有怪物怪: 記者的直覺
記者的直覺
「現階段警方仲要調查清楚先，有進一步消息會再同大家宣布。」失望而回的劉sir突破記者的重圍問鐘仔：「陳總嗰面點？」
鐘仔搖搖頭，示意陳總已經撒手人寰，然後再補充：「要等法醫驗屍先知死因，但內臟都係無晒，因為我去到陳總身邊嗰時，佢個肚已經好似漏氣汽球咁扁晒。」
「咁沿路有無啲可疑嘢？好似我哋之前揾到嘅腐蝕性痕跡咁。」阿查記得之前在其他案發現場附近均發現到有腐蝕跡象。
鐘仔又再搖搖頭，沒精打采地答：「無，今次乜痕跡都揾唔到，兇手好似比之前更加小心。」
「不過我印象中陳總嗰時好似仲係正常人咁，無話扁晒……」阿查自我回憶：「唔通我記錯？」
「阿sir，要出動到PTU，係咪即係間接承認咗兇手係怪物而唔係普通人？畢竟一單連環凶殺案從來都無要PTU出手嘅先例，啱啱你哋係咪遇到抱怒舜？」Faith轉移目標，這次的對象是站在一旁思考得出神的阿查。
「係喎！點解嚟增援嘅會係飛虎而唔係普通警察？點解我會無諗過呢個問題？點解我哋幾個唔會覺得奇怪？係咪連我哋自己心底都認為兇手係怪物？」阿查被Faith一言驚醒，問了自己一連串連自己也解答不到的問題，理所當然地，他也沒有回答Faith的問題。
「唔好意思，正如啱啱我阿大咁講，一切都仲係調查當中，暫時都無可奉告，有進一步消息，警方會再開記招交代。」阿查官腔地答。
然而，秉持報導事實真相的Faith又怎會輕易罷休？他鍥而不捨地問：「市民大眾都有知情權，而且呢件事仲要關乎到全城市民嘅安危，唔可以話仲調查緊就蒙混過關，況且我問你嘅係唔駛調查都答到嘅問題，唔該你回應吓。」
阿查被Faith問得心煩氣躁，其實他的心底很想告訴他剛才的一切，但此事明顯不能公開，一旦公開，就等於告訴市民大眾這世上真的有怪物，會造成多大的恐慌實在不得而知，而且更加會影響警方的公信力，日後執勤難度會提高。
「既然你咁講人權，」阿查巧妙地以其人之道還治其人之身：「除咗知情權，都仲有言論自由，而家唔講都係我嘅自由嚟，唔該晒。」說完後阿查便回到劉sir的車，遺下始終得不到答案的Faith。
劉sir和鐘仔已經一早在車內等阿查，看到他剛才被記者糾纏，鐘仔不忘調侃：「做咗高層有咩感覺？」
「頂你啦！串我？當劉sir死㗎？」阿查推一推鐘仔說：「個記者問嘅嘢我乜都無答過，但佢問嘅問題同其他記者唔同，都真係問起我……」
「佢問乜咁犀利？」鐘仔好奇地問。
「點解call support嚟嘅會係飛虎？合理咩？但神奇嘅係我哋竟然無人覺得奇怪。」阿查將自己的疑問一併問出來。
鐘仔聽後不發一言，連劉sir也啞口無言，阿查這又才說出自己的想法：「我哋唔覺得奇怪，可能係因為我哋心底都覺得兇手係怪物，而且連班高層都咁諗，所以先會派飛虎嚟。」
就在此時，一個意想不到的人出現在後巷附近，正好被劉sir在倒後鏡督見。
「你哋等等我。」劉sir說完便落車往那人跑去，邊跑邊叫喚：「劉稀愛，你做乜喺度？」
稀愛回頭看了一眼，沒有理會，繼續往前走。劉sir被她的回應氣得七竅生煙，大步往前用力抓住她再厲聲責問：「我問你做乜喺度？」
稀愛被弄痛了，但還是倔強地拒絕回應，只以怒目瞪了劉sir一眼便甩開他繼續走。
劉sir徹底氣炸了，走到稀愛面前截停她，發火怒道：「你係咪啞咗？我問你嘢，聾咗聽唔到呀？」隨即手起刀落，一巴掌就往她臉上摑過去。
然後巴掌在稀愛的臉珠前停住了，劉sir的理智重奪身體的控制權，可是她卻不知死活地挑釁道：「打吖！打喇嘛！做乜唔打呀？驚呀？驚畀你啲細見到你係咁對個女，破壞自己慈父人設呀？你衝出嚟問我嗰刻已經輸咗喇！連自己個女今日要返學、幾點返學、平時點行返學都唔知！咁基本嘅嘢都唔知，仲話係我老竇？你關心啲犯仲多過我，真係好笑。」語畢，她繞過劉sir離去，留下他獨自一人在街上承受太陽無情的嘲笑。
