森の浪人去旅行 Season 2 米蘭篇 （Update ：20250718 #9）: 森の浪人去旅行 Season 2 米蘭篇 #4 20250613
讀者須知：
1. 本物品內容可能令人反感;不可將本物品派發、傳閱、出售、出租、交給或出借予年齡 未滿18歲 的人士或將 本物品向該等人士出示、播放或放映。
2. 讀者必需年滿18歲。
3. 本作品純屬故事創作，人物、插畫、故事完全虛構。
讀者責任：
1. 請支持原創。
2. 歡迎讀者到 Patreon、Instagram留言。
3. 請以Patreon登入gmail，發一個訊息列明，如「希望得到第五集。」，以便管理、多謝合作。
紙言只有純文字，Patreon 會有 文字＋插畫
Patreon: https://patreon.com/firstfantasy_mori?utm_medium=unknown&utm_source=join_link&utm_campaign=creatorshare_creator&utm_content=copyLink
必須先以gmail 成為免費會員，並以同一gmail send 一個message 畀我，列明要求指定內容。
森の浪人去旅行 Season 2 米蘭篇 #4
既然Durante幫我準備好夜遊環節，咁我就可以照原定計劃繼續浪漫嘅一人藝術遊。喺米蘭，唔可以唔去嘅就係恩寵聖母教堂，因為呢度就係名畫《最後的晚餐》嘅收藏地。
雖然已經聽晒全世界嘅意見要預早幾個月嚟book飛，但嚟到現場，仍然係人山人海，仲要等一大輪先入到場，每場人數又確實唔少。唉，我呢個所謂「一人之旅」，都只係我自己嘅幻想，現實係我身邊有成百上千嘅人圍住我。雖然已經有人潮管制，但整個參觀過程仍然令人覺得窒息而且衝忙，好想搵個人少啲嘅地方抖抖氣。
正當我諗住離開參觀場地嘅時候，畀我見到一個牌寫住「往天台參觀」。
哦？原來呢度都有天台，咁就好喇，可以上去抖下氣。當然，我即刻又諗，分分鐘上面又係一堆人，唉，不過都去睇下啦。
我轉咗個彎，入咗個門口，見到有個reception。呢度嘅人明顯少咗，但原來要上天台，要畀多7歐。咁唔怪得人少咗喇。不過，就係因為咁，我決定上去抖氣。畀低咗7歐，之後就沿住樓梯上樓。
經過幾十級樓梯就上到呢個所謂嘅天台，不過，呢度又好難講係天台嘅，因為其實都仲係室內，只係一個好似上多咗一層，樓底比較高嘅一個地方。當然，一串長長嘅玻璃，遊客可以透過玻璃欣賞到外面遠遠嘅米蘭舊城區景色，咁都係一個唔錯嘅觀光地方。
置身喺古典嘅建築之中，突然會有一種令人覺得自己高貴咗嘅感覺。只係身邊嘅人仍然唔少，不過無頭先咁多，咁都算可以抖下氣嘅。我又諗，如果有好似教堂塔頂嘅通風天台就更加好喇。
正當我休息夠，以為呢度無咩可以再睇嘅時候，我竟然見到，又有一個牌寫住「往天台參觀」喎。
吓？仲有天台？咁即係...頭先下面寫嘅「天台」唔係講緊我而家呢度啊？噫？咁又有地方可以去喎。於是，我就向往天台嘅方向行。又轉咗個彎，入咗間房，之後我就真係畀呢度嘅設計嚇親喇。因為而家喺我面前嘅竟然係另一個recpetion，上面寫住「往天台：10歐」。
呢個安排我真係第一次見，完完全全係引咗你上嚟先再劏你嘅仆街把戲。講真，我真係唔相信喺意大利竟然會有咁嘅情況出現。
正當我諗往𨳒佢都費事，轉身就走嘅時候，reception嘅職員竟然叫住我：你係咪香港人啊？
吓？呢位睇落上咗年紀嘅女職員，竟然會問我一個咁嘅問題？繼上次Durante話佢一眼就可以睇得出我係香港人之後，今次就係第二次有人可以一眼就睇得出我係香港人。既然佢咁問，我就直接答佢啦，不過我都諗定，呢10歐，我係唔會畀㗎喇。
我：係啊。
女職員：你想上天台啊？
我有少少尷尬，因為我真係唔想畀呢嚿錢：啊...
