我有個女朋友，但我從來未見過她: 第三章
自此之後，其實我跟阿芊沒有什麼改變，
跟以前一樣，每天whatsapp對話，
不過我相對上多了找她。
即使我們算是男女朋友，但除了每天的對話，我不知道還有什麼可以做，
是我第一次拍拖，什麼也不懂？
還是我們只能到這樣？
不能相見，這相信是對每一對熱戀中的情侶最難忍受的事；
不能相見，我對這段感情雖然感到開心，但同時感覺沒有實感；
不能相見，我們還算是情侶嗎？
異地戀，也是可以透過網絡面對面談話，
我們呢？只是文字上的交流。
一段情侶可以做的事，我們卻不可以做，
我真想有一天，能夠牽著她的手，四處遊，
去哪裡也沒有所謂，重要的是她在我身邊。
明明我們住得這麼近，坐西鐵車程也不用十五分鐘，
當然前提是港鐵沒有故障吧……
我們卻不能找對方……
＊ ＊ ＊
然後，我就不停想，除了每天都找她談談天，說說愛之外，
還有什麼可以為她做。
或許送一些小禮物給她？
反正郵寄又這麼方便，更不用見面就能給她，
如果是電子形式的禮物，例如心意卡、畫等等，就更加方便了。
少少題外話，有時覺得送禮物給別人，無論是你的伴侶、朋友，還是家人，
為什麼一定要故意找一些理由呢？什麼什麼記念日、節日，
若果你見到一些你認為「他」會喜歡的東西，
不妨直接買下來送給「他」吧，
當然前提是你有空餘的金錢。
這一刻，我想送一些小禮物給阿芊，
也不是為了什麼記念日、情人節，
只是想送罷了。
但說到禮物，我還是第一次送禮物給女生，到底送些什麼好呢？
聽別人說，送給別人的第一份禮物，最好不是一些自製的，因為會令人卻步。
但我們算是情侶……沒有關係吧？
我們是由網絡小說相識的，
或者我可以寫一篇微型小說給她？
微型小說也只是2000多字的文章，
也不用花太多時間，
內容才是要點吧！
科幻小說好像沒有什麼意義似的，
不如嘗試寫愛情小說？
雖然我第一次寫愛情小說，
不過我相信來得更有意義吧？
「我地個故事完左，你有冇諗住開始寫另一個故？」有一天，她這樣問我。
「仲未喎，慢慢黎啦」其實我已經著手寫一篇愛情小說。
「死懶鬼」
「都10月尾喇，mid-term就黎，我都開始要溫下書」
「係喎，我都就統一測驗lu，我地咪見少左囉」
「車，我地幾時見過喎，不過遲Ｄ真係可能未必下下得閒覆你機喇」
「唔緊要啦，讀書要緊嘛」我決定了，要在她統測前給她這份禮物！
「係呢，你平時睇科幻小說多，有冇睇過咩愛情小說嫁？」
「都有啊，不過成日覺得好假囉」
「科幻小說咪一樣係假既」
「點同呢？」
「咁……你即係鍾意實在Ｄ既愛情故事？」
「其實我唔多睇架咋，係學校圖書館有我先睇下咋」
「講起學校圖書館，我以前中學有一堆Ｑ版特工啊、嘉薰醫生咁，你有冇睇過？」
「有啊！我學校都有……」
如果我要寫愛情小說，還是不要太「韓風」。
即是什麼車禍、失憶、生生死死有關的都不太好。
然後，我開始寫這個故事了。
故事內容並不太罕見，普普通通的一個校園戀愛故事，
特別的是，男女主角是我們的名字，就當是另一個世界的我們吧！
我閉關了兩天，終於完成了這篇文章了，
雖然我覺得這文章有很多不足之處，
但我第一次寫愛情小說來說，
還算是不錯吧？平時我又不多看愛情小說的，
能夠寫出來已經很厲害了。
「傻女，我有Ｄ野想比你」
「下？咩黎架？」
