成長的天空: 水運會

登登！今日係我校「廣東潮汕總商會劉力行紀念中學」嘅周年水運會，我哋呢啲唔識游水又冇參賽嘅F1同學仔，就梗係要坐响看台度睇比賽、同埋做啦啦隊啦。

全校八百幾人，參賽嘅只有五十幾個，咩泳式咩距離都好，游嚟游去都係嗰啲同學。有啲比賽仲只係得兩個人比賽，睇佢哋游水好似鬥慢咁，真係悶到抽筋！好在水運會只係返半日，都冇咁慘！

咁比賽都唔係冇亮點嘅，Heidi師姐代表明社游咗好多項，由個人到社際接力到班際接力，50米到400米佢都有游。師姐著住泳衣嘅身影，不停咁响池邊出現，令到個水運會生色不少！起碼我覺得係！

Heidi師姐不只讀書叻、手球勁，連游水都咁出色。响佢帶領底下，我哋明社奪得全場總冠軍，而戰無不勝嘅師姐，亦順利勇奪女子組全場總冠軍，真係勁呀師姐！

完咗水運，我一條友去咗麥記，食咗個麥樂雞餐。食雞嗰陣，個腦不停咁出現Heidi師姐著住泳衣响池邊、落水上水嘅畫面。食完麥記，我不自覺咁就貢咗返學校。...唔知師姐會唔會返嚟呢？真係想見吓佢！......



「咦，Form 1仔，做乜返嚟嘅？」係Heidi師姐把聲。

我剛入到學校行落canteen，就見到Heidi師姐响社房出嚟，俾佢見到我。

「er...無...無嘢…返屋企...順路...順路咪入嚟...睇下有冇嘢幫手...咁囉！」突然見到師姐，我感到塊面好㷫，紅都面晒，講嘢口窒窒！

「有冇咁乖仔呀？啱啱執好晒啦，早啲返嚟吖嘛，咸~濕~仔~！」Heidi師姐笑住咁講，佢狡獪嘅眼神又再出現！......

「嗱，見你咁乖，師姐又有好嘢益吓你，跟我嚟！」Heidi師姐行咗上地下走廊，我跟住佢後面。......