成長的天空: 無聲的道别

又係一個平常嘅返學日，我又好似平時咁，因為欠交功課俾肥楊罰留堂。今日肥楊又掟咗我响圖書館，話冇眼睇喎！佢叫啲「賴啤」睇住我做功課。

去完廣西一個禮拜，都冇見過師姐。放學手球隊練波唔見佢，今日响圖書館留堂，當值個「賴啤」又唔係佢。

我好掛住Heidi師姐呀！

同平時一樣，留堂總會眼瞓要眠一眠！......

「咸~濕~仔~！」我好似聽到Heidi師姐細細聲嗌我，又好似聞到佢嗰陣淡淡嘅汗臭味！......



我醒一醒，望吓周圍，唔見Heidi師姐嘅身影。我掛住佢掛到有幻覺？我伸一伸懶腰，繼續做功課。

做做吓功課，我揭吓本作業，發現夾住咗個粉紅色信封，封面畫咗張乒乓波枱，有個男仔瞓响上面，望住個星空！

係[Heidi師姐呀！我開心到幾乎叫咗出嚟！......

我即刻拆開信封，入面有張信：

「咸濕仔呀，你見到呢封信嗰時，姐姐已經上咗飛機，飛緊去英國曼城。姐姐不辭而别，好對唔住呀！



今年暑假，Daddy媽咪突然話全家會响十一月移民英國。消息嚟得好突然，我完全冇諗過會離開香港！呢兩個月，就係我响「力行」最後嘅日子。我好喜歡「力行」，要離開「力行」，我真係好唔捨得！

咸濕仔呀，姐姐好高興認識到你，呢兩個月同你相處嘅時光，我覺得好開心，係畢生難忘嘅快樂回憶！我都想同你繼續玩落去，但奈何廣西團後就要結束。

你要努力呀咸濕仔，記住，書一定要讀，先至可以同姐姐繼~續~玩~！

Heidi姐姐

PS：我有份神秘禮物送俾你，放咗响我課室個locker，密碼鎖pw係530！
[PS PS：要返到屋企入咗房先好拆呀！」



師姐~！我忍唔住滴咗幾滴眼淚响信紙上面！......