「你check email啦快Ｄ」
之後半小時，她就再沒有回覆我了，
她應該在看那篇小說吧？
「篇文你寫架？」
「係啊！覺得點啊？」
「你真係唔岩愛情小說，哈哈」
「搞錯啊……我第一次寫算唔錯嫁喇」
「你做咩冇啦啦寫愛情野既？」
「諗住送比你啊嘛」
「傻佬又話去溫書既？結果寫埋Ｄ咁既野喎，抵我獎你既」
「有咩獎先？」
「安慰獎，我呢排有套戲想睇丫，我地去睇啦」
「我地終於可以見喇？」
「到時你咪知囉」
「但你唔係話屋企唔比嫁咩？」
「唔怕既我諗」
「好野！終於有得見你喇」
「傻佬，咁開心既」
「緊係啦，知唔知我想見你好耐嫁喇」
「嘿嘿，咁星期六下午？」
「得啊！一定得！」
「咁你去買飛丫，屯市ＵＡ《ＸＸＸＸ》四點半個場」
「收到喇大人」
「咁到時見啦」
哇！我真的想不到有一天可以跟你出來！
不知道你是一個怎樣的女孩子呢？
今天是星期三，還有兩天，好期待啊！
當日穿什麼好呢？有什麼要帶呢？
我第一次和女生出街呢！
＊ ＊ ＊
「阿楓，你聽我講！阿芊終於肯同我出黎喇！」
「開心到你，肥西肥西肥西！」
「頂你啦！ 一定唔會係囉！」
「咁你地幾時出去啊？」
「星期六，去屯門睇《ＸＸＸＸ》」
「wow，我地既景哥終於拍拖喇 」
「係喇係喇，其實我有Ｄ緊張，第一次同女仔出街」
「驚咩啊？平常心，最緊要唔好比佢覺得你好悶」
「嗯，我依家買定飛先，廢事冇位揀」
很快，就到了星期六。
「你去到邊喇？」
「我就到喇，你入去等我啦 」
「咁我戲院等你」
「好啦」
「我到喇，你入去啦 」
「你係邊啊？」
「我係入面喇 」
「下？即係點？」
「你快Ｄ入場啦 」
我還是先入場吧，在裡面找她，
那我為什麼買了兩張戲票？
其實我是否被人耍了？
不會的，她不會這樣做的？
之前的一切不會是假的？
「你坐邊？我黎搵你？」我入場後，屏幕已經播送著廣告，漆黑之下在自己的位置坐下。
「唔駛搵我啦，我地就咁睇戲啦，開場lu 」
屏幕上的確開始播放電影，她確實在這裡某處。
我根本沒有心情看電影，一直在想：
其實她是否沒有想過跟我見面，她打從開始就打算這樣，
在同一所戲院，看同一套電影，
但我們不見面。
我現在，只是呆呆地坐著。
一個半小時的電影，就好像一陣子就結束了，
套電影到底說了什麼，我根本不知道，
我呆坐了一個半小時，到底為了什麼，
我亦不知道。
「套戲個結局好感人啊」完場後，阿芊whatsapp跟我說。
我沒有回覆她，或者是我根本不懂得覆她什麼。
我現在的心情，不能用一句說話就形容到出來，
巨大的失落感，就像洋蔥的外皮，
覆蓋著一層不停想湧出來的憤怒，
憤怒之下的，卻是一種無奈，以及後悔，
對我跟阿芊的關係，以及對她的承諾，感到無奈和後悔，
或許當初我不應該接受不見面的承諾，
甚至這段關係不應該開始的。
洋蔥的核心，我想……應該是我不想放棄她的心情，
即使如此，它卻被重重的外層覆蓋，不能重見天日。
我轉身直接步出戲院，回到家，回到床上，
電燈也懶得沒有開著，黑暗中的唯一光芒，
是那部我不想理會的電話，
二十多個未查看訊息，
全都是發送來自阿芊，
「阿景，你做咩野丫？」
「在嗎？」
「做咩唔應我既？」
「喂～～」
「你係咪嬲緊我？」
「係既話我講聲對唔住啦。」
「唔好嬲啦」
「你唔好唔理我啦」
