凱琪的天空: 1 新學年

「What？移民去曼城？十一月中咁快就走？唔係話等我考埋DSE先走咩？」

今日九月一日，全港中、小學嘅開學日。食早餐嗰陣，Daddy媽咪同我講呢個咁震撼嘅消息！

我叫蘇凱琪Heidi，就讀「廣東潮汕總商會劉力行紀念中學」，今年升中五。原本今年，係我充滿期盼、憧憬嘅一個學年。但係忽然間，乜都冇晒！我响「力行」嘅日子，正在開始倒數！

雖然一早已經知道要移民，但我冇諗過咁快要走，好難接受！今日開學禮黃校長講過乜、班主任Miss Lee講過乜，我完全聽唔入耳，成朝混混噩噩咁！

諗咗半日，知道事實不能改變，唯有改變心態！日子總係要過。我同自己講，我要無悔無憾，盡情咁享受埋呢兩個多月响「力行」嘅時光！