情人節那天，我在衣櫃中找到我生命中的天使: 第十一章：食飯之前記住要睇餐牌呀

 
  「嚟啦，就等我地一齊幫阿敬手追到小櫻啦，哈哈哈……」
 
  聽到啲咁既語氣就知羨婷又變咗，不過之前幾次都見過佢係咁，所以我都冇乜野好驚訝，更何況我某程度係特登想叫呢個羨婷出嚟，費時羨婷佢又會唔知講咩搞到我鬼咁尷尬。
 
  佢拎咗部電話出嚟之後又開始對阿敬佢傳送指示。
 
  『食飯呢一個環節好重要架，記住要小心處理。』
 
  阿敬聽完之後點咗一下頭。


 
  「羨婷，其實食野嗰到有乜野可以小心呀？咪又係自己食自己野……」
 
  聽完之後，羨婷佢雙手合埋一齊，做到好似人地祈禱咁樣，然後將手放喺鼻下面，個動作就好似某一套機械人卡通片入面既司令官咁，望落仲有陰謀過鄭子成。
 
  「哼，你知唔知食野都只係其次，最重要都係阿敬佢食野既呢段時間可以向小櫻佢表現到啲乜野出嚟。」
 
  嘩，聽落好似好勁咁喎，唔通係要有餐桌禮類野？
 
  「咁……即係表現啲乜野呀？」


 
  「我答唔到你。」
 
  有冇搞錯呀！講到似層層咁原來最後都係答唔到我，冇料就咪扮四條啦。
 
  呢個時候侍應嚟到我同羨婷張枱到，比咗兩份menu我地。
 
  「羨婷，不如我叫咗野食先啦。」
 
  羨婷好留心咁望住阿敬佢地，完全聽唔到我叫佢，不過我知道如果我呢個時候咁再叫佢既話一定會比佢話『我而家做緊啲好重要既野呀，呢啲小事你自己決定啦。』，所以最後都係求其叫咗啲Pizza呀，焗飯之類就算數。


 
  冇幾耐之後，有另一個侍應行到佢阿敬佢地張枱面前。
 
  「先生，請問你地諗好要點咩未呢？」
 
  阿敬同小櫻佢地互相望住對方，而羨婷就喺旁邊教緊阿敬到底要點做。
 
  「小櫻你有冇話特別想食啲乜野架？」
 
  「冇架，我食乜都冇所謂既。」
 
  「咁…咁不如我幫你叫啦好唔好？」
 
  「好呀，真係唔該曬你呀。」
 


  小櫻向住阿敬佢點一下頭，然後阿敬就拎起餐牌開始講。
 
  「唔…唔…唔該我地要一個……蝦？」
 
  蝦？乜呢到有啲咁既菜色咩？我記得係就係有好多菜式，但係好似冇一樣係蝦嚟架喎。
 
 呢個時候我望一望羨婷佢部手機，我眉頭一鄒，發現事情有啲唔簡單。
 
  『你地兩個叫情侶套餐食啦。』
 
  無啦啦聽到啲咁既指示，又好難怪阿敬佢會嚇到講唔到野既。之但係阿敬佢聽完之後好似冇放棄到，反而深呼吸之後再試下講多一次。
 
  「我…我地要…要一個情…情…情侶套餐。」
 
  講完之後，小櫻變得好驚訝。


 
  「阿敬，點解你…………」
 
  「因…因為咁…咁樣好似抵啲呀嘛……」
 
  「咁…阿敬你…你決…決定啦……」
 
  呢啲咁老套既借口又點會阿敬佢自己諗出嚟先得架，唉，其實我由頭先開始心入面就有啲懷疑到底羨婷佢諗出嚟嗰啲計劃其實有冇用，聽就好似天下無敵，但係做就好似有心無力咁囉。
 
  雖然最後都比阿敬講到個借口出嚟同小櫻佢一齊食情侶套餐，之不過佢講完之後氣氛立即變得好尷尬，兩個人呆呆地望住對方，一句說話都冇再講，而且面頰就變得愈嚟愈紅，身邊好似播緊無論世事變改還是越難越…………………當然最後呢句係我自己個人感受啦……
 
  佢地兩個人之間咁尷尬既氣氛好似慢慢形成咗一個封閉空間，而且仲要呢個封閉空間仲要有擴散既跡象，慢慢擴散到佢地身邊既人……即係嗰個侍應。
 
  其實個侍應都幾可憐架，明明乜都冇做過就被迫困喺呢個封閉空間入面。結果佢就好無奈咁企喺阿敬同小櫻兩個身邊，好似除咗微笑就唔知有乜野可以做。
 


  隔咗冇幾耐之後，個侍應終於開口講野打破呢一片尷尬既氣氛。
 
  「其…其實呢………」
 
  睇嚟個侍應已經比個封閉空間嚇到而家講句野都口窒窒咁。唉，平時既話我就一定講返句『今時今日咁既服務態度點得架』，不過見你咁可憐就算數啦。
 
  「其實我地呢…呢…呢到係冇情侶套餐架…………」
 
  喊出嚟，原來呢到係冇情侶套餐既，今次阿敬佢都真係瘀過條冇夢想既咸魚啦。 不過呢……其實最瘀既點睇都唔係阿敬，而係……………
 
  「望…望…望乜野呀，我都冇睇過餐牌，我又點會知呀，反正我知道你都會幫我叫曬要食既野架啦…………」
 
  哼哼，羨婷你叫啦，就算你叫破喉嚨都唔會改變到你瘀咗既事實架啦，嘻嘻。
 
  「可惡，你喺到笑我下話……」


 
  羨婷佢隨即開始講一堆好似咒語咁既野。
 
  大件事，佢唔係諗住又用魔法下話，我一定要阻止佢先得。
 
  可惜我都未嚟得切行動既時候，羨婷佢好似已經講完嗰堆咒語，然後一臉自信咁望住我。
 
  「哼，而家咪有情侶套餐囉……」