《星空之願》(前稱:3A班死亡遊戲): 三十四、

回憶如潮水般退去，樂希雙眼一震，回過神來，發現自己仍立於一號房廁所之中，曉峰在他面前，捉著他的雙手問：「樂希，你點呀？係咪諗到啲咩？」

樂希點了點頭：「我……我記返啲嘢。」

他深呼吸後，簡單向曉峰交代回憶，低聲說：「中二開學嗰陣，曦嵐係我哋班插班生，坐我隔籬。佢仲細粒同瘦弱過我，好似女仔，被班上壞份子欺凌。有一日放學，我見佢俾人除哂衫褲欺凌，佢喊得好慘。我試過阻止，但佢哋恐嚇我，我驚到跑走咗。之後我同阿偉永誠講，告發咗佢哋，幾個壞學生被罰，但曦嵐之後退學。」

他停頓片刻，聲音顫抖，繼續說：「但我好奇怪，點解之前會唔記得呢個人？明明件事咁深刻，我仲記得佢求助嘅眼神……」

樂希低頭，緊握拳頭，細聲說：「我好內疚。如果當初我冇猶豫咗十五分鐘，直接去搵老師，可能可以減少曦嵐受嘅傷害。」





他眼眶泛紅，淚水於眼角打轉。曉峰聽後，凝視著樂希說：「樂希，唔使咁怪自己。你當時已經好勇敢試過第一時間阻止，我諗唔係個個見到都敢咁做。」他停頓一下，繼續說：「我記得嗰陣我哋雖然同班，但我比較專注讀書，冇乜理班入邊嘅事。每次一放學就去補習，我作為班長都完全唔知班入面發生過咁嚴重嘅欺凌事件。」他苦笑一聲，說：「可能我太唔關心周圍嘅人。」

樂希抬頭，淚水在眼眶打轉：「你都唔識佢......但我係佢朋友……如果當時我唔係掛住同阿偉拍拖疏遠咗佢......」

曉峰打斷他，低聲說：「冇咁多如果㗎，你已經做得好好，之後仲同永誠阿偉一齊告發，佢哋受罰係你嘅功勞。唔使將所有責任攬上身。」他拍了拍樂希的肩，給予一絲安慰。

廁所門突然被推開，阿偉揉著眼睛走進，低聲說：「喂，我半夜起身見唔到你，原來喺呢度。」

他見到樂希與曉峰在廁所，驚訝說：「哦……曉峰，你係咪色誘我樂希，仲帶佢嚟廁所？」





曉峰無奈回應：「唔係個個好似你咁鹹濕嘅。」

樂希認真說：「梗係唔係啦，你點會咁諗架？你唔信我架咩？」

阿偉本來就沒有懷疑樂希，只想開個玩笑，但見氣氛凝重，意識到自己失言，連忙說：「呀，唔係呀，sorry，我講笑咋！」

他們的聲音吵醒了永誠，他於上格床探頭看向廁所方向：「你哋半夜喺廁所做咩？」
於是三人走出廁所，和從上格床跳了下來的永誠一起坐於阿偉的左邊下格床上，圍成一圈。

樂希將夢境與曦嵐的事一五一十道出，永誠與阿偉聽後，低頭沉默。





永誠回憶了一會，低聲說：「我大概記得有件咁嘅事，當時我同阿偉練完波，之後你話有同學俾人欺凌，我哋去告發。」

阿偉點頭，說：「係囉，我都記得你講嗰個細粒嘅同學，後來好似真係退咗學，但印象唔深，好似剩係喺度幾個月。」

曉峰再聽一次，低頭思索片刻，他覺得遊戲中出現曦嵐的照片一事甚為不尋常。

理論上他退學已久，怎會有照片在那裡？

他懷疑曦嵐的事與此次的死亡遊戲有關，卻無證據，不願妄下定論，遂緊握拳頭，沉默不語。