還有很多很多，但最後一個，是這樣寫的：
「對唔住丫，其實我本身好期待今日可以出黎睇戲，但我冇理到你感受，我知你依家好唔開心，
或者好嬲我，係我自私，諗住大家可以唔見面之下，出黎睇場戲。我知我錯喇，你睇到呢個訊息你覆一覆我啦，
我好驚丫」
雖然我看到這訊息，但我還是沒有回覆她。
那一夜，我晚餐也沒有吃，就睡著了。
沒有未查看訊息的早上，總覺得欠缺了些什麼，
其實我為什麼不願意回覆她呢？
我在生她的氣嗎？還是沒有勇氣再受傷害呢？
我約了楓晚上出來吃飯，把整件事告訴他。
「其實你有冇諗過佢根本就玩緊你？」
「我唔敢去諗，佢之前都唔係咁既人黎。」
「之乜前姐，你都冇見過人，唔好當自己好了解佢喎。」
「我地係whatsapp傾左咁耐，佢又冇要求過我要做Ｄ乜，我唔覺得佢會係呃我。」
「或者係佢未呃姐，但你之後仲有冇搵佢？」
「冇。」
「你係諗住以後唔再搵佢？定係唔敢搵佢咋？」
「我唔知。」
「如果你係以後唔搵佢，你就直接block左佢，Delete哂Ｄ對話記錄」
「但係我……唔想」
「但我都係建議你搵佢傾多次，或者佢真係有咩原因先咁做呢？雖然我依家覺得佢講既野乜都唔可信嫁喇，不過搵唔搵佢你決定啦。」
「芊」聽完阿楓的說話，我決定找一次阿芊。
「你終於肯應我喇？你係咪仲嬲緊我丫？ 唔好嬲啦」
「我只係想搞清楚件事，點解你嗰日要咁做啊？點解你唔可以出黎見我？」
「我……唔想講……但我真係有苦衷嫁，對唔住丫 」
「咁係咩苦衷？」
「我唔想講」
「即係你根本就冇信過我啦」
「唔係丫！我只係怕……一開始我講過我地唔可以見面，你接受左架，點解依家先咁講喎！」
「因為我唔想冇左你囉！」這句話，是發自我內心的。
「我都係丫，但如果你真係唔可以接受咁既我……不如我地都係……」
畢竟我們只是網戀，我不認識你，你不認識我，分手又有何所謂？
這句話我差點兒衝口而出，這雖然真的是事實，但絕對不是我所想的。
網戀又如何，我在這段關係很快樂，因為有了她，我生活改變了，我根本不希望就此完結。
「不如我地都係冷靜下先，我唔想呢段關係咁輕易就完，但呢刻我原諒到你，我都原諒唔到自己。」
「嗯……咁好啦。」
「三日！三日我地唔好搵對方。就咁啦！」
「嗯」
這三天，星期一、二、三，我照常上課，
一直在想，沒有了她，最多是有些不習慣罷了，
三天的時間，或者我可以回到以前，未認識她之前，毒撚的生活。
但任何事一旦改變了，想回復與過去一樣，談何容易。
毒撚的生活……你真的想繼續這樣下去嗎？
這三天，我回想過去由認識她，直到現在所發生的事，
為何我當初不想她離開？為何我會選擇會她一起？
為何我會願意即使作為她的男朋友，也答應永不見面？
所謂網戀，難道真的只存在於虛擬的世界？
我覺得不是，「她」確確實實在影響我的現實，
更應該說，「她」是我的現實。
這三天，我重拾了當初和她一起的心情，
不見面又如何？我只是不想她離開我的生活。
(可能我已經走入了歪路，但我不在意)
「芊，對唔住啊，或者我之前都有Ｄ過火」
「你知唔知我呢三日，一直好驚你唔會再理我，如果你以後唔理我點算丫 」
「依家咪搵番你囉」
「不過件事我真係做錯左，我以後唔會架喇」
「即係下次你唔會再約我喇？」
「會丫！你肯既話，但我地都唔會見架喎 」
「唔緊要啦，不過我希望有一日你都會肯講點解你唔肯見我」
