破處·地獄: 【四】

志明呢個時候終於睇得清身邊嘅環境。

佢見到前面有塊路牌寫住「金巴利道」，再望一望條路兩邊嘅招牌同建築，佢發現呢個地方正正係佢俾牛頭馬面捉走時所企嘅位置。

成條街嘅格局望落去就同現實中嘅尖沙咀一模一樣。

事實上，地獄就係現實嘅倒影。不過同現實唔同嘅係，呢度係一個荒廢死寂嘅世界。

呢度所有嘢，包括街道、招牌、建築物、花草樹木等等，都係灰灰暗暗、腐爛破敗。





身處喺一個猶如死城一樣嘅地方，感覺只有無助同絕望。

志明戴上牛頭馬面俾嘅電子錶，上面嘅時間正喺度倒數。

仲有五十五分鐘，佢就可以由女人變返做男人。

喺呢段期間，佢要盡量避開其他男人，唔俾佢地埋身食到自己隻「豬」，然後等到自己變返男人，先再出擊去搵女人破處。

因此，佢打算搵個安全嘅地方匿埋。





而喺呢一刻，成條金巴利道就得佢一個人。

地下雜草叢生，路面以及附近建築物嘅表面，都覆蓋住黑色嘅苔蘚同霉菌。

喺周圍無燈無電嘅情況下，唯一嘅光源係天上面一個好大嘅月亮。

個月亮睇落比平時見到嘅起碼大一倍，照落嚟地面，帶嚟柔弱嘅光線。

志明戰戰兢兢咁向前行，經過一間鋪頭嘅櫥窗，喺一塊灰濛濛嘅玻璃上，佢見到自己嘅倒影。





變成女人之後，呢次係佢第一次真正見到自己個樣。

「下…呢個女人係我？」志明行近塊玻璃前面再睇清楚。

佢知道自己變咗一個女人，但無諗過會係一個咁嬌俏可愛嘅女人。

首先，佢面上嘅輪廓完全唔同曬，本來係三尖八角、頭尖額窄，依家係長頭髮、瓜子臉，仲有一對迷人嘅大眼睛，以及甜美嘅櫻桃小嘴。

另外，佢身上嘅裝束都唔同咗，原本嘅長袖T-shirt變成露腰小背心，短褲變成短裙，波鞋變成平底鞋。

小蠻腰再加白滑長腿，心口仲要漲卜卜，望落成個林明禎咁款，就連志明自己睇見都覺得心動。

佢對住塊玻璃，望咗一陣自己個樣。

望望下，忽然間玻璃入面多咗一個人影。





佢馬上擰轉面，結果見到一個身形龐大嘅肥仔，鬼鬼鼠鼠咁匿喺佢後面。