀脫邊件嗰隻……
 
  我好尷尬咁耷低頭,不斷將啲飯塞入個口到,心裡面一直希望佢唔好再爆曬我啲習慣出嚟。
 


  唔知係唔係阿敬佢感覺到我好尷尬,當我塞曬啲飯入口既時候,佢冇再講關於我既事,而係轉為一個好沉實既語氣,語重心長咁講野。
 
  「阿傑呀,其實呢……我…我想你幫我一個忙。」
 
  我含住一大啖飯抬起頭,望住阿敬,向佢做出一個疑問既表情。
 
  「我…我想你幫…幫我手……」
 
  平時講野好爽快既阿敬居然口窒窒,而且臉頰仲泛紅起嚟,老實講真係有啲唔正常,唔知佢到底想我呢個毒男幫佢手做咩呢?
 
  「幫…幫我手……我想你幫我手追女仔!」
 
  「@#$(%*&#%???(追女仔???)」




-----------------------------------------------------------------------------------------------------------------------------------
真係好耐冇寫呢個故啦, 唔知大家仲記唔記得呢個故呢?
今次寫既係一個外傳,唔知大家會唔會中意同埋支持?
不過我都隔咗一段時間冇寫到故,寫作手法同埋啲字眼都可能會唔同咗少少,呢點唯有請大家多多包涵 :)
可能你會好奇點解呢個係先行版,咁係因為故事既內容我都未諗到,所以只會喺「紙言」到更新先
高登方面就等下一話或者之後先開個post啦, 到時大家記住都要支持我呀:)
=14px大家記住多啲留言,如果中意個故既記住share比朋友睇呀

我想順便問下, 我手機個<紙言>app show唔到我呢到有更新, 到底係我部手機問題定係個故太耐冇更新就會唔show出嚟?
有冇人可以答我 :(
 
已有 0 人追稿