二手煙: 坑渠曱甴

「啊」穿着藍色衫的高大男人打了一聲哈欠，手裏捧着兩杯咖啡，走進房間，房間有另一位穿着藍色衫的男子，坐在其對面的是艾倫

「點啊師兄，佢講晒啦嘛」打哈欠的男人放下了一杯咖啡在男子身邊並搭了一下他的肩膊，其身形相對男人就顯得矮胖

「都7788㗎啦，交埋錢就可以保釋走㗎啦」胖男子看向艾倫「你冇問題啊嘛？」

「冇，冇問題，你冇問題，我都冇問題」

「咁你就保釋走啦，有冇帶錢啊？」





「消費券收啊收啊？」艾倫的聲音比之前顯得高亢

「charge佢老妨」男人搭了下男子的肩膊，男子眉頭皺了一下，但很快又消失不見

「啊sir，如果有冒犯到你，我好對唔住，我只不過係好奇啫」艾倫回答得急促

「好奇代表你可以打斷人哋一隻手啦咩」男子用比艾倫更高亢的聲音答到

「ayyy，嗱，佢喺度食煙，就預咗有被人影嘅風險㗎啦，佢唔喺度食咪冇事囉，我舉報佢係為民除害㗎啵，佢郁手先，我呢啲都係叫自衛還擊啫」艾倫不帶斷地說





男子張開嘴，下巴左右移動的同時呼了一口氣

「年輕人」男人搖了搖頭，拿着咖啡，喝了一口

「啊sir，你我想講，條友日日喺後樓梯到食煙，我就日日聞晒啲二手煙，到時我生cancer嘅時候，邊個可憐我啊？」

男子一邊做他手頭上的事，一邊白眼向上反瞥向艾倫

「學你話齋，我年輕人，佢一個將死之人，佢生cancer係應該，我生cancer就悲哀啦阿Sir。其實我都唔想咁樣，贏就 」








「入警局，輸就入醫局」艾倫拿着可樂，在女人面前左右踱步

「但係真係佢唔啱啊嘛，佢唔食煙咪冇事囉。就算佢食，佢死遠啲食，我冇咁講到」艾倫頓了一頓，女人木無表情

「不過都係咁啫，唔好搞到其他人咪得囉，點解佢要反駁我啫？佢做得呢一樣野就預咗有風險㗎啦，呢啲坑渠曱甴抵死，係唔係先？」

女人頭微微向左側「曱甴嘅鄰居係咩啊？」

「過街老鼠囉」艾倫緊接着說

女人左側的頭微微向下，眼睛轉上看向艾倫，艾倫頓了一頓，用手抹了抹嘴





「我都只係想呼吸新鮮空氣啫」

「你覺得你咁樣可以呼吸到新鮮空氣？」女人聲線平穩地說

艾倫站定，喝了一口可樂

「你咁樣嘅做法遲早就會被人打，又或者坐監，到時侯你就喺裡面日日同班煙剷友誼萬歲，你再打佢哋就俾個獨立單間你，你喺裏面食痾瞓，好似隻豬咁，呢個就係你所謂嘅呼吸新鮮空氣？」女人的聲音開始變得高亢

艾倫默不作聲

「我而家咁嘅情況，頂籠可以再做多十年，而家呢層樓攞去按咗佢，都夠俾個首期，之後我哋兩個可以一齊供，好快就可以還得晒啲錢，你點睇？」

「我唔想」艾倫把可樂放在唇邊

「咁點解你唔想？」





「冇意思」艾倫再把可樂往嘴裏送

「所以你覺得做呢啲野好有意思？今日打斷呢個嘅手，聽日踢斷嗰個嘅腳」

艾倫剛喝完一口，手未放下便又立即再喝了一口

「樓價會升，你可以中途轉機，冇人要你供足30年」

艾倫終於放下了手，深吸了一口氣，頭向地下望後眼睛再轉上看向女人

「總之你諗下啦，仲有兩個月先放榜，你呢兩個月想點就點啦」

艾倫眼睛向下望