「我都希望有呢一日啦」
「點知原來你係男人黎既」
「我真係女仔黎架！ 」
「你咁答仲可疑喎」
「都話唔係囉！ 」
「唔係女仔？」
「唔同你講野喇！」
「講笑咋，咪嬲啦」
這件事也算是告一段落了……
＊ ＊ ＊
過了一個月多，我和她保持著每天的對話，但到現在為此也沒有再出去了，
出來卻不見面，其實做不到什麼，也沒有意義。
或者她不敢再約我，即使我說不介意，但她怕我內心會介意而不敢開口吧。
結果這一個月，我們只靠著電話聯絡了。
至於我和她在談什麼話題，在這裡也不重要了，重要的是她還在我身邊。
時間去到十二月，除了考試之外，就當然是聖誕節吧。
過去十幾年的聖誕節都是一個人過，今年終於有點不同了，
不同的是我『身邊』多了一個人。
講到聖誕節，聖誕禮物就當然不能缺少吧，同時也是一個好機會再約她出來。
不過今次，我不再強求見到她了。
「聖誕假不如搵日出黎啦，好似上次咁。」
「好丫，但係有啲咩可以做？ 」
「係囉，最近有冇咩好戲睇啊？一係都係睇戲囉，你唔介意既話」
「你肯陪我出黎又點會介意呢 」
「咁不如睇《XXXXXX》啦」
「唔係鬼片就得喇 」
「咦？你驚睇鬼片嫁？」
「邊個話我驚姐 」
「咁我地去睇鬼片啦」
「唔好丫，係我錯喇 」
「咁《XXXXXX》冇異議啦」
「好啦 」
然後我們就約好了平安夜晚上去戲院，
灰姑娘要在十二點前回家，
所以我們就不能一起倒數了。
雖然有點失望，但這都是意料中事。
其實出不出來也不是我最在意的，
我最希望的是可以送一份聖誕禮物給她。
送什麼聖誕禮物給她……我可是想了很久，
上次就……還是不要提了。
今次或者送一些DIY的東西給她吧？
我覺得送禮物來說，心意是最重要的，
如果對象是你熟識的人，DIY就最好的，當然也看對方喜不喜歡吧
不熟識的就買會比較好，這是我的見解，
各人也有各人的做法。
我的手工其實不算是太好，
而且自中學以來就再沒有接觸過有關手工的東西。
我想……摺紙星星我可以處理到吧……
或者可以在紙背後寫字，這樣可以嗎？
送給女朋友的禮物，這樣不算太過火吧？
當天如何把禮物送給她，可是一個大難題，
我想過電影完場後，放在自己的椅子下，
或者是把禮物交托給職員，
然後讓她自己拿走。
我真的是一個不懂浪漫的，又未試過拍拖的男生，
我想……把禮物交到她的手上，就可以了，
根本沒有想過用什麼方法送禮物給她，她會更開心。
「我入左場喇，你到左喇？」
「未丫，就到喇 」
「慢慢啦，都仲未開場」
「跑緊黎喇 」
「你又係既，又會出街唔記得拎銀包咁大頭蝦既」
「仲好講 ，因為掛住同你whatsapp囉，淨係拎左電話出黎咋」
「仲趕得切既，唔駛咁急」
「唔得丫，如果我太遲入黎，你咪見到我囉 」
「傻女黎既，咁鬼黑，鬼睇到你咩」
「總之唔得啦！ 」
「咁你要快Ｄ喇」
「係喇，我有Ｄ野想比你，完場個陣我放係凳下面，你過黎拎啦」
「咁你坐邊丫？ 」
「完場先同你講，唔係你咪知我係邊囉」
「抄我？唔比我見你 」
「唔得咩？」
電影快開始了，我把電話調至震動模式，也調暗了。
播放期間，我們沒有再對話了，免得影響到其他人。
直到最後的一幕……
螢幕中放映著飄雪中的深夜，一對男女在街上對話。
