一覺睡醒，發現阿爸變成女人: Ch.8

「我無你咁大愛。」我與阿爸恩怨情仇，非一時三刻種下，亦非阿媽三言兩語能解決。 

這根刺，一旦種下，就無法拔除。

 阿媽長歎一聲，緩緩開口：「佢咁大個人，都應該學識自己面對。」出乎意料地，她居然放棄遊說，放任不管。

 「你唔係要我幫咩？」我不解。

 「你唔想幫，我迫你都無用。其實你兩個一樣咁固執，決定咗嘅事，邊個講都無用。」





 「只不過⋯⋯」話未說完，她戛然站起身，引領我走出房間，突兀轉話題：「宗仔你肚唔肚餓？」 

「唔肚餓 ⋯⋯你要走？」本想追問幫助阿爸方法，可阿媽突如其來提問，讓我再次意識到，自己將承受多次離別痛苦。霎時間，不捨情感湧上心頭。 

「我想試吓個飯咩味。」 

「我幫你整翻熱。」見她未有拒絕，我便動身走出房間。剛才只顧相認，幾乎忘記有雞飯及豬頸肉作早餐。

 阿媽則跟隨我身後，雙手插腰說：「呢度咁污糟，一睇就知你哋求其掃兩下就算，啲角落頭鋪曬塵，睇到好唔順眼，想走都唔得。」





 聽罷，我不禁尷尬一笑，每次打掃清潔，均待到無法忍受，才敷衍掃幾下，只求眼不見為淨，可以走路通過就夠。 

這些生活習慣，她竟一眼看出。 

「我幫你手？」我心虛問。

 「欸洗乜啊，你幫手諗定今晚食咩就得。」阿媽賣力打掃着。儘管身軀為阿爸，身體語言依然沒法騙人。 

「今晚？」





 「我可以煮埋晚飯先走。」她背對着我，那背景顯得份外蒼老，「之後就無得再翻嚟。」 

「之後，你要去邊？」剛才只顧沉醉過去，卻未有了解阿媽這兩年去向。我好奇，所謂投胎轉世，又是否真實存在？

 「去翻屬於我嘅地方。」她說得隱晦，「你呢兩年⋯⋯過得開唔開心？」我問。

 阿媽轉身望向我，淺笑着：「唔洗再訓喺床，可以去邊就去邊，緊係開心。」自患癌後，她甚少露出笑容，就算嘴角勾起一抹微笑，也只不過苦中作樂。

 如今，她的笑容，確實由心而發，笑得輕鬆自在。 

「咁就好。」我放下心頭大石，慶幸阿媽過得安好，無需承受痛苦。 

「咁宗仔你呢？」此話一出，如同靈魂拷問般，思緒開始遊走，閃現各時期生活碎片。 

大學時段，與朋友通宵玩樂，笑得合不攏嘴，生活無憂無慮。鏡頭一轉，定格於上班時間，克制地閉上嘴，忍受上司及客戶無理取鬧，苦等時間流逝。 





戛然，畫風突變，來到深夜時分，一個人哭得死去活來，沉醉昔日美好、懊悔自己過失，卻享受獨處、絕無僅有的熱水浴時間。 

「都Ok。」我滿口塞滿雞飯，口齒不清回應着。

 不知從何開始，我習慣以「Ok」回應對方。 OK一詞，看似中性，易於接受。實際耐人尋味，間乎好壞之間，要對方猜測，卻又站於不敗之地，沒得失任何人。 

有些真相，無須執着，模糊帶過，皆大歡喜。

 「每次你哋諗起我，其實我都會知。」 阿媽緩緩站起來，悠閒伸着懶腰，再一下子攤坐椅上，以懶散語氣說：「宗仔，今日就咩都唔好諗，開開心心咁過，OK？」

 「唔Ok都要OK。」她半命令補充道，我一如既往，卻由衷回應：「OK。」 

「唔？個飯幾好食，係啲米濕咗啲，但真係阿媽煮開隻味。」阿媽評論着，表現得像是第一次品嘗般，「豬頸肉幾脆，難得無煮燶。」她繼續喃喃自語。 





「你頭先無試味？」 

「欸頭先掛住講嘢，邊有時間。」 我似懂非懂點頭，邊吃飯邊閒話家常。彼此下意識地避開沉重話題，盡力把握每分每秒，記住每一相處時刻。 

「蒸水蛋、薯仔炆雞翼、炒菜心，紅蘿蔔粟米湯。」幾番掙扎，我終於揀好今晚菜式。即使到餐廳酒樓，仍無阿媽所煮的味道，總覺得缺乏甚麼。