<網上交友的第一次> 憑感覺愛上你: 大結局（2）

我地先玩咗一個過山車，睇企鵝，然後就肚餓了。

我：『我好肚餓了』

『咁不如搵地方食野喇』

我：『不如去依個餐廳，好似有企鵝睇架』

『食咁豪？』





我：『唔緊要啦，我嚟親都係食McDonald，我想試下食依個』

『哦』

假期多人，要等位亦在所難免，不過由於好多人比較鍾意求其食啲嘢就快快趣走去玩，所以餐廳唔會有好多人等位，大概25

分鐘吧，已經有位比我地。我地好好運，我地既座位正正對著啲企鵝，一邊食一邊望住企鵝行來行去，感覺真係好得意。親

Wilson去咗廁所，我叫埋單，比完錢，我就等Wilson返嚟。





『我地走啦』

『下，埋咗單嗱？』

『當然！』

『得啦，你唔駛比返錢我，你請我入嚟玩，我請返你食野應該嘅』

何況2個人食嘅野都唔夠一張入場券貴，諗落，我有著數嘅，嘻嘻





玩完幾款機動游戲，我地就去咗玩果個飛船，姐係有隻鷹嘅標誌，升到半空係咁轉轉轉果個。細個雖然嚟過海洋公園好多次，

但身邊嘅人總係唔夠膽陪我玩，依家大個咗，終於有人願意陪我第一次玩依個機動遊戲。排隊嘅時候，我持興奮嘅心情望住一

次又一次機動游戲開動嘅時刻，我見無乜人嗌，依個應該唔會刺激。由於我未玩過，所以我對依個遊戲無乜認識。下輪就到我

地，我見前面嘅人一個又一個走入去架車入面，跟住我發現咗一樣野。

我：『下？乜原來可以2個人入去入面架？』

『係呀，你想？』

『咩呀，我問下咋嘛，都無話想，我......我先唔要同你咁親密吖』我尷尬咁講

Wilson無再出聲，但就喺度好含蓄咁笑





終於到我地了，我好快咁入去其中一個（車廂？係咪應該咁叫呢？）我走到入面，忽然間......我拎轉面，原來果個Wilson跟埋

入嚟！

『喂！你做咩入埋嚟呀！』

『haha，你做咩面都紅晒』

『你未答我呀，你做咩跟埋入嚟喎！』

『出面無晒位了，咁你無理由拋低我架，咁我未入埋嚟攞』

『你呃人，明明頭先我地排頭位嘅』我聲線已經變得好細聲，因為我非常之緊張，個心仲跳得好快





『快啲坐好啦，就嚟開始了，你想坐後面定前面呀』

『下，er…..前面，後...後面你實責住我』

我個腦究竟諗緊咩呀！死了，咁我咪順佢意？我實在太緊張，但情況實在唔容許我頭腦清醒，加上就快開始，我扣好安全帶，

個身傾前少少避免同Wilson接觸。機動游戲已經開動，慢慢升高，由慢開始加快，我一唔小心，個身突然向後撞向Wilson嘅

（懷抱？）我個心已經去到頂點，我相信我嘅心跳聲Wilson無可能聽唔到。之後，Wilson笑咗笑....

『ha，你好緊張呀？』

『邊....邊有』

『隻手扶住欄杆啦，定係.....』





『扶！我扶！』我好快但又好尷尬咁講

由於我怕同Wilson有親密嘅接觸，所以我揸住欄杆揸得好用力，避免身體再次向後傾，所以真係好攰下。當部嘢慢慢停落嚟，我一唔覺意鬆開手，放鬆個身嘅時候唔記得咗Wilson喺後面，而我成個身再次捱向Wilson度。Wilson即刻雙手掂向我膊頭，而我先開始醒覺，不過點我果下，個觸電感覺再次出現，果刻呆咗喺度。

『哈，其實你頭先挨落嚟咪得囉，我唔介意嘅，頭先你係咪撐得好辛苦？』

我即刻彈番向前，由於我唔知講咩好，我尷尷尬尬面向Wilson講咗個”無”字就即刻開扣走人，之後Wilson跟住我尾。一路上，

唔知係咪我頭先尷尬到傻，一路揼低頭無講野，又唔敢望向Wilson。走下走下，就坐咗入一個類似涼亭嘅地方。奇怪，我坐低

後唔見Wilson，我走返出去左望右望，都唔見佢，我開始怪責自己，死了，係咪我頭先粒聲唔出嚇走咗Wilson。當我攞部電話

call Wilson 時，Wilson突然攞住2杯沙冰出現喺我面前。





『嗱，攞杯抖下啦』

我地入返去涼亭坐，我望住杯沙冰，細細啖拔嚟食，總係唔可以好放鬆咁食，食食下，我偷望Wilson，佢發覺到我望佢就一路

食，一路向住我笑。佢嘅笑實在令我放鬆唔到，只會令我個心卜卜咁跳。Wilson佢....出聲了.....

