【異世界】異式幽默: 序章：飲啦

序章：飲啦
 
 
「我叫你幫我整張poster，幫間運動鋪做優惠推廣，你寫一波三折做咩？你係咪覺得寫啲爛GAG好好笑？點做三折promote啊，諗都諗到啦！」
 
「都10點喇，收工先喇唉。聽日好同我搞掂埋佢，唔係又OT啊。如果唔係阿Roger同阿Thomas都飛咗去日本做嘢，我都唔會交俾你跟。」
 
「咁我聽日會早啲返嚟咖喇，唔好意思。」我輕輕的點了一下頭，就開始收拾好物品，準備下班離開。
 
不過上司沒有讓我喘息的機會「聽日梗係要早啲啦。麥錦佑你都廿到炆啦，本身已經冇咩sense，做啲嘢又甩甩漏漏咁，仲講埋曬啲無聊爛GAG。依家搞到我聽日都要陪你早返…」




 
上司實際的「教誨」內容，我也不記得太清楚了。畢竟每隔幾天就會「袋錢入我袋」，大概不是責備我的責任心、就是踐踏一下我的觸覺等等。算不上習慣了，但起碼是麻木了。已經分不清究竟是上司的性格問題，還是問題是出自我身上。
 
或許真的是我問題吧。
 
「叮」
 
「等埋啊，阿佑。唔該唔該。」
 
在我沉醉在屬於我自己獨有的個人聊天室時，一隻手掌擋住了我身處的升降機門。升降機會隨即打開。




 
眼前是一個戴著圓框眼鏡的男子，在門打開後走了進來。
他是我的同事阿占，是另一個部門的同事，比我遲幾個月加入這間公司。最近聽說他快要升職，正式成為設計師了。而我還是那個原地踏步的助理。
 
「錦佑點啊？做咩呆曬咁嘅。係咪俾阿姐屌完好頹呢。」阿占拍一拍我的肩膀。
 
「又玩我個名…冇…冇嘢啊，我諗緊嘢咋嘛。」我說。
 
阿占是一個十分爽直的E人，有時都E得讓人措手不及。不過始終大家是同期加入公司，有種相依為命的感覺，所以算是少數在職場中能夠做到朋友的人。
 




「諗諗諗，今晚你都冇約人咖啦，去食飯啦。」阿占將手臂架在我肩膀上說。
 
「今晚…我…」說實話，其實我根本沒有心情去。我只想靜靜的一人吃個飯、看動畫、玩電腦，然後睡覺結束今天。
 
最後我還是拒絕了，我借意說我已經約了其他朋友為理由，故意走與回家相反方向的路和阿占分別。
 
在便利店買便當，還有水果汽酒，似乎已經是今天最值得回味的時刻了。
在回家的路上，我一直想，究竟我在做什麼。小時候曾經幻想過成為的大人，我做到了嗎？我有讓小時候的自己失望嗎？
就在我由幼稚園回憶至中學時期之際，突然阿占出現在我眼前。
 
「屌啦，又話約咗人？」阿占笑著問。
 
「欸……嘻嘻，我話橦樓會約人啊，因為樓約人(紐約人)啊。」我除了講爛GAG，就不知道怎樣回應好了。
 
「九唔搭八嘅你，唔好理喇，飲啦！」阿占隨手拿起我袋中的水果汽酒，立刻打開了。




 
幸好今天便利店有三罐優惠。就算現在和他一人喝了一罐，仍然有多一罐可以回家再喝。
於是我們就在公園找個位置坐下，他就一邊喝著水果汽酒，一邊看著我用餐。
 
「你唔想食咪話唔想食囉，唔怕講喎。」阿占說。
 
「唔係，咁…我都唔知，廢事搞到你掃興啊嘛。加上我今日唔係咁開心。」我說。
 
「我都明嘅，頭先臨走嗰陣都聽到你俾你阿姐屌到上天花板。」阿占說。
 
「係喎，點解你呢個鐘數仲喺度嘅，平時唔係最准時收工係你咖咩？」我問。
 
「以前就係，就嚟轉正呢要跟多咗嘢喇。」阿占說。
 
他想了想，遞了啤酒到我面前示意碰杯。「冇事嘅，只要你做好啲，佢就唔會有位入你啦。」




 
碰了一下罐子喝了一口，我繼續：「鬼唔知咩，但係做唔到佢要求就係做唔到。可能其實都唔關sense事，就算去到邊結果可能都係一樣。真係好想一架貨車撞埋嚟，轟一聲就喺異世界醒返。」
 
阿占說：「你又講你啲笑話啊？去到易世界就易啲咁咩。」
 
「唔係啊，異形個異啊。即係同現實世界完全唔一樣嘅世界，例如你穿越轉生去咗星球大戰嘅世界咁。」一時忘記了阿占不太熟悉異世界這些東西。
 
「哦~，邊有呢啲咖，做人腳踏實地啲好過啦，依家抖抖，聽日再努力過啦。」雖然和阿占的關係不錯，但有時他的理性會讓人莫名生氣。
 
大家都將水果汽酒喝完了，我幫忙連同將吃完的便當盒一同扔掉。
然後正式和阿占在公園道別。
 
「話唔定好快到你升呢，加油啦。」他鼓勵著說。
 
「賺夠經驗值先有得升LV咖，話唔定到時我都唔喺度lu。」我說。




 
「咩唔喺度？！你唔係真係諗住俾貨車撞死啊？！」阿占驚訝道。
 
「唔係唔係唔係，我意思係我已經冇做呢度。」我解釋。
 
「啊…嚇死，咁好啦，早啲休息喇，拜拜。」阿占揮手倒後走著離開。
 
我正想揮手道別，他突然補充：「其實你幾好笑咖，不過試下做嘢嗰陣唔好用咁多笑話？」
 
說罷，他就轉身離開了。
 
「一返到嚟就入房，完全都唔同我地講下嘢。第時點算……」家人的所謂關心我都無暇理會。
 
 
回到家中，我走進睡房打開了電腦。看了最新一集的異世界動畫。




突然又將所有東西關掉，提不起興趣了。


我梳洗好後躺在床上，回憶一下今天的事。
回憶起最後阿占說的話。
 
「其實你幾好笑咖，不過試下做嘢嗰陣唔好用咁多笑話？」
 
「幾好笑」，現在的確是很可笑。根本我就是一個笑話了吧。
若果我連笑話都說不出來，我就是百分之一百的垃圾，還要是不可回收的那一種。
現在的我正是「只想找一個伴，但崩壞的命盤，樣樣亦太一般，無一欄可自滿……」
啊，不對…我連一個伴也沒有找過呢。
 
「無錯…我就係一個笑話…」我忍不住又將這句說話說出口來。
 
不過正正開口說出這句話就像發洩了一會，心情總算冷靜下來了。加上最後一罐水果汽酒的酒精的輔助下，倦意一擁而上，不一會就睡著了。
 
……
「豬神暗大，你醒下啦。」
 
「豬神暗大顯靈啊！」
 
「原來豬神暗大係真咖。」
 
突然被一群人和豬的叫聲吵醒了，打開眼一看；是一個豬鼻。
原來我在一個豬舍中抱住一隻豬睡覺。
而豬舍外就有十多名的人在做一個跪拜的姿勢。
 
「呢個咩夢嚟咖…痴線…」