「劉sir，」阿查和鐘仔此時一臉緊張地跑到，凝重地說：「阿頂急call，好似幾嚴重，你聽吓。」
劉sir接過電話後便走到一旁，激動地對答幾句後，最後還是屈服於強權之下，憤怒地掛斷了電話。
「上車，」劉sir命令式地對阿查和鐘仔說：「我哋而家要去總處見處長。」兩人對視一眼，已經猜得出事態嚴重，沒有多問便上了車。
+x+x+x+x+x+x+x+x+x+x
「總編，我啱啱喺案發現場走，不過我見幾個差佬對鞋都污糟邋遢，成腳泥咁，我諗佢哋應該有同抱怒舜追逐過，附近有座山，我試吓去望埋先。」Faith說完後便掛線，獨自往山走去。
如果不穿過馬路，要先繞一個大圈才有天橋，下天橋後又要再繞一個大圈才能繞過私人屋苑。
「座山望落咁近，行落原來咁遠嘅，會唔會其實無上山，而係喺呢片樹林入面呢？」Faith在樹林調查了半小時，只發現了斷斷續續、淺淺的腳印，他簡單比對後，認為是兩個人的腳印。
「怪物應該唔會着鞋，呢兩組腳印應該都係啲差佬嘅，咁抱怒舜係點樣唔留腳印就穿過樹林？」Faith邊想邊拍照和拍影片。
拍完後，Faith循着腳印走出樹林，來到一片草地，此草地看上去面積也不少，是城市內罕有尚存的綠化帶。在植被的保護下，雖然腳印印不到在草地上，但卻留下被壓毀的痕跡。他跟隨着痕跡，發現了有第三個人的蹤跡。
「呢個壓痕，應該唔係直立兩隻腳跑造成，似係四腳跑，好似……狗咁？即係兇手果然唔係人而係怪物！」Faith既驚又喜，立即拍下照片，再跟總編輯報告：「我喺草地發現第三組痕跡，今次好明顯唔係人，你睇吓啲相，我哋今次仲唔爆view？」
報告完後，Faith繼續沿着壓痕走，卻在山腳被警察阻撓。
「你係做咩事『家』？『錢』面係警方封鎖線，『現』家行唔到。」警察對Faith說，但說話有點突兀。
「哦……做咩事座山封咗嘅？幾時先開返？我仲特登過嚟諗住影雀仔，呢度有季候鳥，一年一次好罕有㗎。」Faith扮成雀鳥發燒友亂說一通。
警察沒有多透露半句，只機械式地答：「警『差』做嘢，所以封鎖，你遲『的』再來。」
「阿婆走得快，一定有古怪。」Faith心想，他裝作失望而回，令警察放下戒備，然後沿着山腳走，尋找封鎖線的漏洞，好讓自己能上山尋找答案。
這條封鎖線長得看不見盡頭，Faith一度懷疑警察把整座山都圍了一圈。這條異常長的封鎖線已經徹底挑起了他的求知慾，他深信這座山上面一定有匪夷所思的事情發生過，足以令警方百口莫辯，被逼承認怪物的存在。
皇天不負有心人，沿山腳走了數百米後，Faith終於找到了封鎖線的邊緣，只要再往前走一段路，離開警察的視線便可以上山。
「山洞？」Faith往前再走數十米，發現了被樹根和長草遮掩、非常隱蔽的山洞口，得益於記者求真的精神和敏銳的直覺，他決定走進山洞內一探究竟。
「石屎？唔通係防空洞？但應該封晒入唔到先係㗎……」Faith靠手提電話電筒的燈光看到山洞的內部並非沙石泥土，而是混凝土建築，有分明的房間及走廊，進而推測。
Faith在防空洞內探索，他認為抱怒舜要是有棲息地的話，這裏絕對是其中一個大機會的地方，而且理應被緊緊閉鎖的閘門也不翼而飛，不就是有人使用的鐵證？
Faith就像玩角色扮演遊戲般，在未知的迷宮內探險、尋找寶物，唯一不同的是這裏沒有怪物──除了他想找到的抱怒舜外。由於沒有地圖，他能依靠的只有自己的記憶力，但防空洞內的構造全都差不多，有幾次他都感覺自己快要迷失，幸好有樓梯能向上走，這才勉強確定自己走在新的路線上。
