PLAY GAME WIN LIFE: Endless
Endless
「李友希已經出哂所有牌，而遜馬亞里仲有三十一隻牌，根據規則，贏嘅係李友希，累積嘅三百四十個籌碼，扣返你哋欠嘅，尚有二百零二個，全部歸李友希所有。」One透過東南西北的口說：「至於李友希代表嘅錢泰笑，可以得到末日堡壘嘅門票一張。」
「而落敗嘅遜馬亞里同代表嘅富豪，麻煩無人機幫手處理。」One冷酷無情地說。
「比賽正式結束，我哋將會送你哋返去嚟嘅地方，而家請你返包廂享受勝利者嘅盛宴。」One說完便關掉麥克風。
同時，Zero興奮得跳起並說：「Yes！今次實驗大成功，最後有我想睇到嘅嘢。」
「的確，係驗證咗我哋嘅hypothesis，最尾遜馬亞里嘅專注力、判斷力下降，同佢哋兩個嘅情緒變化起伏都同我哋嘅假設一致，但係產生幻覺呢part，我唔覺得佢哋有，結果唔算完美。」One略帶失望地說。
「No， no， no，梗係唔係喇One，佢哋都有出現幻覺嘅跡象，特別阿希最明顯，佢由捱打變打人，你無留意呢個變化中間發生過乜事咩？」Zero糾正One說。
One搖搖頭，Zero續說：「佢變之前先係望住一個地方出神，然後就變哂，咁仲唔係見到幻覺？」
One半信半疑，不過也沒有深究，反正報告已經有足夠素材去寫，現在他唯一在意的是這變化對阿希的影響。
銳利的Zero一眼便察覺到端倪，充滿信心地對One說：「放心，我哋研發嘅RE槍好強，已經咁多次都無問題，你唔好每次都擔心咁多喇。」
「講係咁講，但始終係我細佬，每次我都好唔忍心……」One將這句說話吞了下肚，縱使心裏不舒服，但也沒有進一步表達出來。
+x+x+x+x+x+x+x+x+x+x
同一時間，在戲院內，眾人再次圍着Fiona起鬨。
「好嘢Fiona BB，你又贏，跟你實無死。」Elise一頭鑽進Fiona懷內撒嬌。
「仲細咩，噁心。」Ben扮了一個嘔吐的動作嘲笑Elise。
Daisy看不過眼便說：「做咩呀你，輸咗畀Fiona唔服氣呀？我記得有人話要切㗎喎，想走數？」
「大家都係玩吓炒吓氣氛啫，唔駛咁認真嘅。」Alfred出來嘗試打圓場。
另一個猜錯的Chris也開口道：「係囉，大家開心就得，笑吓又一日。不過估唔到媒都會輸，Alfred，你啲料係咪真㗎？定只係路邊社消息嚟？」
「梗係真，但佢最後表現咁差，無哂之前嘅冷靜，輸都合理，咁先證明我哋嘅game係公平、無操控。」Alfred藉此轉移視線。
Fiona雖然又一次猜中了賽果，但臉上沒有一絲喜悦。她離開前只說了一句：「今次遊戲內容喺網上流出咗，角度絕對係現場拍，而且仲有之前遊戲嘅片段，迴響都幾大。你哋快啲處理吓，影響到組織就無得再玩。」
「流出咗？無可能，斷哂網收哂電話點流出？點算好？呢個時候個Fiona竟然仲走先，搞錯！」Ben顯得有點徬徨。
「Calm down，Fiona一向都唔駛理呢啲，佢講呢單嘢出嚟就已經仁至義盡，不如睇吓邊段流出先仲好。」Elise的冷靜與Ben形成對比。
五人在聊天室一問，便有人轉發相關的訊息。
「果然網民就係強大，咁耐之前就已經發現仲post埋條link出嚟。」Daisy不禁讚歎。
