《I miss U》: 04 重聚

今天隔了很久再次見到她，但這不是偶遇，而是約定。

「好耐冇見，夏若真。」

「好耐冇見。」

空氣中瀰漫著尷尬的氣氛。

「𨋢到啦，我哋快啲上去啦，佢哋等咗好耐啦。」我說。





「好。」

「唔見阿政嘅，佢唔係同你一齊嚟咩？」我問她。

「唔係呀，佢好似唔嚟。」

「你同佢……」

她點點頭。





升降機門開啟。

「先生，請問幾多位？」門口的接待生問。

「訂咗位，馮生訂嘅位。」

「好嘅，先生，呢邊請。」

進入餐廳，走過轉角，我便看見阿耀和小莉。





「哇！季節Cp終於到啦。」阿耀大叫。

「收聲啦白卡耀，哈囉，小莉！」

「嗨！阿耀、小莉。」若真說。

「哈囉！夏曉楠，你哋終於都嚟到。」小莉歡呼。

「夏曉楠！？」我與阿耀不約而同的望向若真和小莉。

「係呀，我前幾個月改咗名，宜家叫曉楠。」

「吓！你冇同我講嘅？」阿耀問小莉。

「佢話想留返今日先同你地講。」小莉答。





「冇所謂呀，你哋鍾意點叫就點叫啦。」曉楠說。

「好嘅，夏若真。」我與阿耀再次不約而同的說。

「係喎，阿政呢，佢唔嚟？」阿耀問。

「啱啱問咗喇，佢有嘢做唔得閒嚟。」我回答。

「咁唯有我哋四個自私食，你哋快啲叫嘢食啦。」小莉說。

「Btw 你哋仲記唔記得中五開學嗰日我哋五個人第一次一齊食飯？」

當然記得，那天我第一次跟夏若真見面。





「你好，我叫夏若真，多多指教！」

「嗨…嗨…」我還沒有反應過來。

她笑了，她的眼睛也在笑。

世上怎麼可以有如此天真動人的笑容。

「我…我叫冬皓辰…你好。」

天呀！七秒鐘早已過去，她對我的第一印象……

當我仍在回想那七秒之際，她突然伸出右手。

「哇！估唔到你個姓仲特別過我，多多指教，冬皓辰！」





我也不自覺的伸出手。

那刻我感覺登上了世界的巔峰。

卻在不知不覺間，與珠峰頂上的積雪，一同被眼前這個小太陽融化。

很溫柔，很溫暖。

人生若只如初見，那會是多麼的美好。