情人節那天，我在衣櫃中找到我生命中的天使: 第九章：諗下食咩好啦

 
  OK既手勢？！你做乜鬼野OK既手勢呀？！停呀！停呀！
 
  好彩呢個時候套戲剛剛好播完，小櫻好興奮咁冇理到阿敬佢行過嚟我地嗰到，阿敬佢先至冇辦法落手。雖然阿敬個樣睇起嚟係有啲失望，但係我同羨婷都忍唔住嘆咗一口氣。
 
  「你地頭先有冇睇到個主角呀，嘩，真係好有型呀。由其係最後嗰一幕呀，個男主角為咗救女主角居然可以自己身體都唔顧，真係好有型呀，仲有呢……@#$%*&#%」
 
  唔係掛？頭先套電影悶到咁你都可以睇得咁入神，你啲品味有冇再差啲呀？
 
  「係呀，由其係佢最後出既龍卷風飛腿，真係好掂呀……@#&$##%)」


 
  羨婷你咁都答到嘴？你頭先好似同我一齊應付緊嗰個男人架喎，點解你可以知道套電影講咩架……唉，聽你地兩個講野簡直辛苦過聽火星文，由得你地咁樣講落去都唔係辦法，都係快啲諗個借口走先得。
 
  「係…係啦，我地不如快啲走啦，唔好阻住人地播下一場戲啦。」
 
  講完之後，阿敬剛剛行到嚟我地呢到，會合完之後我地就離開咗戲院。離開戲院之後，我地本來計劃去食野，但係見時間又唔係話好夜，所以決定喺周圍行一行先再作打算。
 
  我地一路喺銅鑼灣到行嚟行去，阿敬就同小櫻兩個一齊行，而我就同羨婷佢行喺後面，從後面望著佢地，阿敬好明顯好進取咁同小櫻傾計，雖然小櫻同佢有講有笑，但係唔知點解小櫻既表情望落有啲唔自然。
 
  「頭先真係好刺激呀，由其係隻恐龍跳出嚟嗰下真係好真實呀，不過都要讚下個男主角都真係幾勇敢，連自己安全都可以唔理去救其他人。嗯，呢套3D電影真係唔錯。」


 
  「係…係呀，如果我係…係個男…男主角都會咁做。」
 
  「嘩，估唔到阿敬你會咁勇敢喎。」
 
  阿敬聽到之後成塊面都紅曬，嘴角露出甜甜既笑容。
 
  呢個時候我同羨婷佢一齊傾計，不過唔知點解而家既佢同之前好唔同，點講好呢……就係而家既佢實在太正常，明明阿敬同小櫻就喺我地眼前，佢唔係應該會爆seed架咩？不過我都係唔好問佢啦，費時唔少心講錯野之後又搞到佢又成個人變曬就唔太好。
 
  「話時話呀，其實小櫻份人係點架？」


 
  「小櫻？點解主人你無啦啦提起佢既？我知啦，其實主人你……」
 
  「你唔好亂諗野呀，我只不過喺到諗其實小櫻佢到底中唔中意阿敬呢？以阿敬佢既性格嚟講應該一早就試過表白啦，仲洗乜要我地幫手喎……」
 
  「唔…咁我又唔知喎……」
 
  「仲以為你成日同小櫻佢一齊上堂會了解多啲添。」
 
  「諗下先……，其實而家諗諗下……呀，我記得以前聽其他人講阿敬佢已經試過表白好幾次架啦。」
 
  「咁個結果係點呀？」
 
  羨婷佢搖一搖頭。
 


  「唔知點解每次阿敬佢想表白既時候呢，小櫻都一定會有啲理由唔得閒架，例如要傾Project啦，又或者係夠鐘上堂，結果阿敬佢就冇一次表白到。可能就係因為咁多次唔得所以先想我地幫手掛？」
 
  「原來係咁……」
 
  我地就喺咁一路行一路傾，傾到我地都唔知行咗幾耐，直至小櫻佢擰轉頭同我地講……
 
  「係啦，我地都行咗咁耐，不如我地去食野囉。」
 
  「咁呀，你地有冇咩提議呀？」
 
  哼，終於到咗諗要去邊食野既時候啦，平時我問親其他人有咩提議，多數人都會話冇意見既，咁既話我就可以提議個唔洗好多錢，對我地呢啲毒男最實惠既餐廳啦。
 
  「我…我…我有呀。」
 
  你個阿敬喺呢個時候插乜野嘴呀！不過唔緊要既，話唔定你會提議啲好野嚟呢，都係唔好咁衝動先。


 
  「不如去酒店食自助餐呀？既然一年最後一日，一於食好少少當係同呢一年道別啦。」
 
  朋友你冇野下話？邊個話過咗一年就要去道別架？好地地去乜鬼酒店食自助餐呀！
 
  「但係咁喎，呢啲時候酒店應該會full曬架喎，我地都係去第二間啦。咦，呢到附近好似有間薩利呀喎，不如我地去嗰到啦。」
 
  「唔係呢，不如我地去睇下先啦。」
 
  你有冇聽過乜野叫做「企硬，就會衰硬」呀？你個立場企到咁硬做乜鬼呀，收手啦好嗎？雖然話就話出嚟係幫你手去追小櫻佢啫，但係你都唔洗去到咁盡掛？
 
  「唔係呀，我都覺得薩利呀幾好喎，不如我地去啦。」
 
  點都估唔到小櫻喺呢個時候會講啲咁既說話。既然女神都咁講，阿敬當然冇可能反對啦，結果我地最後就決定去薩利呀到食晚飯。
 


  決定好之後，小櫻蹺住我隻手，拉住我向餐廳方向行。
 
  「決定好就行快啲啦，我好肚餓呀。」
 
  冇野下話？你係唔係蹺錯人呀？？？