情人節那天，我在衣櫃中找到我生命中的天使: 第十六章：放手放開所有，彼此更自由

  「食飽未呀？」
 
  「呼……食到我好飽呀，主人你點既食物全部都好好食呀。」
 
  「飽既話我地話走架啦，而家去中環嗰邊，玩一陣就差唔多要倒數。你之前唔係話要阿敬佢地坐摩天輪咩？要坐就要快啦，今日可能會好多人架。」
 
  「好嘢，有得去倒數嚕！倒數~倒數~倒數啦啦啦~」
 
  「你喺到唱咩呀？」


 
  「我自創既倒數歌囉，係唔係好好聽呢？倒數啦啦啦~~~」
 
   咁又好難怪佢會咁開心既，明明尋日喺茶餐廳我實牙實齒同佢講咗話唔會去倒數，點知搞完一大輪之後佢終於都得嘗所願，羨婷佢而家開心到仲要唱埋歌，簡直係完全沉醉咗喺佢對倒數活動既美好幻想入面。不過呢……首歌真係好難聽呀，難聽到我都唔識用文字嚟形容，只不過費時佢又唔開心，我唯有忍下啦。
 
  比完錢之後，我同羨婷佢喺餐廳門口到等小櫻同阿敬佢地出嚟，而等待既途中羨婷佢依然唱住佢首好難聽既倒數歌，幾乎投入到周圍有乜野都唔理。等咗大約五分鐘之後，終於見到阿敬佢地兩個行出嚟。
 
  「唔好意思呀，係唔係等咗好耐呀？」
 
  首先開口既係小櫻。


 
  「唔係，都係等咗一陣啫。」
 
  「呼……仲以為我地要你地喺門口到企好耐添。咦，羨婷你……」
 
  見到自己比小櫻望住既時候，羨婷被迫從佢美好既幻想世界走返嚟我地既現實世界。
 
  「你唱緊嗰首咩歌嚟架？咁怪既？」
 
  聽到之後羨婷佢成塊面變得好紅之餘亦都冇再唱歌。嘩，呢個世界終於都回復安靜啦……


 
  「算啦，唔好理首歌啦，我地都係快啲去中環啦，再唔快啲去就會好多人架啦。」
 
  「咁又係既，但係我地應該點去呀？地鐵？巴士？」
 
  「搭地鐵囉。」
 
  「好啦。」
 
  我地就係咁一路傾計一路行去地鐵站，準備搭地鐵去中環。呢個時候地鐵既人流同平時放工既時段比起嚟雖然係少好多同冇咁迫，之不過又未至於大把位任坐，我地最後就選擇企喺到繼續傾計。
 
  「嘩，你地都唔知頭先我同阿敬一齊食嗰個飯係幾大呀，如果冇阿敬既話我諗我地都要浪費食物做大曬鬼啦。」
 
  「唔…唔好咁講啦，其實小櫻你都食咗好多架。」
 


  「總之我地食得曬就最好啦。不過話時話，我地仲有幾多個站先會到呢？一…二…三……嘩，原來仲有幾個站先會到架，我都係搵個扶手借一借力先。」
 
  呢個時候，小櫻擰過頭嚟望住我。
 
  「咁既……阿傑呀……其實呢…我唔係好夠高去捉住個扶手呀，你介唔介好比我捉住你隻手當扶好呀？」
 
  其實我一直都冇刻意咁留意小櫻佢係幾高，不過而家望埋去又真係覺得唔太高，我都知道要特登企高去捉住個扶手其實都幾辛苦，既然係咁小既事，要我幫手當然冇所謂啦。
 
  「無所謂，你捉住啦，最緊要企穩呀。」
 
  「唔該你呀。」
 
  小櫻向我笑一笑之後就伸手捉住我手臂既位置，然後好自然咁企喺到繼續同我地一齊傾計。一諗到我咁簡單就可以幫到其他人，心情立即變得非常之好，嘴角亦不自覺咁向上彎起。
 
  但係好可惜，離我冇幾遠既一個女仔睇落極度唔爽……


 
  羨婷今次又有咩事呀？我都唔係比小櫻蹺住啦，而且我仲要係幫緊人呀，你作為一個天使見到我幫人唔係應該開心咩？點解而家望落仲要變到成隻魔鬼咁恐怖架………
 
  「阿傑，我都唔夠高，我都要扶住。」
 
  就喺我未嚟得切反應佢既時候羨婷已經伸手捉住我既手臂，而且力度仲要係異常咁大，搞到我隻手鬼死咁痛，隻手幾乎唔係我控制咁，而且隻手仲開始喺到震下震下咁。雖然隻手係好痛，不過我最後都選擇要忍住。
 
  呢個時候羨婷佢好似識得四川變臉咁樣，由一隻魔鬼變返做同平時一樣望落好可愛既樣。
 
  呀，仲以為佢又唔知因為乜野事而覺得唔開心添，見到佢而家變返做之前咁，睇嚟一切都係我諗多咗啫。
 
  不過事實上係我諗少咗，少年我太年輕了。
 
  羨婷向我笑完之後明顯更加用力捉住我隻手，唉……
 


  「咦，點 – 解 – 你 – 隻 – 手 – 震 – 既？ 無 – 事 – 呀 – 嘛？」
 
  唉，呢個問候根本就唔係問候囉……明明係你捉到我隻手太痛先至會震架！不過我又點講出口呀，唔通話羨婷你無啦啦用力捉我隻手咩？信我至奇呀。
 
  「冇…冇事，係架地鐵喺到震啫。」
 
  「咁就好啦，我 – 好 – 擔 – 心 – 你 – 有 – 事 – 架。」
 
  我終於理解到咩叫做『放手放開所有，彼此更自由』。
 
  「羨婷真係好關心阿傑佢喎。」
 
  「當然啦，因為冇人比我更加留意佢架嘛，嘻嘻。」
 
  噢，你講大話！我知道真正既犯人就係……你！


 
  就喺呢個時候部地鐵Chok咗一Chok咗，小櫻佢成個人挨咗落我個手臂到。望住自己隻手慢慢陷入小櫻既心口入面……唉，我已經唔敢想像羨婷同阿敬會有咩反應啦……