「係數字球嗰時，都好前吓，仲有捉伊因㖭？唔知有幾多人睇過同save低。」Alfred越想越覺得不妙：「會唔會今場就係我哋最後一場？」
「我都叫你哋冷靜啲先，」Elise再次勸喻眾人，並指揮大局：「Daisy，安撫我哋嘅VIP；Alfred，揾吓邊啲人留咗底，hack入去刪哂佢；Ben，做水軍，喺啲片下面留言話條片係電影嘅廢棄片段；Chris，喺有share條片嘅人入面，揾最有影響力嗰個，要佢拍條片幫我哋澄清。」
各人聽從Elise的指揮，很快便轉危為機，網上發酵了數天的輿論一下子逆轉，其中Chris找到的夫妻檔主持厥功至偉。
「今次你勁喎，咁短時間就令到呢對Youtuber跪低澄清。」Daisy罕有地稱讚Chris。
Chris沾沾自喜地認叻說：「我喎，梗係勁，只係我平時低調，唔鍾意吹噓啫。」
「扮乜，幾十枝AK隊住你，你跪唔跪？」Alfred看不慣Chris專美，故意揭穿。
「不過我哋要檢討吓點解會有片段流出。」Elise一下子將眾人放鬆的心情拉回沉重的議題。
此時門開了，同時一把女聲回答：「係伊馬，佢影完再用自己公司研發嘅天網send出去。雖然電話收哂，但如果係佢，有其他錄影裝置一啲都唔奇，畢竟佢就係靠將啲空想變現實而致富。至於捉伊因嘅片段，係之前主導實驗嘅Sigmund Freud為咗報復組織唔再資助佢嘅研究而流出。」是Fiona，她竟然折返。
「死蠢！」Ben咬牙切齒地說：「本身我都好欣賞佢，但而家竟然蠢到同組織為敵，唔可以留生口。」
Fiona慢慢走到自己的座位坐下，然後簡潔地說：「兩個都已經再開唔到口。」
「但點解兩條片會合埋一齊？佢兩個明明風馬牛不相及。」Chris不解地問。
Alfred發揮推理能力，扮演偵探說：「一定係Sigmund Freud揾伊馬資助佢嘅實驗，之後傾傾吓講起。你知伊馬份人乜都鍾意叉隻腳落去搞吓，可能想搞死我哋然後自己一個玩獨市。」
「情況大致好似Alfred講咁，總之而家已經解決咗。」Fiona神態自若地說。
「你話再開唔到口，即係……係咪好似我諗咁？」Ben略帶興奮地問。
Fiona笑而不語，只舉起酒杯，其他人見狀也舉起酒杯，對她喊了一聲：「Cheers！」
+x+x+x+x+x+x+x+x+x+x
東南西北宣布賽果後，阿希大大的呼了一口氣，緊張的精神總算可以舒緩，而遜馬亞里也笑得累了，笑聲逐漸微弱，最後消失，無人機亦已經在遜馬亞里及他代表的富豪頭上待機，等待指示消除記憶。
此時，阿希藏在心底數日的問題終於有機會問個明白。他走到遜馬亞里跟前，以請求的語氣問：「嗰晚喺球場，我見到你同兩個神秘人喺球場見面，你仲對佢哋好恭敬，佢哋係咩人？我阿哥阿樂係咪其中一個？」
「乜你見到？我哋都唔知有人見到，仲以為收得好好。」遜馬亞里的回覆，令阿希多日的擔驚受怕頓成笨蛋的行為。接着，遜馬亞里向阿希披露了一件更震撼的事：「係咪叫阿樂我唔知，本身我又唔識你哋兩兄弟，我淨係知佢哋叫Zero同One，佢哋透過呢個比賽攞資料做研究，而我本身係佢哋嘅候補生，如果呢次比賽我贏到就可以成為佢哋嘅一份子。」
「你而家咁爆料唔怕咩？」阿希立即掩住遜馬亞里的口，同時自己亦壓低聲線問：「係咩實驗？」
