成長的天空: 農村小學

同Heidi師姐纒綿完，成晚响張床度不斷回味，瞓唔著。臨天光先瞓著，瞓著冇耐，就聽到傻強開門入房，佢真係玩足成晚。

食過簡單嘅粥水咸蛋饅頭早餐，我哋就上路。扽咗兩個幾鐘頭爛路，終於嚟到一幢殘舊嘅兩層建築物外面。

「各位同學，我哋嚟緊兩日，都會响呢度渡過，包括夜晚瞓覺！」屈姑娘落車前咁講。「攞齊嘢，唔好漏低嘢呀！」

落咗車，响我眼前有個牌匾，上面刻住「廣西農民子弟小學」。橫睇掂睇都唔似係學校，座嘢兩層高，睇落每層有五、六間房，門窗破爛，似個廢墟多啲！校舍後面有個爛地操場，有一個有籃板冇籃框嘅籃球架。

有個著住白色背心底衫、灰色老土西褲、腳踏人字拖嘅大叔出嚟招待我哋，佢係呢間學校嘅校長兼老師，徐校長。



「好，同學我哋上課室放好啲嘢，就落嚟食飯，然後開工。」屈姑娘指一指二樓。

放好嘢之後落樓，徐校長叫我哋去地下一間房食飯。間房放咗四張殘舊嘅圓摺枱，旁邊有木造嘅條櫈，枱面上放咗飯菜，......冇錯，係飯菜，只有飯、同埋菜！

啲飯好硬、啲菜好嚡好咸，好難哽！不過難食都要食少少，因為屈姑娘唔俾我哋帶杯麵零食，搜到要沒收！下晝有體力勞動，唔食會餓死！

食完飯就係今日嘅重頭戲，同呢閒學校啲小學生玩遊戲！

有廿幾三十個農村小學生嚟咗玩，睇落佢哋都好窮困，衣衫襤褸，有啲仲赤住腳，連鞋都冇得著。同佢哋玩嗰啲都唔係咩特别遊戲，都係麻鷹捉雞仔呀、耍盲雞呀、爭櫈仔呀、123紅綠燈呀、猢狸先生幾多點呀，呢啲低能遊戲囉。(其實我哋好多都冇玩過，係上星期特訓嗰陣，屈姑娘教嘅！)



玩完遊戲、派完禮物，啲細路返晒屋企，徐校長已準備好晚飯。好過晏晝少少，今晚除咗菜，仲多咗個餸，麵豉煮肥豬肉，100%肥豬肉！

求其食完飯，就到沖涼時間，男仔响地下一間房內沖涼，女仔就上二樓。我哋每人有個膠水桶和一個小水兜，要先去廚房「較水」先可以沖涼。廚房有一大煲滾水同一大桶凍水，每人响自己個膠桶仔加熱水同凍水，自己調較水温，跟住去沖涼房沖涼。只係得一桶水，你要諗清楚洗頭先定沖身先、洗面先定洗腳先，仲要慳住洗，冇得添！