出奇嘅係，女職員竟然做出一個邀請我上樓梯嘅手勢：請。
喂，咁屈我10歐！想點啊？講句話「Chiara喺上面等緊我」嚟呃下我都好啊！反正你認到我係香港人咁荒謬你都噏得出咯，講埋Tania、Rosa都等緊我啊笨！
女職員：我哋唔收香港人入場費。
吓？咩料啊？有無咁痴線啊？不過，你咁講，我就睇下你咩料！
我：咁好？咁... 好啦，上去參觀下先。
於是，上咗樓梯。
女職員仲喺我嘅視範圍嘅時候又講：陣間天台女團會喺天台練習。
乜嘢啊？天台女團？全民造星啊？聽都未聽過喎。當然，我可以簡單理解為，有班女喺上面等緊我。不過...乜嘢啊？聽唔明喎，乜嘢練習啊？軍事演習啊？仲要香港人有優惠？
我轉咗兩個樓梯圈就上到呢個真正嘅天台。
呢個係一個真真正正嘅天台，視線喺一般舊城區嘅建築物之上，而且露天，可以抖啖室外嘅空氣。最重要嘅係，呢度除咗我之外，無其他遊客。當然啦，除非有第二個香港人肯畀地下嗰7歐上嚟，如果唔係，搵鬼畀埋嗰10歐咩。
由呢個360度嘅觀景台，我可以隱若見到兩個米蘭嘅標誌性建築。一，就係米蘭大教堂。今晚要去嗰度搵Durante。二，就係聖西路球場。不過，都只係隱若見到，一啲都唔清楚。加上，球季已經完結，除咗去打個咭，我諗去到都無咩睇。
正當我以為自己係喺度享受緊一刻寧靜嘅時候，一陣強風由我嘅背後吹嚟，我可以感覺到一股力量湧緊過嚟。我即刻望下四圍嘅環境，睇下有咩異樣。
我見到，從我背後好幾百米嘅舊城區屋頂上面，有十幾個黑點排成一條打橫嘅陣式喺度跳躍，情況有啲似係一個喺天台嘅黑浪向我湧緊過嚟！
我又好奇呢啲係咩黑點，但又好似我越遲反應回避，我就越危險一樣。不過，我已經無時間諗喇，黑點浪要衾過嚟喇，我根本無得走！
黑點浪越近我，我越係可以睇清楚，原來呢啲黑點，係一班好似跑酷嘅人一樣咁，喺舊城區嘅屋頂上面一個接一個屋頂疾走！幾十個人幾乎同時間穿越我嘅位置。我嘗試追住佢哋嘅動作，睇清楚係咩事。
全部人動作太快，我除咗可以180度轉身，勉強繼續保留佢哋喺視線範圍之外，根本睇唔清楚佢哋係何方神聖，情況就好似目擊UFO一樣。
正當我以為黑點浪已過嘅時候，一個大黑點出現喺我身邊左邊嘅高位，我未睇清楚呢個黑點係乜，但係黑點嘅黑影已經覆蓋住我。
我慢慢望向呢個喺我身邊出現嘅超近距離黑點，原來係一個全身穿著黑色保護衣嘅高瘦長髮意大利女人，佢嘅腰部圍住一條同樣係黑色嘅斜腰布。由於由唔知邊個點跳到我呢個天台嘅石𡒊上面，降落嘅時候，保持住右腳踏前，左膝壓地嘅降落動作。貼身嘅黑色保護衣喺陽光之下，令我可以完美咁睇到呢位高瘦長髮意大利女人嘅身材輪廓，絕對係運動加戰鬥型嘅身段。
呢種姿勢固然係靚，但同時亦將我嚇死。
女人望向我：哦？你係香港人？
嘩！又係一眼就得出我係香港人？咩料啊？
我驚魂未定：係...係...係啊。
女人：你嚟呢度做咩啊？
我：我...我...我嚟旅行囉！嚟呢度朝聖...好正常啫。你係咩人啊？
女人聽到我咁問有啲愕然，重覆我嘅問題：我係咩人？
女人好似懶得解釋，又講：咁你慢慢啦。
然後，女人就喺我面前沿往天台石𡒊疾走咗幾步，一躍而起，跳到對面樓嘅屋頂，然後再繼續前進，追上其他人一樣。
我呆咗喺天台，諗返頭先reception嘅女職員話「天台女團會喺天台練習」，咁即係話，佢哋就係「天台女團」！
我呆咗好耐，有啲接受唔到短短半日嘅參觀竟然會係咁令我意想不到。
我決定由恩寵聖母教堂行去米蘭大教堂，利用呢段路好好整理思緒，又不時望向建築物嘅天台，睇下仲見唔見到「天台女團」嘅身影。
森の浪人去旅行 Season 2 米蘭篇 #4 - 完
Patreon: https://patreon.com/firstfantasy_mori?utm_medium=unknown&utm_source=join_link&utm_campaign=creatorshare_creator&utm_content=copyLink
必須先以gmail 成為免費會員，並以同一gmail send 一個message 畀我，列明要求指定內容。