每消滅一隻怪獸，我條女對波就大一個cup！: 4

「覺得點呀？你想唔想你女朋友都好似我咁，擁有一對大得嚟又軟綿綿嘅波呢？」晴天博士問我。

「我…」

砰！！！

地下忽然間震咗一下，巴士站嗰邊傳嚟一聲巨響，打斷咗我嘅說話。

離遠望過去，嗰隻巨型螳螂喺被人圍攻之下，不停揮動兩隻手刀，猛力一鋤，直接鋤爆咗成條馬路。





成個巴士站連帶附近嘅建築物，統統都被隻怪物摧毀，化成一堆頹垣敗瓦。

雖然班裝甲人喺人數上面佔優，但係隻螳螂非常之頑強，不斷作出抵禦同還擊。

「大家之所以會戰鬥，同隻怪獸以死相搏，就係為咗得到嗰粒可以令女人對波變大嘅紫石？」我問晴天博士。

「無錯！佢地每一位都係英勇不屈、為夢想而戰嘅『升cup戰士』！」

「為夢想而戰嘅…升cup戰士？」





「你有無夢想？你鍾唔鍾意大波？你願唔願意好似佢地咁挺身而出，為巨乳而戰？」晴天博士一輪嘴咁追問我。

「但就算我打贏咗隻螳螂，咁我女朋友都係大一個cup啫，咁都未算係巨乳。」

「呢層你放心，怪獸並唔只得一隻，除咗呢隻螳螂之外，以後仲會有其他怪獸出現。總之消滅得越多怪獸，得到越多紫石，咁你女朋友對波就可以變得越大。」

「咁…咁啲怪獸又係咩來頭？」

「呢樣嘢遲啲先同你解釋，總之當務之急係要消滅咗眼前呢隻怪獸先。」





晴天博士伸隻手入去衫袋入面，拎出一隻黑色手環。

「呢個係變身器，佢採用咗最先進嘅納米粒子科技，只要你㩒一下中間粒掣，咁就會立即披上戰甲，變身成為『升cup戰士』，如果你想去戰鬥嘅話，咁就唔好猶豫，立即變身啦！」

一直以嚟，我嘅夢想就係希望Yanny變成大波妹，家陣眼前有個咁樣嘅機會，實在令我非常之心動。

開頭嗰陣我都講過，Yanny個樣有幾分似鄧麗欣，算係一個靚女，佢對腳又長又直，籮柚又大又趷，如果有埋波嘅話，咁就真係無得彈。

我吸一啖大氣，瞇埋眼，試幻想一下Yanny變成大波妹之後個樣：

豐滿軟熟、前凸後翹、瘦底大波、天使面孔魔鬼身材……

我一路幻想，個心就一路湧現出無比嘅勇氣。

就係憑住呢股勇氣，我下定決心要變身成為升cup戰士。





雖然係要同兇險嘅巨獸埋身肉搏，但呢個世界無嘢係不勞而獲，只要能夠令Yanny變成大波妹，就算上刀山落油鑊我都在所不辭。

於是，我戴上變身手環，決定去戰鬥。