我係鹹濕仔: 39 發現

39 發現

我同珊珊攬埋一齊，瞓喺張床度，回味緊我哋嘅激情。

我真係天生性愛高手，一嚟就識點樣就到度力，可以慳啲力之餘，又可以令珊珊嗌到聲嘶力竭。雖然今次運動量有啲大，但係我都瞓唔著。

心裡面一直有把聲音同我講：「超，邊會有事呀，射得一次，邊有咁易中呀？」

但同時有另一把聲音：「佢有咗，你承唔承擔得起呀？一個女人同小朋友嘅人生，係一個家庭！」





講真，我有啲淆底。話晒我只係year 2，珊珊year 1咋。呀⋯⋯唔係喇，搵定後路，去食事後丸先。

我拎起個電話，先發現原來呀妹send咗好多訊息畀我。

喂，返緊嚟。
要唔要幫你買早餐？
唔應機當你唔要
喂呀！
睇AV細聲啲呀！
拍門都聽唔到！




停得未呀？
再嘈我爆你門㗎！
我要瞓覺㗎！

頂！呀妹返咗嚟？仲聽到我哋激戰？呀！

我決定喺珊珊同呀妹見面之前，同呀妹傾掂數先，費事佢喺珊珊面前亂噏嘢。我著返啲衫褲，戰戰競競咁走出房，見到呀妹睇住個iPad，食緊杯麵。

佢瞄一瞄我，枝叉撩緊下一啖麵：「你屋企有人㗎！唔該攪嘢細聲啲！」





睇嚟佢已經知道咗我同珊珊嘅事，不過佢真係唔怕醜㗎喎，照直講出嚟，攪到我都唔掩飾：「Sorry囉，唔知你返咗嚟。」

「係唔係珊珊嚟先？唔好話我知你帶第二個女仔返嚟。」佢講完食咗啖麵。

「係珊珊嚟，我邊會亂咁嚟呀？我專一㗎。」我走埋去餐枱，坐佢對面：「不過，你可唔可以扮聽唔到？」

「唔得喎。你哋影響我心情。」呀妹真係好冷淡，一啲都唔顧及人嘅感受。

不過我都試吓說服佢，多數都係口硬心軟嘅啫：「你都知啦，珊珊不嬲都咁純情，如果畀佢知道你聽到佢⋯⋯嗌⋯⋯佢會唔好意思㗎。」

佢超一超我，𡁻緊下一啖麵。

「你哋咁friend，你都唔想佢以後面對唔到你㗎嘛，係咪先？當我求吓你喇。」為咗珊珊，我都估唔到我可以低聲下氣咁同呀妹講嘢。

呀妹冇放低筷子，用左手攤大手板。我明佢意思，將一早準備好嘅$500蚊紙，放喺佢手上。





「哇！咁大手筆。」呀妹嘅面上有返啲笑容，不過只係一下，佢即刻變返黑面：「我係為咗珊珊咋，唔係你。」

「多謝老闆！我同珊珊，都會好感激你㗎！」我懶可愛咁扮三眼仔，氹吓呢個成日吱都唔笑嘅呀妹。

不過佢冇笑，只係斜啤咗我一下，然後拎食完嘅杯麵入廚房。

好彩冇事，平安渡過，下次要小心啲先得。

//