前傳——她遇見的第一個金牛座男孩: 她的視角概覽

「喂！飛機場！」一個高高瘦瘦既男仔叫住左行緊入課室既我。

我地既故事就係由呢到開始⋯⋯

「你叫邊個話？」我拎轉左個頭一瞪。

「你囉！包包面！」

過左咁多年啦，我都係咁記得你每句傷害我既對白⋯⋯





天蠍座嘛，哈！

唔知由幾時開始你係班group 到搵到我whatsapp，然後問我測驗既野，到日日傾計，之後message 都未夠，用埋wechat即時通話、後來夜晚打埋電話比我。

但我都未察覺你對我既意思⋯⋯

或者係我察覺到既但我一直等緊你開口⋯⋯

夏學期既我用whatsapp同你抽問書，幫你溫書既日子過得好快。





冬學期既我親手織左條頸巾比你，途中織到一大半發覺織錯左就拆晒成條再織過，雖然你台面上話唔緊要，台面下應該係唔想我辛苦再織過，但我都照做係因為我想你收到既係完美既頸巾。雖然冇親手幫你戴，但足足眼見你用左兩個冬天。

上學期既你同我玩，鬥音樂考試高分，講好左邊個低分就要送高分啲個個一份禮物，因為我當時提過下想要一個新銀包，唔知你係咪想⋯⋯？而我一心想遷就你，怕自己太高分你會唔開心，估到你要面，所以跟你一樣揀首英文歌唱。結果你84分，我83分⋯⋯但你話你冇野想買，反而話想照送個銀包比我。到最後我都話唔洗，因為我想光明正大咁收，我會更加開心。


下學期既你同幾個男同學帶我放左學去冒險樂園玩，贏左套餐具比我，我開心到跳下跳下咁，之後有次我唔小心打爛左套餐具盒，我個心碎左，你話再買過比我都得，但我難過冒既係個餐具盒對我黎講既盛載左我地一齊去玩既開心回憶。

夏學期既你去澳門玩，帶左手信比我地班幾個朋友仔，你叫我小息搵你拎，但我唔得閒，一返到課室見到個個都有手信食但我冇，所以有少少難過，話你偏心之際你竟然叫我睇一睇張檯掛書包個位，我一望就見到一個膠袋，原本入面裝住左隻士多啤梨造型既hello kitty公仔。原來你偏心既係我先啱（？）可惜當時既我未發現你既心意⋯⋯

冬學期既你有次聽到我話成日手腳冰冷，有一日小息個時你放左一個紅色既盒係我檯面。我一眼望到個盒上面有個hello kitty，隨手一開，發現一個紅色既hello kitty暖蛋，雖然我口上係嫌棄佢要用3粒AAA電池，但我個心其實好warm⋯⋯而我到依家都仲用緊。





冬學期既你聽到我話見網上話晚安係特別既意思，你就開始晚晚都同我講。因為晚安普通話拼音係wan an，可以代表wo ai ni ai ni，我地都持續左一段時間互相講晚安，只不過你會係晚安後面加一隻熊貓emoji ，係因為要提我早訓唔好做熊貓！直到我發現你同我朋友都有講，我先感覺到自己既失落。

慢慢由夏學期到冬學期我開始見到你返學個時係校門等，唔知等咩，一直唔入校門。有次我課外活動完左出校門都見到你係到等，但每次我都會扮睇唔到行開。因為我覺得如果你有心要等一個人，你就要比對方知嘛！又唔講，我點知喎哼！（到依家既我都唔知你係咪等緊我）

只係開心既時刻真係過得好快，眨下眼就過。你有一晚打比我同我講話學校要你留班一年，我個心沉左一沉，意味住我同你冇得再日對夜對。你話你會轉校，我好唔想，但又唔知點開口。結果日有所思夜有所夢地我夢見到你走左，然後我喊醒左。得知左呢件事既你應承左我話唔會走、話決定唔轉校。我鬆左口氣，你知唔知我傻到寫左半封信比校長想同你求情，當然我寫左兩行就停左啦哈哈，因為我及時知道呢件事太痴線啦！

我以後分左班分左級我地兩個都仲可以靠whatsapp聯絡，因為我（唔知係咪）仲等緊你表白嘛。結果我地漸行漸遠，可能因為大家都有各自既生活，愈黎愈少機會見到大家，whatsapp都開始冇咩點兩句。冇幾耐，我係返學校既途中，見到你係門口等緊一個女仔再一齊入校門，行係你地後面既我睇住成個過程唔知自己有咩感想⋯⋯