當故事變成事實: Stephy談舊事
在我追問下，Stephy終於第一次較為完整地將她和琳琳的往事告訴我。
Stephy：我讀大學YEAR ONE就識左琳琳，佢同我一個PROGRAMME高我一屆。好快我地熟左，好似好姊妹咁成日玩同傾計。但好快我發現，我唔想佢係我好朋友。雖然嗰陣時佢已經同Michael一齊，但我好想佢做我女朋友。
我：你點分到好朋友同女朋友嘅呢？
Stephy：我見唔到佢時，我會掛住佢。我知道佢同Michael去拍拖，我會唔開心。你知道有時啲女仔FRIEND會拖住手，我拖住琳琳時，我手掌心係會出汗。
其實這時，我也是拖著Stephy的手，也感到自己的手掌在冒汗。我多麼想說一句”我而家都係”。但還是決定繼續聽Stephy的分享。
她續說：”識左佢幾個月，有一次我同琳琳兩個人去唱K。我又借啲意拖住佢，終於有一下我頂唔順，把持唔住，𡃶左佢一啖。”
我：咁佢有乜反應？
Stephy：我𡃶左佢塊面一下。跟住佢呆左咁望住我冇出聲。佢嗰時個反應、嗰個樣，我仲記得好清楚。我同佢對望左幾秒到，我放低個咪，望住佢講”我鍾意左你呀！”跟住佢都係冇反應，我直頭𡃶佢個嘴。你知唔知我冇拍過拖架？所以呢個係我初吻。
我：佢OK？
Stephy：佢冇抗拒，冇推開我。我𡃶左佢幾啖之後，佢都攬住左我，主動𡃶我。就係咁我地就開始左。
我：有冇即時喺K房嗰度搞埋呀？
Stephy：好純情架我嗰陣時。都話係初吻、初戀。邊有諗呢啲野。哈！嗰日唱完K，Michael仲來接佢。我喺見到Michael來之前，仲拖實琳琳隻手。
我：咁其實琳琳都鍾意你嘅……
Stephy：佢嗰日冇直接講。用行動話我知囉。之後我同琳琳咪好似一般情侶咁。除左唔係一男一女之外，唔同嘅仲有Michael嘅存在。就算佢同Michael拍拖時我幾唔開心，我冇要求過佢地分開。
我：咁琳琳係同時鍾意你同嗰嗰Michael？
Stephy：係。佢有直截了當咁同我講過，話兩個都鍾意。我唔會退出，但又唔想逼琳琳同Michael分開。我唯一諗到嘅方法，就係……不如我都同Michael一齊。
我：下？
Stephy：你做乜咁嘅反應。你個故入面，唔係都係類似嘅咩？阿蕙、MS張同埋光仔咁。
我：咁我寫故，你係現實。
Stephy：於是我主動約Michael。睇下啱唔啱FEEL……
我：咪住！琳琳知唔知你咁做？
Stephy：嗰陣時唔知。點知我好似第二定第三次約Michael，Michael就已經同我表白。
我：乜話？
Stephy：佢叫我做佢女朋友。
我：咁你點答？
Stephy：唉……嗰陣我都對佢係冇FEEL。而且，佢咁樣，即係其實佢唔係真係好愛琳琳。
我：好明顯啦。
Stephy：嗰陣時我仲細個……唔係好識反應……我拒絕佢，然後佢問我，如果我唔係想溝佢，做乜主動約佢出來？我唔知點解，講左個真相俾佢聽。
我：真相？
Stephy：即係我同琳琳都拍緊拖呢件事。我冇話我係想睇下我對佢有冇FEEL而主動約佢。
我：咁佢有乜反應？
Stephy：佢問我係咪特登約我來拆散佢同琳琳。我話唔係。佢唔信。轉個頭佢就同琳琳講分手。嗰晚琳琳喊住來搵我，我就將成件事話左俾佢聽。好彩佢冇怪我、冇嬲我。嗰晚我送左佢返宿舍，我先至第一次同琳琳做。