不能愛上的星級女神2: 粉絲聚會

我、Candice和若嵐的劇集劇情接近到尾聲，劇集開始以來，一直引起不少迴響，再加上李思晴那些「針對性」報道，現在我只要在街上走，幾乎也會引來目光和手機鏡頭。我們三人的感情生活幾乎也是焦點，只是因為有May姐詩姐把關，幾乎也安全。但我和Hilary的緋聞始終還是蓋不住，連上次在貓仔和李思晴面前接吻，也有人放文字上討論區議論，令我形象變得「亦正亦邪」。

今天是結局篇第一晚，貓仔邀請我參加粉絲團聚會，一起看劇集。「瑾瑜！…」「好靚仔啊！…」「向瑾瑜我哋永遠支持你…」…每次看到這班為我打氣的粉絲們，總是有種無形的高興和滿意，亦充滿正能量。他們在明星的心目中是一種特別的存在，亦算是動力的一種，所以我一直也很享受、亦很感恩。他們精心為我準備很多應援物品，我亦叫程心買來不少酒店西餅甜品給他們。
在觀看劇集時，到我出場的場口他們也會特別用心看，甚至會cap圖等等。我和程心坐在貓仔旁邊，她亦邊吃邊看，非常專心。
「瑾瑜你要加油…」「你要休息多啲…」「瑾瑜，唔好理啲人點寫你，做好自己就得，我哋會支持你！」「我哋期待你嘅新戲啊！…」…
「多謝晒你地！好感恩有你哋支持！我會繼續努力。」我道謝著。

聚會完結，我和程心先離開時，貓仔走到停車場找我。
「瑾瑜，我…有啲嘢想問你。」程心見狀便主動自己去乘車，我負責駕駛，貓仔坐在副駕座。大概駕了幾分鍾，她打破沉默：「Hilary…有冇同你講過我同佢嘅事？」她居然會這樣說，看來她們之間真的不簡單。我選擇了用一種比較套路的方式反問：「你係咪有咩想同我講？」
「其實佢以前唔係咁㗎…」她的語氣和當日重遇關語芯有點相似，有一種被舊日羈絆的感覺。她繼續說：「我同佢由小學已經開始識，小學中學都係同一間。佢係學覇又係風紀隊長，中學都係女籃隊長，其實係嗰陣時我同佢…」她望了我一眼，有點尷尬，我瞬間懂了：「我明白，放心。」她忽然就淚崩了，開始怪責自己：「如果嗰陣我冇走咗去，無論佢發生咩事，我都留喺佢身邊，或者佢……」




「件事都過咗去，返唔到轉頭。」
「嗰陣太細，我淨係識逃避，我以為件事淡咗就冇事。當我畢業返嚟，喺個電視機度見到佢，我知道係佢想我每次見到佢就內疚一次，佢的確做到。咁多年來因為佢，我連拖都唔想拍，亦都唔夠膽再鍾意女仔。」她是這麼坦白，補充：「自從做咗你001之後，我總係有個預感有機會兜口兜面撞返佢，結果就真係……原來我見返佢之後，個心一啲都唔平靜，所有嘢仲係好似尋日啱啱發生咁。」

我找了個海旁可以泊車的位置，把車停低一旁，給她遞紙巾。「隔咗咁耐，原來我仲未知應該點面對佢。」她再次伏在我肩上，淚濕了我衣。
「其實你有冇諗過，同佢傾下？」我問，她回答：「其實我同佢之間已經返唔到轉頭，件事對佢傷害好大，我知佢好唔容易先可以過到，我冇資格求原諒。」我認真地望向她，反問她：「你對而家嘅關語芯有幾了解？」她沉默了，我歎了一口氣：「用我嘅主觀角度睇，佢放棄晒全世界、包括佢自己。佢唔信人、極度保護自己，但冰封三尺非一日之寒，我敢講，佢或者可能咁多年來都冇處理過自己嘅情緒。」她聽完，再次淚流滿面。
「我唔知我嘅感覺有幾成準，或者可能全部嘢都係佢扮出嚟。」我告訴她我的想法。
「唔知…你嘅細心係咪就係佢同我都中意你嘅原因？」她望向我的眼神有點曖昧、又有點複雜，她補充：「但係隔咗咁多年，我仲睇得出，佢錫你嘅時候，嗰個眼神都係真誠嘅眼神。」
「唔會掛？佢喎？」我輕蔑一笑。
「我同佢果陣一齊咗4年，係佢教我點睇一個人嘅眼神。」她彷彿也在重演關語芯吻我前的眼神。
「但係我想話你知，佢其實唔係我女朋友。」經過她這麼真誠的對話，我對她坦白說。但她彷彿已經知道答案一樣，微笑着：「我估到。特別係你講完你嘅角度之後，我覺得佢唔係你鍾意嗰type…」她又低頭壓低聲線補充：「我、佢、同李思晴，都唔係。」她再次對我對望，互相禮貌的微笑。





「乜鍾意一個人嘅眼神，真係咁明顯？」我好奇問。她點點頭，居然拿出手機播出昨天我和若嵐那個shot：「你同萬若嵐之間應該係有感情，但係…」她快轉到我和Candice的對望，再說：「你同朱浩婷嘅眼神，多咗種真感覺。」她先「戴頭盔」：「當然，可能只係劇情需要，不過，我舉個例子啫。」我終於找到她和Hilary相似的地方，她們皆有可以在眼神中看穿一個人的能力，在她們面前，心中想法無處可逃。
「有件事，我可唔可以問吓你意見？」我主動問她。