情人節那天，我在衣櫃中找到我生命中的天使: 第四章：變變變生命力

 
  「居然係佢？你地唔係一早已經喺埋一齊啦咩？」
 
  我講完之後，阿敬既臉頰再次泛紅起嚟。
 
  「咩喺埋一齊呀，邊…邊有啲咁既事呀？」
 
  「唔係咩？我大學到成日都見到你地去邊都一齊既。」
 
  「咁…咁……」


 
  「咁即係點呀？嘻嘻，我知啦，原來你一直都唔夠膽去表白，所以先……呀！！！」
 
  喺我都未講完句說話既時候，呢個時候我隻右腳感受到一種莫名既痛楚。
 
  「知就咪講出嚟啦！」
 
  阿敬講完之後就頭也不回咁一支箭咁衝出咗間茶餐廳，做咩啫佢。
 
  就喺阿敬走咗之後，我低頭望一望自己隻腳，點知發現到羨婷隻腳好出力咁踩住我，我抬頭望向羨婷，從佢既眼神當中，我知道我又中招了……


 
  「你份人係唔係真係咁天真呀？呢啲野諗下都估到啦，估唔到你咁…唉，算數啦，繼續食野……」
 
  之後我地乜都冇講，亦都冇望對方，只係繼續食野。食完之後，我企咗起身準備去埋單，但係就喺呢個時候羨婷佢捉住咗我隻手。
 
  唉，唔係我又做錯咗啲乜野掛，我只係諗住去埋單啫。
 
  「主…主…主人。」
 
  「咩事呀？」


 
  「對…對…對唔住呀。」
 
  對唔住？又會無啦啦同我道歉既？你條友係唔係又諗到啲咩新招嚟鬧我呀？
 
  我望住羨婷個樣，發現佢既眼神變得唔再好似成隻獵豹咁，而變返做平時成隻貓仔一樣，不過同平時唯一既分別就係塊面變得出奇地紅。
 
  「呀…咁…咁…呀……」
 
  你既態度變得咁快，你叫我點比反應呀？唔好咁玩我啦大佬，好難觸摸呀！
 
  「我頭先咁惡對主人你，真係唔係有心架，主人你唔好因為咁而嬲我呀。」
 
  「唔係有心可以係點呀？唔通你會無啦啦變到咁呀？唔通你個身體入面有個開關，一講到愛情呢啲野就會變成第二個人咁咩？」
 


  聽完我講之後，羨婷佢成個嘴o曬咁望住我，表現得十分驚訝。
 
  「主…主人你點知架？」
 
  「知？知咩呀？」
 
  「其實我都唔知點解架，總之每次我一接觸到啲愛情野既時候，自己就會好似變到第二個人咁，就連我自己都控制唔到。」
 
  唔係掛，呢啲到底係乜野設定嚟架？原來我頭先真係冇講錯，羨婷你真係好難觸摸呀！
 
  「但係點解你而家又會冇事既？你而家又變返好似平時咁啦喎。」
 
  「咁係因為……」
 
  「因為咩呀？快啲講啦。」


 
  「主人你唔好咁心急啦，其實只要我做到某一個動作既話就會慢慢變返做本來咁架啦。」
 
  「又做動作？唔係好似你用完魔法咁要摸你心口下話，我…我先唔會咁做架。」
 
  講完之後，羨婷再次將塊面谷到成個波咁，而且塊面比之前明顯變得更加紅。
 
  「乜主人你成日都諗埋啲咁既野架！你再係咁既話就真係到我發火架啦。」
 
  汽車維修員拎「士巴拿」去踢波都係正常啦，何況我作為一個血氣方剛既年輕人，諗呢啲野又有咩問題呀……………不過呢句野實在太cheap，我完全唔敢講出口。
 
  「唔…唔好意思囉，咁我要點做先好呀？」
 
  「其實只要我掂到其他人既身體就可以變返原狀架啦。」
 


  「咁好易啫，只要你求其掂到一個人就得啦。」
 
  「唔係架，呢…呢個人一定…一定…要…要…」
 
  羨婷佢愈講愈細聲。
 
  「一…一定要係我好親密既人…先得架……」
 
  「咁……咁…呀……」
 
  聽到佢咁講之後，我又再次唔知點樣回應好，結果接住落嚟既又係一陣沉默。
 
  「但…但係你頭先好似冇掂到咩人喎，咁點解你又會變返本來咁既？」
 
  「唔係呀，其…其實係有架。」


 
  「有咩？邊有呀？唔好話係我啦，就連其他人你都冇掂到喎。」
 
  羨婷佢好尷尬咁對住我笑咗一笑，然後指住餐枱下面。我望落枱下面，唉……原來頭先就係佢發火踩咗我一下，機緣巧合之下掂到我，從而令到佢變返本來咁。唉，要爆咗seed既佢變返原本咁睇嚟真係難過百變小英去將吉羅卡回復本來既真面目。不過而家諗返起，如果用比人踩一腳就可以換返本來嗰個羨婷既話，真係超值。
 
  「算啦，總之你而家變返本來咁就得架啦。」
 
  「咁…主人你即係唔會嬲我啦？」
 
  「唔…唔…唔知呀，你食完未呀？快啲埋單啦，唔好住人地做生意。」
 
  「嗯，食飽嚕，嘻嘻。」
 
  就係咁，我地就離開咗間茶餐廳。唉，真係完全想像唔到聽日到底會發生啲咩事，希望聽日可以過得好順利啦。
-----------------------------------------------------------------------------------------------------------------------------
估唔到新一年就快過咗一個月，不過呢幾日好似唔知做過啲乜咁 :(
眼見高登到愈嚟愈多人睇呢個故，老實講真係幾開心
不過同時多咗啲壓力，覺得好似唔可以亂寫咁
不過最近諗劇情方面唔係好順利，我都希望可以有個天使幫我啦(笑)