每消滅一隻怪獸，我條女對波就大一個cup！: 2

我見到個天穿咗個好大嘅窿，然後有一隻體積巨型嘅螳螂，穿過個窿，出現喺天上面。

我嚇到呆咗，心諗唔係眼花下話？

接住下一秒，隻螳螂從天空急速降落到地面，「砰」一聲一下泰山壓頂，即場砸爆咗一架準備埋站嘅巴士。

成架車連埋個司機當堂被砸到變「柿餅」，車身零件同碎片飛散一地。

見到咁嘅畫面，在場所有人個個都嚇到we嘩鬼叫，走夾唔抖。





我同Yanny亦都第一時間揼低所有行李，手拖住手，轉身逃跑。

其實幾日前我地喺日本旅行嗰陣，喺網上面已經見過一啲傳言，話香港有地方出現咗怪獸，甚至有人拍片擺咗上網。

當時我仲以為係啲AI合成片，以為係流料，點估唔到原來係堅嘢！

嘭唥！！！

隻螳螂佔據喺馬路中間，揮舞住巨大嘅手刀肆意破壞，隨手一嘢就劈穿咗機場巴士站嘅上蓋。





我同Yanny跑跑下，見到頭頂有好大塊假天花冧緊落嚟，於是即刻停低兼向後退。

但喺後退嘅過程中，我地唔小心互相kick親大家隻腳，搞到我地兩個人一齊向後仆低。

跌低之後我無咩事，不過Yanny就好似撼親後尾枕，成個人暈咗。

「Yanny！你無事呀嘛？醒下啦！」

我拍一拍佢塊面，嘗試嗌醒佢，但對方完全無反應。





眼見隻怪物就嚟殺到埋身，危急之下，我雙手抱起Yanny，帶住佢一齊逃跑。

呢一刻，巴士站內非常混亂，大家你推我撞，爭相逃跑。

然而就喺呢個人人自危嘅時刻，突然出現咗一班人。

一班著住黑色盔甲、揸住刀槍嘅裝甲人。

啊！！！！！！！

佢地一邊大嗌，一邊挺身而出，衝過去攻擊隻怪物。

啊！！！！！！！

雖然雙方體型相差巨大，但係嗰班裝甲人卻毫不畏懼，勇往直前。





我唔知呢班人係何方神聖，我淨係知依家我要做嘅係有咁遠跑咁遠。

我抱住Yanny一路向前跑，大約跑咗百幾二百米，我發現左手邊轉角有個暗角位。

佢個位置睇落都幾隱蔽，加上同隻怪物相隔一段距離，應該都算安全，於是我就抱住Yanny匿入去暫避。

行到入去，我將Yanny慢慢放落地下，然後再嘗試叫醒佢，但係對方依然都係不省人事。

喺咁嘅環境之下，我都做唔到啲乜咩，只能靜靜咁等佢醒返。

𡁻𡁻𡁻！砰砰砰砰！鏘鏘鏘！

匿喺暗角嘅我，遙遠咁望住嗰班裝甲人同隻巨型螳螂激烈戰鬥。





我心諗究竟發生咩事？點解香港無端白事會出現怪獸？

「Hello！」

我個心啱啱先定返少少，點知突然間有個人無啦啦喺後面拍我膊頭，搞到我又嚇咗一跳。

擰轉面，我見到一個白色爆炸頭，睇落好似科學怪人咁款嘅老伯。

佢身上笠住一件白色嘅風褸，件衫嘅左上角印有「森立製藥」四個字，而喺佢手上就拎住一部iPad同一沓傳單。

「阿伯，咩事呀？」

「唔好叫我『阿伯』，我個名叫做『晴天博士』，我係一名科學家。」

個阿伯先自我介紹，然後伸手遞咗一張傳單俾我：「後生仔，你有無興趣加入我地成為『升cup戰士』？」