成長的天空: 成長的天空

今日我又欠交幾樣功課，不過唔使留堂喎！點解咁荀？因為要參加「成長的天空」簡會囉。

「成長的天空」係學校社工屈姑娘為中一同學搞嘅成長活動，由每班嘅班主任推薦三幾位同學參加。肥楊唔知點解擺咗我個名落個list度，搞到我今日冇得留堂㖭，真係、真係，太失望嘞！嘻嘻！

個簡介會响圖書館舉行(又係圖書館！)，全級中一共有十五個同學參加。我班有三個，除咗我之外，一個係個樣睇落有啲智障嘅大肥妹雯雯，另一個係同我一樣懶到出汁嘅儍強。

「成長的天空」係農村生活體驗活動，要去廣西農村生活四日三夜！除咗屈姑娘外，仲有五位學長一齊去，照顧我哋呢班中一同學。

最驚喜嘅係，其中一個學長，竟然係......係Heidi師姐呀！佢仲要係我嗰組嘅學長呀！yeah！



個團兩星期後出發，下星期每日放學後，都要留响學校做訓練。唔使留堂，仲可以日日放學都見到Heidi師姐，諗吓都開心！yeah！

跟住嗰個星期，連續五日進行訓練。其實都唔係咩特別訓練，只係組員互相認識吓，玩吓集體遊戲咁。最後嗰日簡單講吓嗰四日嘅行程、提下我哋要帶回鄉卡、同埋要帶乜嘢個人物品，乜嘢唔准帶，咁囉！

下星期一，就可以同Heidi師姐出trip，仲要去四日咁多，諗起條周周都扯到行呀！