「You accepted me for who I am, and not for what you wanted me to be。」
男人聽見後，眼泛淚光地笑了，從心而發地笑了。
「I just wanted you to be happy。 That's all。」男人最後認真地吐出唯一一句話。
電影到這裡亦差不多落幕了
電話彈出一個whatsapp訊息，訊息內容正是剛剛電影的一句對白：
「You accepted me for who I am, and not for what you wanted me to be。」
意思大約是：你接受了現在的我，而不是你想要的我
我失落地望著旁邊的空椅子，決心回覆了以下一句：
「我幾時先可以見到你？」
我並沒有收到她的回應，最後我還是說了另一句：
「係喇，我坐F14啊，你等陣過黎拎份野啦，我用紙袋裝住既」
「你唔好呃我喎！ 」
「我點會呃你呢？你咪見我走左你先好過黎囉」
電影落幕的一刻，我便直接踏上歸家的路途，頭也不回。
「下？咁你就真係走左嫁喇？」
我把昨日的事一五一十告訴給楓聽。
「唔係點啊？如果佢見到我咪死。」
「你可以偷偷咁望下邊個拎左你份禮物嘛，你唔想知個女仔咩樣咩？定係你怕真人好大出入啊？」
「唔係，已經唔重要喇。」
「咁佢收左你份禮物，有冇咩反應啊？」
「有啊，佢淨係講左句多謝咋。」
「咁咋？」
「係」
「算啦，飲啦！」
「飲？飲咩？」
「啤酒啊！唔通橙汁咩？」
阿楓從膠袋拿了數罐啤酒出來，跟他出來傾訴一下、喝兩罐啤酒，心情輕鬆多了。
偷偷地望下她，你猜我沒有想過嗎？
我只是害怕，一旦給她發現，我們就到此為止了。
＊ ＊ ＊
「你就黎生日喇喎，有乜搞？」時間推至一月尾，阿楓問。
「毒撚邊有人約嫁？」
「你聖誕節又冇得同佢過，生日都唔得？」
「都冇計嫁，佢唔肯見我就係唔肯」
「咁你真係打算一世唔見佢？」
「有冇一世都唔知」
「咁乜咁灰？」
「冇啊，不過可能已經習慣左咁既相處方式」
「我問你，除左我，你有冇同其他人講你拍緊拖？」
「咁又冇喎，做咩咁問？你想hehe？我地冇可能嫁」
「你收啦！咁如果有人問你，你敢唔敢同人講你女朋友係網上識既，仲要係未見過面既？」
「我諗我唔會講」
「點解？」
「其實係同你熟先有同你講」
「網上識既就唔怕同人講，不過未見過見既女朋友……我係你都唔敢同人講。」
「做咩一定要同人講？我覺得開心咪得囉」
「比喻黎姐，我係問緊你個心態，係咪真係接受到之後一直都唔見面。你唔敢同人講，代表你心中都仲係有條刺。仲有，你真係開心咩？」
「見唔到的確係有種遺憾，但我覺得我開心……掛」
「我相信你見到佢一定會更加開心」
「或者啦，但我唔想再諗喇」
「算啦，你自己好好諗下我講過Ｄ乜啦，但你生日，約埋班友出黎食餐飯啦，好唔好？」
他這裡是以前中學的一班機友。
「好囉，你約啦」
「咁我問下佢地先」
「好」
我本身心意已決，打算以後都不會見阿芊，
但或許阿楓說得對，我心中的確有條刺。
又或者我一直在欺騙自己，說不想見她，
其實又怎會不想呢？
不過現在才說這些，不是太遲了嗎？
如果現在偷偷地見她，這不是一種背叛嗎？
還是……我背叛了自己的心呢？
「楓，或者你講得岩，我想見佢」
「咁你咪約人囉」
「我約佢見面就一定唔肯，我想你幫下我」
「點幫？」