這個防空洞越往上走路便越窄，房間的數量也越少，到最終只餘下一條爬梯，勉強只夠一個人上落，Faith能走的路也只有這一條。
「地下有幾條草，仲好翠綠，睇嚟最近有人出入過，或者就係班差人封山想揾嘅嘢。照咁睇，抱怒舜應該就係行呢度。」Faith拿着地上的草猜想，然而，所有都只能推測，他永遠無法求證，因為警方對山上發生的事三緘其口。
Faith爬上梯，爬梯的盡頭是上掀式的閘門，要先旋開門鎖才能打開，但這道閘門已經事先旋開了，只要推高便能打開。Faith先用頭輕輕頂起，但閘門紋絲不動，於是他再用雙手推開，閘門也只勉強開了一線。
「有無咁重呀？」Faith滿頭大汗，用盡全力，總算打開到能看到外面的程度，但距離能夠爬出來還差得遠，只不過，能看到外面已經很足夠。
透過這條縫隙，Faith可以確認自己不經不覺已經攀登到了山頂，而且更加可以確認山頂真的發生過大事，因為此時聚集在山頂的不是警察，而是穿着軍服的軍人和穿白袍的鑑證人員。記者的天性使得他想立即拿出手提電話拍下眼前的事物，但閘門的重量令他面對現實，只能眼看手勿動。
「世界最遠嘅距離就係超爆嘅料係我眼前，但就偏偏影唔低，可惡。」Faith悔恨地慨嘆道：「但換個角度睇，佢哋發現唔到我，我可以全程直擊，最少有嘢可以寫先。」
鑑證人員挖了一塊手帕大小的草被入袋帶走，上面有少許染紅，可能是抱怒舜的血，又在草地上撿走了數撮明顯不屬於人類的毛髮；搜索犬四處嗅，嘗試找尋抱怒舜的行蹤；軍人亦拿着儀器檢查輻射有沒有超標，這或許是受到電影影響，畢竟電影內的怪獸很多都是因為受到輻射而異變。
Faith看得入神，他要和時間競賽，在自己雙臂報廢前盡可能用雙眼收錄所有可見之事物和細節，導致他忽略了背後襲來的危機。
「汪、汪！」一隻鼻子靈敏的搜索犬在Faith的背後朝他吠叫，他一時間並未察覺，直至閘門的重量一下子增加，他才意識到上面站了一個人。
「頂……今次真係老貓燒鬚，如果我而家唔頂住，咁班軍人就會發現呢度，但淨係道門都已經好重，仲要企多個人，我真係頂唔住喇……」Faith心裏獨白，同時他的雙臂已經到了極限，閘門失去支撐，「咚」的一聲響徹天際，全座山頂的人的目光都瞬間聚焦在這個沒有任何痕跡的草地上，目光由驚嚇，到好奇，再到懷疑，最後到驚喜。
然而，除了站在閘門上的軍人外，無人知曉閘門的所在之處。其他的人都走到音源附近尋找，直到該軍人示意前，人們還是找不到該閘門。
「在這裏，我就在正上方，它剛剛動了，我猜是有甚麼東西關上了，大概要拔光這些草才看得到它。」該軍人提議，其他人立即照做。
一時間，數十人在山上把附近的草都拔光光，如果環保團體看到的話，定必會強烈譴責並大造文章。雜草拔光、泥土撥走後，滿佈鏽跡、油漆剝落的閘門終於呈現在眾人面前。
經過一輪通報後，現場人士終於獲得了進入搜索的許可，他們臨時組建了一支六人的搜索團先行進內，當中四人是軍人，兩人是鑑證科人員。他們拿着土木工程拓展署提供的地圖，通過窄小的入口魚貫進內，兵分兩路，精準朝着事先圈起的房間進發。
「大檸樂，咁落去遲早揾到我，我未上到山頂唔可以咁快被佢哋趕走，應該點做先好？」此時，躲在數層之下的Faith開始着急起來，他本想待軍人離去後再出外搜證，但現在被發現也只是時間問題，他要在有限時間內想到脫身的辦法。
軍人搜查的速度很快，大概是因為有地圖之故，轉眼間距離Faith藏身之處只差一層，眼見時間無多，他只好放手一搏：「喂！咪走！」
既然無從躲避，不如正面迎戰，這就是Faith最後想得到的方法。他從樓梯下的暗處大叫，果然引起了軍人們的注意，六人立即衝下去追一個不存在的目標，待六人經過後，他便隨即跑上上層。
