【愛情 | 師生 | 真人真事 | 校園】如果當年冇去到就好: 1. 雖不是初見 但是初相識

中四上學期啱啱完咗
臨放假前 夜晚會有個高中限定嘅聖誕舞會
芷莎係一個幾內向嘅人 但學期初 唔知點解做咗副社長
而學校嘅傳統係 每年聖誕舞會所有社長副社長都要喺台上表演
所以芷莎就算幾唔情願 都一定要去聖誕舞會

距離表演仲有5至6個節目
芷莎嘅兩個摯友都冇去聖誕舞會
所以 當場一兩個熟人都冇
內向嘅芷莎寧願企喺會場邊都唔想隨便認識新朋友





就在此刻
子濤走去芷莎隔離
「陣間可唔可以一齊影張相？」
芷莎俾突然出現嘅子濤嚇親
但佢嘗試扮鎮定 點咗下頭
子濤拜託咗隔離一位學生幫手影相
芷莎企喺子濤身邊 盡力顯得唔尷尬
影完相之後 子濤對芷莎隨口講咗句「陣間ig send俾你」
芷莎當下先醒起 原來之前佢喺IG覆過子濤story




仲隨口問過子濤幾時生日

子濤其實係一位啱啱入行嘅化學老師
咁啱教嘅第一班就係芷莎所在嘅嗰班化學
子濤唯一負責嘅課外活動係制服團隊
咁啱都係芷莎自中一就參加緊嘅制服團隊
所以 芷莎同子濤一早就講過一兩句
但一直都冇真正閒聊過

「點解你嚟參加聖誕舞會嘅？」





「因為作為副社長被迫要上台表演 所以要參加」

「原來你做緊副社長㗎？你唔講睇你唔出」

「哈哈 我都知我比較內向。咁你呢？做咩嚟聖誕舞會？老師應該唔係強制性參加㗎喎」

「好奇 所以特登留低見識下呢間學校嘅聖誕舞會」

氣氛一直都好尷尬 芷莎諗住傾多幾句就搵藉口離開
搵個地方靜靜地匿埋 等到差唔多表演先出翻嚟

「你講到你被迫嚟 所以自己一個？」

「係…你呢？你都係自己一個企喺度嘅？」





「我都冇乜熟嘅學生喺度 所以咪嚟搵吓你傾偈」

芷莎聽到後 決定放手一搏
既然子濤都係自己一個 咁不如同佢傾吓偈解下悶
反正今晚傾完之後 聽日起身就唔會記得件事
但佢諗都冇諗過
原來 佢地兩個刻骨銘心嘅故事就喺呢刻開始