錯位時空下的雙向奔赴: 第一章：Ocamp的相遇

2016年嘅夏天，香港熱得嚟有啲焗。陽光透過港大學生會室嘅玻璃窗，灑落喺一堆充滿朝氣嘅年輕人身上。呢度正係緊急召開嘅Ocamp組爸組媽簡介會。林家駒，人稱Cyrus，遲咗少少推門入嚟。「唔好意思，頭先練波有啲晏。」佢身穿一件簡單嘅白色波衫，短褲，波鞋，高大嘅身型同結實嘅手臂滲住微微汗珠，充滿住陽光同活力。佢嘅出現，即刻吸引咗唔少女組媽嘅目光，有幾個細細聲噏：「嘩，係Cyrus喎！工商管理個籃球隊隊長！」「真係幾似洪嘉豪㗎～」Cyrus尷尷地笑咗下，搵個位坐低。佢目光掃視全場，然後，停咗喺一個角落嘅女生度。嗰個女生紮住一條鬆鬆哋嘅馬尾，露出光潔嘅額頭同優雅嘅頸線。佢靜靜地坐喺度，好專心咁聽緊負責人講解，手指間支筆輕輕轉動。佢著住一件淺粉色嘅T恤，襯條淺色牛仔褲，睇落清新又脫俗，個樣標緻得嚟帶點仙氣，好似……好似佢之前喺canteen見過幾次，叫Regina咁話？教育系嘅？個名好似係叫葉嘉怡。Regina好似感覺到有人望住佢，微微抬頭，目光同Cyrus撞個正著。佢即刻有啲慌張咁低下頭，耳仔尖微微泛紅。心諗：「死啦，係Cyrus……佢幾時入咗嚟㗎？佢係我哋呢組嘅組爸？」佢個心噗通噗通咁跳，好似有隻小鹿亂撞咁。其實由大一開始，佢已經有留意呢個喺球場上奔跑、喺canteen同friend吹水笑得好燦爛嘅男仔，只係一直冇咩機會認識。

 會議結束，大家開始自由組隊。Cyrus深呼吸一下，鼓起勇氣行過去。「Hello，你係……Regina？」Cyrus露出佢招牌嘅陽光笑容，語氣有啲唔自然嘅緊張。Regina抬起頭，努力保持鎮定，但把嬌嗲嘅聲線出賣咗佢嘅緊張：「係啊……你係Cyrus吖嘛，我認得你。工商管理系嘅。」「係啊，冇諗到你都做組媽。」Cyrus抓抓頭，「唔知你……有冇組員呢？如果未，我哋可以一組啊。」「我……我未啊。」Regina內心狂喜，但表面只係溫柔一笑，「好啊，咁以後請組爸你多多指教喇。」就係咁，2016年嘅Ocamp，將兩條平行線拉埋咗一齊。佢哋一齊帶住班freshmen玩遊戲、一齊喺深夜傾計傾到唔願走、一齊處理組仔組女嘅小情緒。Cyrus發現Regina唔止樣靚，仲好細心溫柔，好識得照顧人；Regina亦發現Cyrus除咗運動勁、受歡迎之外，做嘢好有責任心，而且好搞笑，成日氹到大家好開心。有晚，佢哋同成班組仔組女喺邵逸夫堂外面嘅空地傾心事。微風吹過，Regina攬住件薄外套，靜靜咁聽Cyrus講緊佢嘅夢想。
 「……其實我老豆都想我畢業之後加入警隊。」Cyrus望住遠處嘅燈火，語氣難得認真。「佢成日話，男人老狗，要做啲對社會有貢獻嘅事。」Regina有啲意外：「警隊？我仲以為你會去打NBA或者從商添。」佢笑咗下。「哈哈，波可以當興趣嘅。」Cyrus轉頭望住佢，眼神明亮，「點啊，你畢業之後點打算？繼續教書？」「嗯，應該會試下申請做老師嘅。」Regina點頭，「教小學幾好啊，同班小朋友一齊幾開心。」「嘩，你咁溫柔，實好受學生歡迎。」Cyrus由衷咁講。Regina面一紅，好在夜色掩護睇唔到。「邊有啊……你先係啦，成日咁多fans。」語氣帶住自己都未察覺嘅少少醋意。Cyrus聽出咗啲咩，笑得更燦爛：「咩fans啊，組媽你笑我咩。」兩個人相視而笑，空氣中好似有啲曖昧嘅火花閃爍。但係，嗰份好感，始終冇人敢首先捅破。Ocamp好快就結束，佢哋各自忙於final year嘅功課同前途，嗰種心動，就好似2016年嘅夏天一樣，美好但短暫，被深深埋藏喺心底。Regina一直將呢份心意收埋，甚至冇同任何friend講。佢只係知道，自己個電話入面，多咗一個叫「組爸Cyrus」嘅聯絡人，而佢嘅ig，多咗一個叫Cyrus嘅follower，亦係佢默默關注嘅唯一一個account。佢哋嘅故事，喺2016年嘅夏天，輕輕哋開始咗第一章。但誰又估到，下一次嘅重逢，會喺一個佢哋都未曾想像過嘅場景，同身份之下發生。