[GL] 拾起月亮的碎片: 02

然而一個月過去了，她還未等到想見的人。想到這裡，楊悅晴輕輕嘆了口氣。
就在這時，一個束著高馬尾的女生用拳頭敲了敲楊悅晴的頭。收拾好桌椅回來的她，放下手中抹布，雙手交叉抱在胸前，不滿地罵道：「楊悅晴，你同我專心啲，唔准發吽逗！」「心柔前輩，而家一個客都無喎！」楊悅晴摸著被打的地方，嘟嘴抱怨：「郁啲就濫用暴力……啲行為同個名完全相反……」
「你講咩話？」名叫高心柔的女生瞇眼微笑，語氣親切。
「無咩。」楊悅晴感到一陣惡寒，連忙找別的話題：「呢度成日都坐唔滿人，係咪真係做得住㗎？」
位於住宅區一角的咖啡店十分冷清，即使是假日，也只勉強坐滿一半。
「你可以同店長反映下你嘅憂慮呀？」
「我先唔制！陣間佢話要開源節流，炒咗我點算！？」雖然她不看好這裡的營運，但也不想丟了工作。
「哦？原來你都會怕俾人炒？」高心柔失笑道：「咁你個新人就同我努力啲，唔好嫌三嫌四！」
「我先無嫌三嫌四！我只係覺得好悶！」
「覺得好悶？」高心柔一手搭著對方肩膀，壓下聲音，故作神祕地說：「咁就試下自製樂趣啊。」




楊悅晴對著挑起一邊眼眉的人露出困惑神情，「咩意思？」
「例如……試下搵個觀察對象。」
「觀察對象？」
「嗯，搵個有趣嘅客人，留意佢嘅一舉一動。」
「……做乜聽起嚟成個跟蹤狂咁？」高心柔一副理所當然的態度，讓楊悅晴忍不住吐槽。
「先無你講得咁恐怖！我意思係你可以搵個你覺得有趣嘅客，觀察下佢，偷睇下佢做緊乜。有啲嘢專注，時間都會過得快啲！」
「你好似好有經驗咁喎。」
「其實我最近留意緊一個間中嚟嘅靚仔……嚟親都嗌草莓蛋糕，好有反差萌嗰個金毛男仔。」
「……前輩，我記得你話過自己已經有男朋友㗎喎？」
「關有無男朋友咩事？又唔係叫你愛上佢！嗯……就同追星差唔多啦！」




「我覺得直接轉工會比較簡單……」
「都係，咁要唔要一齊辭工？」
楊悅晴對著高心柔吐了吐舌，「唔、要！搵工咁麻煩！而且呢度又離屋企咁近！」
「既然係咁你就參考下我嘅意見，搵啲樂趣，等你有動力返工！」楊悅晴半信半疑的點了點頭，對方滿意地拍拍她的肩膀，走到一旁整理物品。
確認同事的視線不在自己身上，楊悅晴拉開收銀機下面的抽屜，拿出一個折疊購物袋。她一直隨身帶著它，無論在哪一天遇見對方，都能立刻物歸原主。
這一個月，她到超市買東西時，都會不自覺地四處張望，尋找那道朝思暮想的身影；上班下班時，都會刻意留意路上行人，渴望能看到那張念念不忘的臉。
腦海浮現片刻前跟高心柔的對話。其實心裡一直都有著讓自己努力上班的「動力」，只是那個對象遲遲都不來找她，讓她都開始感到氣餒了！
「唉——」想到這裡，她又禁不住嘆了口氣，但隨即連忙掩嘴，生怕自己的聲音會被高心柔聽到。
就在擔心之際，門鈴發出清脆的叮噹聲，兩人同時抬頭，楊悅晴露出親切笑容，準備向客人問好。然而，當看到推開玻璃門走進來的身影時，她激動得止住呼吸，心臟彷彿漏跳了一拍。興奮之情如潮水般急湧上心頭，所有東西都被她拋諸腦後，下一刻——
一個震耳欲聾的尖叫聲，響徹寧靜的咖啡店。




======
歡迎來Threads找我玩
https://www.threads.net/@dec.0811