遜馬亞里推開阿希的手，故意加大聲線說：「有乜好怕？反正我輸咗都無機會做佢哋成員，不過實驗詳情我就唔清楚，只係知同時間有關，無記錯係叫時間隔離實驗。」
阿希聽完也一頭霧水，正想追問之際，無人機發動了攻擊，遜馬亞里當場伏在桌上，直到被運走前也沒有醒來。
「時間隔離實驗究竟係乜嚟，做嚟有乜用，點解一提起無人機就直接攻擊？」阿希雖然心裏有無數個問題，但他也沒有對象能問，而且也不敢問。
「阿希！」阿滔從場邊跑到中場時大喊，玻璃幕牆不知何時已經降下了。
看到阿滔，阿希也自然地笑了，將剛才的不安都暫時拋諸腦後。
「我都話你掂，只要做返自己就贏硬，無講錯嘅。」阿滔撫摸阿希的頭，就像哥哥讚賞自己的弟弟般。
「咪喇，都三十幾歲人，仲細咩？」阿希尷尬地推開阿滔的手，然後笑着說：「多謝你叫我做返自己同埋教我點計呢度嘅時間，唔係都贏唔到。」
「唔只我一個嘅功勞，錢生都有份提，佢好多時仲肉緊過我，睇到好多關鍵位，仲做哂筆記叫我提你。」阿滔不斷替錢先生說好話。
此時，從場外姍姍來遲的錢先生也謙虛否認： 「邊度係，我貢獻好少，落場嘅你同鼓勵你嘅阿滔先係最大功臣。」
面對眼前這位剛獲得末日堡壘入場券的超級富豪，同時亦是世紀疫症特效藥的研發者，阿希更加必恭必敬。
「不過我有樣嘢要對你坦白，」錢先生霎時間認真起來說：「對唔住，之前我呃咗你，但同時都要多謝你。」
出乎錢先生意料之外，阿希並沒有憤怒或驚訝，反而豁達地笑着說：「我知，好早之前我已經知，只不過雖然你出發點係好，但收天價呃人始終唔啱，我希望你可以公開向全世界道歉，同埋之後用阿滔嘅血清研發嘅真正特效藥要免費提供畀全世界，但唔好畀人知阿滔係救世主。」
聽完阿希的說話，錢先生陷入了沉思，獨自走到一旁。
「喂喂喂，你點知㗎？同埋點解唔畀機會我名留青史？」此時阿滔故作生氣問。
阿希揮一揮自己的左手，阿滔便意會到其意思，接着開始解釋：「你係特效藥，正面嚟睇可以靠賣血清賺到盤滿缽滿，但負面嚟睇，你會變咗唔同藥廠同國家嘅爭奪對象，最壞情況係生命會受威脅。」
「我又唔係唯一，仲有對母女，公開咗我，最少佢哋會安全。」阿滔發揮自我犧牲的無私精神。
「老實講，我相信呢個世界唔只你哋兩個，仲有好多人都有超級抗體，但有幾多會咁好彩被人見到？如果你一曝光，全世界都唔駛盲頭烏蠅咁去大海撈針，你做咗現成目標，萬一當中有人動歪念，你估會點？」阿希解釋得頭頭是道。
「李友希，今次嘅勝利者，」沉寂多時的東南西北突然開口：「籌碼已經兑換成美金，一共係二百零二萬，請你點收。」無人機運來了兩個大大的手提包放在阿希面前，像電影裏銀行劫匪用的手提包一樣。
「仲有，」東南西北在阿希點算期間續說：「當你行出呢個場，你喺呢度嘅記憶都要被消除。」
「消除記憶？一定要咁咩阿哥，我好掛住你，有好多嘢想同你講。」阿希不受控地流下眼淚，旁邊的阿滔也一起哀求。
東南西北沒有反應。
「錢生，你又話我贏咗可以幫我見到我阿哥嘅？你快啲幫口。」阿希將矛頭轉向錢先生。
錢先生擋在阿希面前，對東南西北說：「反正佢嘅記憶都會被消除，你咪畀佢見一面囉，對你無蝕底㗎。」
東南西北依舊沒有反應。
「當係我終於贏咗嘅獎勵囉，都係見一面啫，見到佢每次都咁，我都心痛，何況佢仲係你細佬？」錢先生繼續對冷冰冰的東南西北說，而這段說話卻引起了阿希的注意。
