思與痛

：「再唔食啲點心凍哂就唔好食，做咩，你係咪唔舒服？」
春卷、牛肉球多喼汁仲有啱啱蒸起嘅蝦餃⋯⋯
枱面上嘅點心全部都係去親點心鋪必叫，我最中意食嘅點心。
好溫暖又令人懷念。
奇怪—
我應該覺得心情好好先啱，但唔知點解覺得自己呢個鐘數唔係應該坐緊喺點心鋪飲茶，好似唔屬於呢個世界
慢慢唔知幾時周圍光線由光到有啲刺眼變得愈來愈暗。
我再睇唔清楚枱面前面嘅點心，再睇唔清楚……你個樣。
睇嚟我可能真係有啲唔舒服病病哋咁。





突然畫面一瞬間斷開，周圍好靜，好靜，靜到只係聽到頭頂嘅冷氣聲喺度運作緊，我先慢慢意識到原來啱啱只係發夢。
個腦海由乜都冇一片空白，慢慢好似開電腦loading轉菊花咁，
0%… 15% ….50% …..100%

意識慢慢由夢境回歸到現實世界，
原來只係自己幾個鐘前攤喺張梳化唔小心恰著咗。仲以為發夢可以暫時逃避現實，但點解發夢都會記得現實，現實嘅情感同記憶都會滲入夢入面，唔留一個完整嘅美夢俾我？咁呢個都算係一個美夢？係一份送俾自己嘅禮物？

我望一望床頭鬧鐘
4:20 AM
尷尬時間唔早唔晏咁。




我轆翻上床繼續訓，準備過多幾個鐘之後起身返工，突然手機震咗下，本來仲以為係垃圾推送，google photo 呢啲apps成日都會彈通知出嚟提你當年今日。畢竟今日係平日，仲要已經咁夜，正路應該唔會有人咁心血來潮呢個鐘數搵你，唔通有人有心提你半夜起身痾夜尿咩…….

點知彈出嚟嘅係一個好耐冇出現但又熟悉嘅icon 同人名
：「好耐冇見，你幾時得閒出嚟食飯？聽日好冇？」