搭錯線：錯誤的時間遇上你: 第三十一章：猜猜我是誰

「成日遲到既Felix」我笑住講。
 
「咁快就估到既。」felix無趣咁講。
 
「你把聲好易認啦！」
 
「係喎，你今日唔洗練波咩？你唔似會嚟圖書館喎？」
 
「Hailey你知唔知漫畫放係邊？」Felix係到望緊附近書櫃。
 




「你唔係為左睇漫畫，而唔去練波呀嘛？」我企左起身，行去後面書櫃睇。
 
「我地隊長kyle哥今日都冇嚟，有啲人又比老師捉去補做功課，咁咪唔洗練波！」felix 蹲低搵書。
 
「Kyle冇嚟？你知唔知佢同katy發生咩事？」我又跟住fliex蹲低搵書。
 
「我點會知佢地發生咩事！我淨係見到Katy塊臉都黑過包公，跟住就叫走左kyle。仲有Hailey，你唔好介入佢地咁多。」Felix企起身，繼續行去左邊書櫃。
 
「朋友都有界線。佢地兩個既事自然會處理，反正Kyle又唔係第一次，唔洗驚啦！」Felix繼續講。
 




「咩Kyle唔係第一次？」我跟住Felix追問。
 
「佢係我地個級人氣王，唔係第一次拍拖，有幾次經驗，嘈架呢啲佢會知點處理。Nice！」Felix搵到本老夫子。
 
「Hailey你有冇帶學生證？」Felix手上仲有幾本漫畫。
 
「有呀。」我地係書櫃行返出嚟，行去前面借書處。
 
「借你張學生證借書得唔得？」Felix貶貶眼。
 




「你記得唔好過期，過得太耐老師會搵到上班房。」我提醒Felix。
 
「當然當然！到時你提我！不過你今日放學得唔得閒？我要啲野想同你講！」Felix哈哈笑住講。
 
「今日我唔得，要補習，你有咩事WTS講咪得。」
 
我地已經行到借書處。
 
「圖書館要安靜，你地講左好耐野，會嘈住其他同學温書。」突然聽到沉穩既聲音從後面傳出。
 
我成個人僵住，慢慢望向電腦身後，點解會係佢會係到？
 
Felix默默放低手上既漫畫，同時我拎出學生證。
 
「Hailey，我仲以為你借past paper。」查利揚望左枱上漫畫一眼，漫不經心咁幫我借書。




 
「err呢啲漫畫係佢，佢純粹冇帶證。」我即刻擺擺手咁講。
 
「記得2月16號還書，過期要罰錢。」查利揚眼尾略略掃過felix一眼講。
 
「知道知道！」Felix點點頭講。
 
「查sir，你要搵既中史通解係呢到。」圖書館老師Miss Leung從借書處身後既門走出嚟。
 
「唔該晒。」查利揚講。
 
「唔洗客氣，我都要唔該你啱啱幫我搞埋借書，明明你坐係到等就得。」Miss Leung 講。
 
「唔緊要，反正我係到等都係冇野做。況且見到我班上面既學生，順便我啱啱就有野想搵佢傾。」查利揚同Miss Leung 講。
 




「Hailey，我地出去圖書館講。」查利揚微微一笑咁講。
 
咁突然，有咩野要傾？