辛言辛言辛言辛

題一︰造人

事先聲明，呢個題目唔好帶到宗教或者神話層面，因為立即唔駛討論。

科學家話，世間所有萬物都係由各種化學元素組成，人都一樣。

咁假如可以將組成一個人嘅所有化學元素都集齊，又可以將所有化學元素都正確組合砌返做一個人，咁呢個人係咪就會識行識走識思考識長大？

我認為唔係，呢個應該只會係一個唔識郁嘅軀殼。但有人可能講人之所以曉郁，係因為大腦運作，大腦係有微電流，咁係咪只要用適當嘅電流刺激，令個腦運作，咁呢個軀殼就會成為真正嘅人，會行會走會思考會長大？





我都認為唔係，我覺得係無效果，因為無咗個靈魂。咁靈魂嘅化學元素係乜？唔知，因為睇唔到摸唔到，就算睇到摸到分析到，咁靈魂係咪又真係可以人工合成到呢？我諗都無乜可能。

咁係咪即係科學吹到話所有嘢都係由化學元素組成係吹大咗？實際上有啲嘢係科學都解釋唔到？

唔係，其實科學家有個講法嘅，不過個講法都幾唔科學，佢哋話生命嘅出現，係喺好多個偶然之下誕生。

假如真係咁，係咪只要我哋可以將所有嘅偶然都喺正確嘅時機重現一次，就可以創造出生命？

或者啦，不過最近我有個見解，純粹科學，無關宗教同神話。





人，會唔會其實真係另一個物種做出嚟嘅高級AI？睇返而家發展，真係有啲似。你唔好問另一個物種係邊個造出嚟，我哋解決咗人類先。

如果人真係高級AI，又好似所有嘢都即刻講得通哂。AI可以控制機體郁動，識自我學習，能夠基於所學去思考同創造，更加識得將所學所得傳承落去。至於衰老同死亡，大概係另一個物種畀我哋嘅限制，為免我哋威脅到佢哋。

所以我哋而家發展緊AI，其實就係造人，所謂嘅靈魂或者生命，其實就係AI。

你覺得呢？