Wilson：『其實你知唔知點解我會約你嚟海洋公園玩？』

『下，因為你想嚟，咪搵我陪你囉』

Wilson：『咁你又知唔知點解Jessica今日嚟唔到？』

我嚇了一驚，點解Wilson會知Jessica嘅野？Wilson見我嚇到眼都跌埋出來，佢笑了一笑

Wilson：『有樣野你知，但應該估唔到』

『下，係咩？』

Wilson：『Jessica鍾意Kenneth，你無理由唔知，Kenneth係我兄弟，你都應該知』

『下.....唔通.....』

Wilson：『Jessica話咗比Kenneth知你約佢今日嚟海洋公園，由於係我約你，Kenneth當然之後同返我講，Kenneth專登叫Jessica唔好嚟，仲叫佢呃你記錯時間，然後約Jessica今日去行街食飯睇戲』

我聽到依度，我心諗：咁Wilson咪會知我叫Jessica嚟嘅目的？我個心開始有少少驚

『sorry呀』

Wilson：『哈，咁又唔使say sorry，你聽埋我講落去先啦』

『嗯』

Wilson：『你係咪好好奇點解阿Jade會知你同我嚟咗海洋公園』

我震驚了，我眼前依個Wilson好似知好多野咁，突然覺得佢有啲狡猾有啲恐怖。

『你有啲恐怖....』

Wilson：『haha，睇嚟我依個表白變得有啲特別了』

我聽完佢咁講，心跳又加速了。

Wilson：『至從上次同你喺石灘共渡咗一晚夜，之後你無再搵過我，所以我都唔敢搵你了，我想知更加多關於你嘅野，但無理由問你果2個friend，之後我諗起阿Jade，我記得佢講過你寫過一個故事關於威廉王子，我好好奇，就諗住whatsapp阿Jade』

『點解你有佢電話號碼嘅？』

Wilson：『上次食完野你去咗廁所，跟住阿Jade就同我交換咗電話號碼』

Wilson：『我問佢攞咗你個故嘅名，然後上網search，第一個就係紙言，個作者名仲係你最初果個高登名，我就知我無搵錯。睇完之後，估唔到你咁鍾意FF野』

『咪笑啦，年少無知呀！諗到咩緊係寫咩啦』

Wilson：『睇嚟你都想同個威廉王子有個good ending haha』

『以前啲野我唔記得了，唔好問我啦』我語氣變得細聲，但Wilson應該聽到

Wilson：『重點係，當年我應承過你陪你嚟海洋公園』

『所以今次你就約我？』

Wilson：『嗯』

『其實唔記得咪算囉，你唔駛要特登約我嚟』Wilson搞到我好尷尬，我都唔敢望佢了

Wilson：『其實我想知你有無鍾意我，所以我叫阿Jade去問你，點知阿jade之後轉述返比我聽原來你放棄咗我，正正因為1，2個月前我喺高登留言果樣野，所以我咪諗住約你嚟海洋公園，睇下可唔可以挽回你嘅心意』

『um…..其實你依家係咪同我表白緊？』

Wilson：『ha，係呀，咁......你仲鍾唔鍾意我呀？』

『下，我.....我都話放棄咗你啦』

突然Wilson咁問我，我都唔知點答好，跟住我就一支箭尷尬咁走咗

Wilson：『我知你仲鍾意我嘅，係咪？』

Wilson不斷跟住我尾

『咩喎，邊有！無呀無呀』我繼續行行行

Wilson：『我唔信！』

我突然停低，拎轉望向Wilson

『咁我答完你又點呢？』

Wilson：『下，err…..um…..』

『唔理你了！』

Wilson：『下，我唔明喎』

『算啦，無野了』

Wilson即刻跑到我隔離：『我鍾意你！』

我望住Wilson：『哦！』之後我又走咗去了，但係我心情好開心，個心不斷係咁笑

Wilson：『下，啫係點呀？』佢又跑上嚟

『果十個字呀！』

Wilson攞晒佢10隻手指出嚟，個口不斷郁，隻手又開始數，我見到，我笑了。

Wilson突然捉住我，情深款款望向我，但講得好含蓄：『Kelly，um…..你....可唔可以做我女朋友？』

我低下頭，偷偷笑了，之後我以一個認真嘅表情望向Wilson

『Wilson，你知道嗎，我覺得你對我好好，喺石灘果晚我真係好多謝你，同你一齊我真係好開心，所以呢.....』

依個時候Wilson插口

Wilson：『又係你叫我講10個字，講完你又派好人卡比我，總之唔問你，你唔想就算啦』之後Wilson慢慢咁離開我身邊

我心諗：死了，我唔係有心hurt Wilson，但我都未講完！

我好無奈咁慢慢走上前，用我2隻手拖住Wilson嘅右手，Wilson見狀突然停低咗

Wilson：『你唔係....』

『頭先你都唔比我講埋落去』由於係我主動拖Wilson隻手，所以我好尷尬，唔敢直望佢

『我頭先想講，因為你對我好好，我好開心，所以我都好想有個對我好嘅男朋友呀，但係你頭先又唔比我講埋落去！』隨即我細細力打咗Wilson一下

『搞到我依家咁鬼尷尬！最衰都係你！』

Wilson：『haha，咁依家到我拖實你了，就算有手汗，我都要拖住你！』

我向Wilson笑了一笑，然後繼續我地餘下嘅旅程。





上天為這對情侶安排了一切，從命運中偷偷地幫助Wilson履行當年對Kelly所有的承諾。
Kelly就是憑感覺找到了真愛.......









 


---------------------------------------------------------------------------------------------------------------------------------------------
仲有個番外篇，請繼續留意..... 有睇大結局嘅人，我好感激你有繼續睇落去，小女子自知文筆差，加上係新手，寫得唔好請多多包涵！
----------------------------------------------------------------------------------------------------------------------------------------------