「你咪係cafe番緊part time既，我想叫佢去搵你，話我有Ｄ野托你交比佢」
「你就坐係到等佢出現？」
「聰明」
「你蠢姐，但佢唔會懷疑咩？」
「應該唔會掛……之前係戲院都送過野比佢」
「得既，反正打工既又得我一個既」
「咁我約佢，就夾埋你番工時間啦」
「希望佢真係唔係肥婆啦」
「你好喇喎，次次都咁講你悶唔悶嫁？」
結果，我順利約了她星期五，我生日前夕出來，
生日、知道有間不錯的cafe，這都只是借口。
對我來說，這是一場賭博，到底我會得到一切，還是失去一切，
就在那一天決定了。
下午六時，我已經坐在cafe，等待她放學過來，
一個人在cafe坐幾個小時不是罕見的事，也不顯得奇怪，
這可能也是她願意過來的原因吧？
事實上這間cafe頗多人的，我見到阿楓忙得不可開交。
「你黎到記得要試下呢到Ｄcake，真係幾好味嫁」
「好丫，今晚睇黎食唔到咁多飯lu 」
「你到邊喇？」
「就到喇，應該係呢度？」
門口不停有人出出入入，所以根本分不出誰是阿芊，
幸好，我有阿楓這個好幫手。
「係喇，我比左Ｄ野比個waiter，我走左之後你記得搵佢拎喎」
「次次出黎都有禮物收既？唔駛啦下次 」
希望真的還有下次吧……其實這次是沒有禮物的，
如果要說，「見面」就是我給你的禮物。
然後，我們就在同一間cafe下，坐了半小時。
「我都差唔多要走喇」
「係丫？咁我都走喇，不過你走先 」
「哦，咁我走喇，你記得搵waiter拎野」當然我沒有離開，只是繼續坐，等待阿楓的指示。
「知喇 」
我繼續等，五分鐘、十分鐘，還沒有見到阿楓有任何指示，
阿芊是走了嗎？還是安全起見，多等一會兒才走？
我視線沒有離開過阿楓，只要一刻收到阿楓的指示，我就可以見到她了。
再等了五分鐘，阿楓走向一個女生前面，
是一個戴著紅色框眼鏡、黑色長直髮、臉圓圓的女生，
上身穿著白色T-shirt，外面披著黑色長袖外套。
女生給阿楓看一看電話螢幕，
阿楓忽然望一望我，打了個眼色，
是她嗎？
就是她嗎？
她就是阿芊嗎？
她望著阿楓，然後再望了我一眼，
好似知道了發生什麼事，
馬上拔腳就跑。
「阿楓，我遲Ｄ比番錢你！」我也追了上去。
「哦！」
我立刻跑上前，捉住她的手
「阿芊，終於可以見到你喇！」
她表情非常驚訝，一時未能反應過來
「點解你一直唔肯見我啊？你知唔知我好想見你，我真係好想見到你嫁！」
她拼命掙開我的手，頭一直向下望，就好似不想讓我看到她一樣。
「點解你唔出聲啊？你應下我啦？點解要走啊？」
她目前只有掙開我的想法，旁人也開始注視我們了，但我決不放棄，放棄了這次機會，就不會有下次。
雖然她低著頭，但我看到她眼淚開始湧出眼眶，只想離開這裡，離開我的身邊。
她想叫喊，卻沒有發聲，這一刻，我才注意到她一直不想見我的原因。
「你……其實係咪講唔到野嫁？」
我是否不應該問這句話呢？她聽到這句後，抬頭望一下我，她的眼很紅、很紅，淚水已經不停劃過她的臉。
我手鬆開了，她掙脫了，離開了。離開了戲院，離開了我的身邊，離開了我的生活。
在這一刻，我只聽到自己心中不停的叫喊：
「追佢啦！做咩唔追啊！你唔係一直想見佢既咩？你依家唔追，以後都見唔番佢！動啦！跑啦！」
可惜，我就是跑不動，我也不知為什麼，總之我就是跑不了。
或者，我根本不應跑出來見她的。
－第三章完－