迷途天堂 I -天上人間: 第十章

楊祭司:「佢就係今次我哋反間行動嘅功臣之一！佢叫莫健希。」
受到祭司的介紹，人子緩緩走到我面前，這裏是黑沙離岸山區草叢的正中央，正是瑰麗村所在地址，我在其中一幢簡陋的磚屋被接見。
人子流着長長烏黑的秀髮，用滿面鬍子而肥胖的臉孔面對着我，說:「你就是阿希喇？……你同警方有咩關係？……」
我愕了然，不知說些什麼才好……。
楊祭司:「答喇……做咩人子問你問題你唔答呀？」
人子:「呵……呵，講笑啫，唔駛咁認真……，係呢，阿希，你入咗我哋教會幾耐？……聽講你入咗嚟唔係好耐就立咗呢個大功，果然青出於藍……。」
我:「我…入咗嚟教會半年倒。……我只不過…只不過做作為教會一份子嘅份內事啫，我唔刻意呢次會立咩功勞……人子你過獎喇。」
 
人子對我說:「我提升你做團長，你意下如何？」
我:「我……我唔得㗎，我冇你哋想像中咁投入教會！……或者我中途離場呢，咁你哋咪花咗啲時間喺我度白費？對於你哋或者我自己都唔值得……」




楊祭司:「我哋都搭埋同一條船囉，做咩仲要分你我呢？……嗰條差佬嘅死你都有份嘅，我哋已經係自己友嚟喇！」
聽到這話，我心中有些激動，但這環境下不可宣洩出來，收起心情我便問:「點解你哋非要殺死嗰個差佬不可？」
楊祭司:「至於條差佬，我哋想一擊即中，要剿滅從外在影響我哋嘅一切勢力，故此……我哋一不做二不休，一次過處理晒所有問題，不外乎用啲手段命中對方話事人，咁就可以一了百了喇。」
 
我們警方低估了這個教的權計，他們似乎十分之深謀遠慮。
我又問:「咁點解淨係提升我？曾善瑤都有份執行任務，點解唔升埋阿瑤？……」
楊祭司:「阿瑤已經再唔係聖女嚟，佢已經被貶為一般信徒嘅身份，不得再親近人子，所以我哋不因佢嘅功勞而畀佢榮升團長一職。」
 
我應該怎樣做好呢？身為警務人員的我，為警隊服務該採取主動才對，有被提升成團長此職級的機會，其實是深入敵陣的好契機，爭取會社高層人員和人子的信任，方可進至較有利位置，收集可靠情報進行有效間諜活動，抱持將整個教會被一網打盡的願望為己任。
可是自江sir出事以後，我只覺一層黑煙籠罩住頭腦，心緒感覺萬般不寧，思想混亂幾近迷糊狀態。我發覺自己開始有點害怕，……害怕繼續調查下去，事件會導致多少人員或身邊重要的人無辜受害？雖然我亦已置生死於度外，可是我所珍重和顧及的家人和警隊戰友會有什麼後果？……想到這裏，我覺得這是我走上這條臥底之路中最脆弱的一環，我很怯懦接受這次人子給我的提攜而帶來的可能禍害。




奈何地，再想深一點，為了把我弟弟的自殺案件查個水落石出，我得要鋌而走險，似乎這次接受職銜的升級是在所難免了！
 
楊祭司:「嗱……Kenny，你聽住……身為未來團長嘅你，要好好記熟晒我會最神聖嘅教義，同埋各團員嘅身世來歷……」
祭司轉身從後面的木桌上拿起一個公文袋交在我手裏，然後說:「呢度有疊資料，係團員名單及各人嘅詳盡身份記錄，麻煩你好好熟讀一下佢……記住……睇真啲，每頁同我睇。」楊祭司說完話後雙眼望一望人子，然後微微點了一下頭，我不以為意，當中是否有詐？
人子:「莫健希……你就好好做呢個團長喇，……你打開啲資料…睇下有冇問題？……嘿……」
當我慢慢打開公文袋時，裏面果然有兩份文件藏着，用文件匣有條理地分類起來。好奇之下，我取了它們出來，想着看看內裏寫的是什麼內容，似乎可作搜證之用，但在還未從袋裏抽出文件前，我卻發現當中的一頁紙內藏着一些似是現金的東西，袋內的文件其實很單薄，最豐厚的是飽滿一袋的一千元紙幣，成堆成堆的，看見了這麼多錢，我雙眼張開，眼珠凸出，然後心裏問自己，為何他們給我錢？
楊祭司:「阿希……唔係，應該叫你莫sir……搭我哋條船會有好多好處……」
袋裏頭有二十萬。
楊祭司繼續對我說:「我哋負責掌舵撐船，你做搭客，放心喺我哋條船度揾食喎，……你要做嘅就只需要幫我哋收取情報，當本會嘅一條誘針，潛入警隊裏面，幫我哋睇水，等我哋稍為足以防範警方嘅下一步行動，更多更多嘅好處陸續來到你手中呀……」
人子:「莫sir……呢度就當係我同你初遇嘅見面禮，一點心意好嘛？……嘿……」




楊祭司:「莫健希，莫sir，我諗你識得點揀㗎喇？……」
我啞口無言，驚訝他們已識破自己警員的身份，但知道江sir是警方臥底的接頭人，相信他們有心追查亦會查到我頭上來，我經常和江sir的見面，他們亦會掌握多少線索，我呆站在那裏，想不出說話來應對。
我:「既然你哋知我身份，仲畀咁多錢我？……咁係賄賂公務人員……」
人子:「教會內知道你身份嘅人唔多，就只有我同楊祭司，你不妨放心收咗筆錢佢……我哋……好需要你嘅加入。」
楊祭司:「你係聰明人嚟㗎？……更何況，我哋掌握到你最唔捨得傷害嘅嘢……知嘛……如果阿瑤有咩不測，我睇你都唔好過……」
人子:「呢樣嘢最為關鍵……嘿嘿……。」
楊祭司:「莫sir……莫sir……你心愛嘅女人喺我哋掌控之下，如果你有咩依郁，我哋亦隨時可以叫執行師下格殺令，你都唔想曾善瑤有危險㗎？」
我:「我唔會畀佢落入你哋奸計裏面！……我一定會將佢救出嚟！」
人子:「想得真美……」
楊祭司:「乜你以為憑你可以改變人子對社員嘅影響力咩？……人子喺每個教徒嘅心目中所佔地位，入心入肺，你估你可以點阻止？眾人對佢嘅愛戴，你唔駛咁幼稚想話救出曾善瑤，佢都唔願意你去救……」
人子:「所有教徒都會順從我天道人子嘅意願，要佢生就生、要佢死就死……無人對下達嘅使命抗拒！……你要好好了解呢點至好……嘿嘿……。莫sir，路係由人闖出嚟嘅，但路有易行有難行，你明我意思嘛？……你最好諗清楚點樣走落去，邊條路適合闖，邊條掘頭路，顯而易見。」
 
其實當楊祭司和人子知道我的警員身份後應該也一併將我解決才是，可是我又想，可能因想借用我對警方進行反間計，所以沒有加害於我，他們想收買我成為為他們進入警隊內當臥底的線人，將計就計，用我的警隊臥底身份反串成為助他們工作的反間者。
楊祭司:「你幫我哋做嘢，阿瑤就係你㗎喇……你好好想清楚。」
我其實心裏很明白，根本從未有過半點猶豫，我是絶不會與他們同流合污的，我心裏有股激烈的情緒蠢蠢欲動，我打從一開始已決意一定要為江sir報這個仇！