友愛的決擇: 第六章：曖昧一日遊

到星期六果日，我同阿謙10點就出咗門口，搭緊地鐵時，我就問佢其實佢啲friend想去邊，

咁佢就答我佢啲friend去長洲係做project，佢只不過係襯下熱鬧，佢啲friend去邊，佢就去邊喎，

我心諗：佢啲friend要做嘢，咁佢都要行埋一邊，唔可以騷擾佢哋架啦

『如果我唔去，佢哋要做project嘅時候，你咪會好悶囉？』

『唔知呀，係掛，所以咪叫你嚟跟我去囉』



『咁啱俾你知我又想去長洲啫，我唔嚟實悶死你呀haha，快啲多謝姐姐啦！』

『你唔好以為大我3個月就可以得戚喎，無我你夠嚟唔到長洲啦』

『你好嘢！咁打和啦，姐姐唔使你講多謝喇』

『原來有人得戚過頭添haha….』

我即刻擰轉面，都費事採佢！



下一站 中環...

『扮咩嬲吖你，落車喇！』

『我無扮，都冇嬲！』

我唔識行，我一路都係跟住阿謙走，出到閘，原來仲要行多一段路...

其實一路上我都係有啲驚，每次知道將會見到同年紀嘅陌生人，心入面都總係有份擔憂



因為唔知佢哋會點諗我

不知不覺間，原來我已經行離阿謙一段路

『做咩行咁慢？你好攰呀？』

『喂也，我真係有啲驚』

『仲細咩，快啲啦，陣間遲到，個個話我哋你仲驚呀』

聽完佢咁講，我即刻跑去佢隔離

『咦！係佢哋喎！』

我承認我怕醜，我即刻行到阿謙後面



『喔！認錯人！』

『嚇死人咩！』

『使乜咁驚喎，唉...睇嚟佢哋應該又遲到，我哋喺度等住先.........嗱，比你食』

『乜你好鐘意食波捧糖架咩？』

『上次買咗一包未食晒，咪攞啲去長洲食囉，波捧糖啱你呀！小朋友！』

『有無橙味？』

『嗱，最後一支俾埋你』



『喂！阿謙！』有2把聲從遠處傳過嚟

經阿謙介紹，一個叫Kelvin，一個叫樂哥

之後仲有個女仔嚟緊

『啊！佢咪係Michelle！』

我同佢係中學同學，佢見到我時都好驚訝

之後我哋就趕去買飛，搭 答半果班船

去到長洲，真係好多人，好熱鬧

由於我同阿謙都冇食早餐，我同佢講不如去食長洲最出名嘅大魚蛋



$10 一串2大粒，真係食過翻尋味，我又忍唔住買多一串，但係又驚飽到陣間食唔到lunch

所以我比咗粒阿謙食

食完魚蛋，我哋就行下長洲嘅內街

到差唔多到1：00 嘅時候，樂哥就話好肚餓

謙：『你之前準備嘅嘢呢？』

我：『咩嘢？啊！係喎！我果張準備好耐嘅紙！』

Michelle：『嘩，你嚟之前做好曬功課添呀？』



謙：『佢一早就想嚟好耐架啦，張紙都準備咗好耐，但係佢男朋友同佢啲friend都嚟唔到，咁我咪叫佢黎攞！』

我：『um….你哋想食日式小屋，外國餐廳定係普通茶餐廳？日式小屋show學生證有優惠，外國餐廳靚啲，普通茶餐廳當然就普通啲 啦』

Kelvin：『餐廳靚啲，食慾都多啲啦，不如外國餐廳？』

樂哥：『去日式小屋啦！平啲嘛！』

我心諗：好呀好呀！我就係想去依間！

謙：『但係普通茶餐廳多啲菜式揀喎！』

喺果個時候，我用嚴厲嘅眼神斜望著阿謙，佢見到我都擘大咗隻眼一下，佢都應該估到咩意思

haha，之後佢都話日式小屋啲嘢食應該會幾好食，Michelle都贊成去日式小屋，咁我就開個 Google map，打咗個地址就由我帶路 嘻嘻，其實佢哋都幾nice吖，Kelvin同樂哥成日喺度講／做埋啲搞笑嘢，搞到我同Michelle成日喺度傻笑，

係阿謙比較靜啲啫

去到果間日式小屋，我哋發覺原來間鋪頭係呃人，並無所謂嘅show學生證有優惠，只不過係有學生證就送一杯豆漿咁解，

不過都好過冇....