「哎呀！」發出慘叫的是Faith，他一下便撞在一幅牆上，不，是撞在一個有如牆般堅硬、厚實的胸膛上，而這片胸膛的擁有人正是這隊軍人的司令、這次搜索行動的指揮官。
「你是哪一路的，為啥偷走進內？」司令操一口流利的捲舌北京腔。
Faith穩定心神，拿出記者證，謊稱自己在做一個關於防空洞的主題報導，解釋自己發現這裏、進內的經過。儘管司令並無懷疑，但還是不讓他繼續前行，還要他將與防空洞相關的相片和影片都刪除，為了脫身，他也只好照做。司令檢查完後，便派人「護送」Faith離開，順道把防空洞也封鎖，不讓其他人進內。
「阿sir，呢度發生咩事，點解要封嘅？」離去途中，Faith跟其中一位警察搭話，期望能套出半句話來，可是警察像機械人般，並沒有搭理他，甚連正眼也沒有看過他。
Faith沒有放棄，鍥而不捨地旁敲側擊，但該警察始終都沒有透露半點風聲，直到Faith被「請」出防空洞也沒有聽到過他的聲音。
「估唔到佢咁口密，好彩我啲相都up晒上cloud，電話del咗都唔怕，不過今次真係大單嘢，連軍隊都出動埋，睇嚟連阿爺都好關注呢單嘢。」Faith繼續往前走，嘗試尋找另一個能上山的突破口，只不過這次警察已經徹底封鎖整座山，封鎖線滴水不漏，沒有缺口。
「照咁睇今日都登山無望，唯有返office先，同總編再從長計議。」Faith沿路折返，但一直都有被監視的感覺，直到穿過草地，繞過私人屋苑，到達大馬路，這感覺才消失。
+x+x+x+x+x+x+x+x+x+x
「Faith，今次啲料好爆，仲要監視到你走，成單嘢實好有noise，今次view數肯定再創新高。」詹爺喜上眉梢地說：「最可惜你影唔到山頂嘅片……OK，你試吓用AI睇吓整唔整到條片出嚟。」
「OK。」OK哥舉起「OK」手勢同時回應。
「AI？總編，咁會唔會唔係咁好？好似我哋捏造咁……」Faith擔心地問。
「傻仔嚟嘅，我哋會寫明係AI模擬片段㗎嘛。」OK哥搶答。
「咪係囉！唔駛擔心咁多，你專心跑新聞，後製嘢放心交畀我哋，我哋係你最強後盾，保證只按你所見所聞去造，絕對唔會誇大失實。」詹爺大力拍向胸膛保證。
「不過我睇返你啲相，嗰啲差佬硬係有少少奇怪，有種莫名嘅違和感，但一時之間我又講唔出係邊度有問題。」詹爺專心得瞇起眼盯着相片。
「總編果然係總編，齋睇相都feel到有問題，」Faith忍不住讚嘆：「我本身都無特別留意，但你咁講起，個差佬講喇唔鹹唔淡咁，又真係有啲古怪，好似夾硬要講廣東話咁。」
「你哋睇吓呢度。」OK哥把相片放大，定格在警察制服的肩膀上。
「有咩特別？好正常，無咩問題吖。」Faith說。
「你試吓再認真睇吓，個解像度絕對夠你睇得出個分別。」OK哥再要求。
「咦？」Faith好像發現了端倪。
「嗯。」OK哥予以肯定。
「喔！」詹爺也知道違和感的原因。
「膊頭有花都要企喺度拉封鎖線，合理咩？」OK哥反問。
「你嘅意思即係……」Faith既疑惑，同時亦心裏有數，只欠OK哥最後一句。
「無錯，exactly就係同你哋諗嘅一樣。」OK哥心領神會，始終沒有將答案說出來，但三人其實已經對真正答案有了共識。
「咁而家嘅問題就係點解要咁做，而唔係直接用返軍人身份。」Faith咬着筆頭苦思。
經驗老到的詹爺立即想出了答案：「因為佢哋無直接參與我哋事務嘅權力，所以要扮，以免影響國家一直以嚟嘅政策。但我估，呢件事係喺警方知情嘅情況之下進行，仲有可能係警方要求。」
「咁即係承認咗兇手係怪物，警察自己應付唔嚟，」Faith嘴角忍不住上揚：「呢單新聞越嚟越有趣喇。」