天水圍成長故事: 14.受傷

到學期尾都忙住考試
Yan平時雖然唔太關心成績
但佢最近都有啲緊張成績
因為佢既成績都去到尾段
如果下學期考試又炒車，佢都好大機會會留級
Yan成績點差都好，都唔想咁
特別佢家姐已經中三輟學
佢唔想阿媽又發脾氣
所以佢最近都同啲同級既同學溫書，同我少一齊玩左



我成績雖然都係一般
但都係順其自然咁由佢啦
再加上同阿詩既事，係我個級都傳開左
我都變左有名既「渣男」
雖然我知道唔少仔都好羨慕我可以食到高兩級既「姐姐」
仲要yan其實原來之前都唔少人追
不過變左我同學學校同級既人都玩得唔太埋

唔想溫書既我都開始成日蒲街打下波
都識到啲「mk仔」


一開始雖然冇比人踢入會，但都叫識到下啲「朋友」
我都開始識得食下煙飲酒咁

直到一日我如常係球場踢波
有幾個比較生面口既金髮mk，其實佢地一啲都唔好波
甚至乎可以話係屎波，睇佢地校服，應該係外區既學生
雖然佢地屎波，但打波好茅
佢踢左我同我啲朋友幾次
我忍唔住屌左佢地幾句
之後就不歡而散



點知佢地第二日帶左幾個人黎「覆焯」
好衰唔衰個時得我一日到左
變相我比幾個人追住打
係依個時候，平時同我冇咩交流既區內頭目「阿傑」出黎同班人互屌左幾句之後搞掂左件事
正當我想多謝佢既時候，先發現佢後面係阿yan既家姐
阿傑：聽我條女講你係佢妹條仔wor
我死哂狗咁：係呀，多謝傑哥
傑：自己醒定啲啦，有咩話識我阿傑啦
之後佢地就走左

隔左陣之後，阿yan就勁擔心咁打黎
我：冇事呀。
：冇事？唔係我家姐見到，你比人打死左啦
我：咁人地要找我麻煩我都唔想既….


勁緊張既yan之後要我係佢屋企樓下等佢