《星空之願》(前稱:3A班死亡遊戲): 四十一、

樂希緊握曦嵐的照片，靈堂的白布與香燭氣味漸漸消散，眼前一閃，他回到現實，禮堂的昏暗燈光與心然的哭聲重新包圍了他。

他注視手中的照片，痛哭出聲，低頭說：「對唔住，曦嵐，我終於記得哂，係我害死你架，嗚嗚嗚嗚……」他聲音哽咽，淚水滴落地上，內疚與悲傷壓垮了他。

他崩潰跌坐於地，雙手掩面，哭聲於禮堂內迴盪。

阿偉、永誠與曉峰見狀，再次無視規定，衝上前將樂希緊緊抱住。

阿偉搭著他的肩膀：「樂希，我喺度。」永誠抱住他的背，曉峰跪於旁握住他的手，三人圍住他，給予溫暖的依靠。





樂希於他們懷中顫抖，淚水浸濕了阿偉的衣衫。

此時，禮堂的大門被猛力推開，一個氣喘吁吁的身影衝入。

他正是消失已久的社工樂賢。

他滿頭大汗，望向空中，對著廣播大叫：「到此為止啦，潘姐！我明白你嘅心痛，但事情已經發生，你已經犧牲咗好多無辜嘅生命啦！」他聲音帶怒帶悲，似有千言萬語。

樂希抬頭，哭著說：「哥……」樂賢衝上前，跪地緊抱住弟弟，低聲說：「細佬，我喺到。Sorry我嚟遲咗。」兄弟二人相擁，淚水交織。





廣播的機械聲突然轉為一位帶哭腔的女性聲音，與班主任潘姐的嗓音極其相似，她哽咽說：「我知我做錯咗，我知由一開始我唔就應該咁做……但我太痛，我作為阿媽，我竟然唔知曦嵐讀書嗰陣受咗咁多痛苦、感受到咁多無助同孤單、佢同一般學生一樣，好想有朋友，好想有人愛佢……嗰日佢自殺後，我先知佢受咗咁多屈辱，我覺得係我唔夠關心佢，係我害死佢……」

「參與欺凌嘅人抵死，但你哋都唔係無辜，你哋嘅視若無睹、你哋嘅冷漠，其實都係助長欺凌，我本來係想殺哂你哋，除咗唯一有關心過曦嵐嘅樂希......」她聲音斷續，隨後失聲痛哭，哭聲於廣播中傳出，撕心裂肺。

「你咁做曦嵐會點諗？你覺得以暴制暴係解決方法咩？曦嵐咁善良，佢一定唔想你咁做！」樂賢再向著廣播的位置喊到。

她沉默了一會，繼續哭著說：「以曦嵐善良嘅性格，佢真係唔會想我咁做，我、我真係好對唔住佢！嗚嗚嗚……可惜呀樂賢，可惜你今年先入嚟做社工，如果你上年喺到，曦嵐應該就會有個傾訴嘅對象......」

潘姐的哭聲未落，心然的頸圈突然發出「嗞嗞」高壓電流，他大叫一聲，頭一歪，氣絕身亡，赤裸的身軀於十字架上無力垂落。





其他九人的頸圈隨即鬆開脫落，跌於地上，發出清脆的碰撞聲。

潘姐繼續說：「我會收手啦，但對唔住，心然係一定要死，佢就係當年其中一個欺凌曦嵐嘅人。」語氣平靜中帶悲。

隨即，大量警笛聲由遠至近傳來，警察、救護與消防人員衝入禮堂，腳步聲與呼喊聲打破死寂。

潘姐說道：「我聽到警察嚟咗啦，我人喺校長室，我唔會反抗，對唔住咁多位。」

救護員入場，逐一檢查生還者，準備將他們帶走送院。

她最後說：「樂希，你唔使自責，曦嵐冇怪你，多謝你喺佢最後嘅人生，俾到一點點光佢。」

機械人於此刻上前，將一張泛黃的紙張遞給樂希，然後它身上的燈光熄滅，隨即停機。

樂希握緊紙張，淚眼模糊，將其收好。





樂賢扶住他，低聲說：「走啦，檢查完我哋返屋企。」

他陪同樂希，跟隨到場的救護員離開禮堂。