簡介
東拼西湊嘅散文，集成一篇連載小說。
東拼西湊愛情故事
| 作者 | 靛藍男孩 |
|---|---|
| 類型 | 愛情 |
| 狀態 | 未完結 |
| 更新日期 | 11-04-2024 23:03 |
| 文章字數 | 1916 |
| 點擊次數 | 68 |
我坐係窗台，望住出面個天，輕輕遮住個月亮嗰嚿雲突然間光著下，一條紫色嘅光將個天劈開 ，正當我未反應得切嘅時候暴力嘅雷聲已經充滿咗成間屋，空無一人嘅房間亦都因為暴力嘅雷聲繼續震動，係黃昏嘅時間下，呢一種聲音令到本身空洞嘅屋企更加孤寂。
WhatsApp 聲
葉杏童 18:48 煮咗飯未 未煮嘅話我嗌外賣
佢係我住係隔離屋嘅一個女仔，不過因為佢屋企人同我屋企人一樣長期唔喺香港，所以我哋成日都一齊食飯，做功課咁
我 18:49 未 仲有好多功課唔想煮
葉杏童 18:49 我想食譚 照舊？
我 18:49 係
可能你會話，點解我哋嘅whatsapp對話都係咁平淡。冇emoji，冇語氣詞，就連有時見到對方嘅whatsapp連覆都唔想覆。
我都唔知，明明又中學開始阿爸阿媽同家姐過咗去英國之後，每日對住嘅都係佢，但係我哋嘅生活都一直係咁平淡。但係如果，我話真係如果呢個人，突然間喺我嘅生命之中消失，我又會點樣呢？
而我哋嘅關係究竟係鄰居，朋友，定係兄妹？
一陣開門嘅鎖匙send打亂咗我嘅思想啊童攞住兩袋外賣入嚟。
「過橋米線 茄湯三小 走腩 唔忍嘢」
「你去洗個手先」
唔明點解，佢梗係成日唔記得攞張紙巾墊住撳𨋢，唔提佢洗手，佢又會食哂啲菌落肚
我放低支筆，走入去廁所洗洗隻手
啊童佢Fing咗兩下水就準備走出嚟
「喂」
我捉住佢隻手喺度聞
「落梘」
「妖」 佢反咗下白眼
呢個女人，成日洗手又唔落梘，疫情之下佢冇咗我提佢嘅話，都唔知佢仲有冇命。
洗完手之後，我打開雪櫃，冰冷嘅汽水罐將我手上嘅熱力一次過吸走，喺我身後嘅阿童，攞走咗我隻杯
「做乜鬼呀你」
「講咗幾多次，夜晚唔好飲可樂，會肥」
「頂，你同我一樣bmi，都係過瘦...」
「你仲好意思講，琴晚又飲今晚又飲，嚟緊下個禮拜三比賽你想輸」
「都冇得出㗎喇」
我有一個奇怪嘅習慣，就係汽水一定要加冰底，加冰底嘅汽水，先至可以將佢入面嘅氣泡成為主角，冇冰底嘅凍汽水，對我嚟講，就好似唔凍嘅啤酒咁，飲嚟都嘥氣。
佢攞咗我隻杯呢個動作，就等於剝奪咗我飲汽水嘅權利，不過喺咁多次歷史嘅先例入面，我都未試過拗贏佢，只可以乖乖地將罐汽水放番入雪櫃。
「咩冇得出，你仲好意思講！我陪你練咗咁耐你而家先唔出！」
「唉」 我坐低係飯枱度，打開外賣盒個蓋 「唔係教練唔畀我出，係我自己都唔知出唔出到」
「你背脊又痛?」
我Up 咗下頭
「都叫咗你上堂嗰陣坐好啲㗎啦，而家對住部電腦唔使坐課室啲凳，你就坐到成條蛇咁唔痛先奇」
「唔」
我心諗：試下痛嗰個係你，我好想痛架
同佢相處咗咁耐，一齊食飯，一齊做功課，做完功課一齊打機，有啲咩壞習慣對方都知道晒，究竟我哋係鄰居，朋友，定係兄妹？
「唉最多一陣間幫你捽捽咗個背脊，差唔多晚晚落街陪你跑，你咪嘥曬我啲心機唔出比賽呀。警告你呀聽日開始上堂同我坐直，再唔係小心我打殘你。等你跑都冇得跑，行都冇得行。」
「屋企無晒跌打酒」我冷冷咁講咗一句
「車，你估我葉杏童流架，見你個支用得七七八八，晨早買咗啦，陣間過去隔離拎比你」
「唔該」
冷淡，應該係形容我哋關係最好一個詞語，或者，係幾年入面我哋完全當咗，對方嘅存在係必然。對方為你做嘅每一件事都只不過係日常。
食完飯，佢走過咗去隔嚟攞番支鐵打酒過嚟，我聽佢講扒低咗喺梳化度。佢拉高我件t，開始喺度幫我捽
「你都痛咗咁耐，成日要我幫你捽都唔係辦法」
「你第日唔係話想做物理治療咩，到時你幫我搞掂咪得囉」
「黐線，邊度夠分入呢科，你估話讀到就讀到呀」
「冇嘢唔得嘅，你估葉杏童流架」我擰轉頭望住佢講
果然食完飯放鬆之後嘅氣氛係會輕鬆啲
佢一嘢拎返轉我個頭
「拎到頭咁後小心扭斷條頸呀，瞓好啦」
「你拎斷我條頸就差唔多」
「你啲姿勢以後再係咁嘅話，唔夠20歲你就寒背。聽日開始我攞部電腦過嚟陪你上堂，mon實你睇下你坐成點」
「知喇啊媽」
「仆你個街，我細過你呀話我係阿媽」
唔知點解佢鬧我嘅語氣的確係幾得意，所以我不時都會咁樣激嬲佢，聽下佢講粗。 都可以話係我哋冷淡嘅關係入面嘅一種樂趣
「吱死你個仆街呀喇」佢放低咗支跌打酒，將兩隻手擺喺我條腰度
「唔好唔好唔好，對唔住大佬，對唔住大佬，我錯」
再多嘅對唔住，都唔能夠滿足佢嘅心，一日佢仲有力，佢一日都仲會繼續吱落去...
係我哋嘅嬉笑聲之下，屋外嘅雷聲終於靜番落嚟，溫暖嘅感覺充斥著我哋。
所以究竟我哋係鄰居，朋友，定係兄妹？
都唔係...
我哋係對方嘅知己。