「終於？每次？咩意思？」阿希心跳加速，呼吸也變得沉重起來，錢先生的一句說話，加上由相遇到比賽期間種種匪夷所思而且荒謬絕倫的人事物，阿希記憶深處被封印的痛苦回憶此刻被喚醒了。
遺下、背叛、欺騙、出賣、精神折磨，之前被無人機消除的記憶同時湧現。
「放我出去，我要自由，唔要再困住喺度做呢班人嘅玩具！」阿希發瘋似的跑到出口不停捶打閘門。
阿滔完全不知道發生了甚麼事，本能地跑過去抱着阿希，希望能給予他情感支援，幸料阿希以無情力推開他，並歇斯底里地說：「你唔好行埋嚟，你都係呢班人嘅其中一件玩具，只係今次無被揀中，所以先將你設定做我嗰個變態阿哥嘅代替品，你同我喺今場遊戲先有呢個設定！乜嘢世紀疫症、末日堡壘、超級抗體，全部都係假，全部都只係植入我哋個腦嘅設定嚟！假㗎！」
「咇噍、咇噍。」阿滔未及回應，無人機便精準地朝他和阿希頭上各開一槍，兩人頓失知覺、軟攤在地。
「哎呀，你唔駛咁重手嘅，我最睇唔過眼就係呢part，話哂佢都係今次冠軍，應該要畀啲獎勵佢㗎嘛。」錢先生對東南西北抱怨道。
東南西北沒有回答錢先生，只是命令無人機將阿希倆運走，然後再將一隻USB交給他，同時打開了閘門，好讓他能自行離去。
得到USB的錢先生欣喜若狂，禮貌地道謝和道別後，便頭也不回地離開，而東南西北目送他離開後也消失了，只留下無人機在清理打掃。
+x+x+x+x+x+x+x+x+x+x
「唔駛咁sad喎，想當初你都係贏咗好多場遊戲先得到呢個位，你細佬都一定可以做到嘅，計埋今次佢都已經贏咗三場。」Zero安慰道。
「但嗰時我唔駛每次都植入唔同嘅虛假記憶，我只需要做返自己，盡力去贏就得。而家每次見到阿希咁痛苦，我都好心痛。」One自責道。
Zero認同說：「其實我都係，咁睇嚟我要再改良吓把RE槍先得，今次竟然講兩句就記得返啲嘢，之前都未試過。」
「不如畀佢加入我哋，我唔想再見到佢咁辛苦。」One忍不住哀求道。
「No way！」Zero斷言拒絕：「咁對其他人好唔公平，好似遜馬亞里咁，佢都係連續贏咗五次先有機會做候補。」
「可惜作為最後測試嘅第六次輸咗，又要由零開始過。」One接下去說：「但嗰個係我細佬，畀次例外。」
「規矩就係規矩，唔可以打破，否則就會無規矩。將佢放喺勝利組入面，等下一次實驗再被人揀過。仲有遜馬亞里，佢竟然知道我哋嘅實驗內容，唔知邊part出咗問題，我要徹查吓。」Zero堅拒One的請求，並命令說：「今次嘅實驗，你呢兩日整理同分析哂啲數據交畀我，我要揼好份研究報告發表。」
「知道……」One無奈答應，但還是問了一句：「你畀嗰隻USB佢有無問題？入面有怪物基因圖譜，萬一佢用喺佢啲複製人度，個世界真係會末日。」
「你同我定，專心處理好啲數據就得，佢拎住隻USB都唔會做到啲乜，因為最關鍵嘅嗰條染色體我抽起咗，世界唔會因為佢而末日。」Zero氣定神閒地說。
+x+x+x+x+x+x+x+x+x+x
時間為下午五時正，體育園的天幕徐徐打開，夕陽的餘暉映入綠悠悠的草地上，園外生氣勃勃，人們樂也融融，對園內發生過何事無人知曉，只對體育園重新開放感到雀躍，亦為晚上的演唱會感到興奮。
世界依舊在運行，人類繼續在享樂，一切如常，沒有改變。