食完嘢，我哋傾咗好耐計，搞到差唔多2點幾先走人，其實我哋都覺得唔好意思，拿拿聲俾錢走人。

其實時間真係淨番唔多，Kelvin，Michelle同埋樂哥係時候要做佢哋嘅project，我同阿謙就同佢哋分道揚鑣

『阿慧姐，咁我哋依家去邊呢？』

『喂！咪叫到我老晒啦！um….根據我嘅行程呢...其實就係去踩單車，不過我哋啱啱食完嘢，不如行下啲特色小店先？』

『無所謂啦！』

『喂！你想唔想行架？不如算喇！都知你哋啲男人對行街冇乜興趣，咁我哋直接踩單車？』

『嗯！』

之後我哋去咗蕭記單車租單車，我上網格過價，依間最平，$20 一日

話說我都好耐無踩過單車，踩極都平衡唔到，所以我哋去咗一撻冇乜人嘅地方叫阿謙側邊扶住我先，

最終搞咗好耐先平衡到，唉...阿謙好比心機扶住我，都算係咁架啦！比着阿俊，佢依啲單車迷，

肯定自己踩住先，之後等我搞掂佢先會返嚟同我一齊踩

我哋沿著側邊近渡假屋果條路開始踩，之後踩到內街，由於內街嘅人比較多，我就係咁推果個ding ding制，

阿謙架單車無果舊嘢，所以當每次我ding ding 完，佢就用口發出嗶嗶聲，我叫佢大聲啲，但係條友又怕醜，

果刻真係笑死我！冇幾耐，我同阿謙都踩到攰，我哋就踩到沙灘，然後泊架單車喺側邊。

果日好好太陽，好多女仔都著住bikini，喺咁好嘅天氣下，真係人都開心啲

好可惜果日我嚟嘢，又無帶多條褲，所以冇得落水玩。我同阿謙就坐咗喺沙上休息傾計

佢就講下佢點識Michelle，樂哥同埋Kelvin，佢就問下我點識阿俊，其實阿俊係我一個學校同學

嘅friend嚟嘅，果日阿俊喺商場樓下等我個同學，佢哋話去食嘢，仲叫埋我同另一個女仔去，就

喺依個機緣巧合之下，我哋就識咗。我同阿謙傾傾下，竟然傾到去研究邊個女仔著bikini最靚，邊個最核突。

我哋坐到咁上下，就去還咗部單車，然後食糖水！我上網睇過有幾間糖水舖幾出名，不過最終就是但搵咗間嚟食，

因為攰， 所以都費事搵。

星期六就例牌多人，入到去間店都已經滿晒座，差唔多等咗5分鐘先有位搵到位之後，

我就二話不說點咗我最鐘意食嘅楊枝甘露，阿謙就點咗雜果涼粉

女人食甜品又點止食一樣就夠候吖，食完個楊枝甘露，即刻嗌多個芒果糯米糍

『喂！乜你唔怕肥咩？』

『乜你覺得我依家好肥咩？』

『係呀！』佢好自然咁答我

『你講多次！』由於佢坐喺我隔離，隻眼向右望都已經影視出尖尖銳眼嘅啤人效果

隨即，即使喺嘈嘈吵吵嘅環境下，我都聽到對面嘅一男一女（應該係情侶）喺度偷笑緊

店員阿嬸：『芒果糯米糍！』

心知情況不妙，睇嚟係頭先我同阿謙嘅對話已經引起陌生人嘅注目

你唔會明白當時嘅我係點樣扮冇事發生，但係心裡面係覺得超級尷尬！尤其係比個男仔話肥

『你食2舊！』我好唔客氣咁講

『你叫架！你食2舊啦，我飽啦』（總共3舊）

『你話我肥呀嘛，你之前話過你食極都唔肥架嘛，咁你食2舊！』

『唉，好啦，你唔好咁嬲啦下』

『haha，鬼叫你話我肥喎！』

我哋約咗Michelle佢哋6：30pm碼頭等，返到去屋企都已經好夜。