凱琪的天空: 13 梧州市

黃昏六點，終於去到第一晚嘅落腳點 -廣西梧州市建國大賓館。我哋會响呢度一晚，聽朝一早再扽多兩、三個鐘頭車入農村。呢間所謂賓館，個樣好殘舊，三層高，大堂烏燈黑火。响賓館餐廳求其食咗個團餐，屈姑就派房卡分房。我哋呢團一行二十一人(計埋屈姑)，全部住响二樓。學生有十一個男仔九個女仔，屈姑問我介唔介意同個中一男仔子軒住一間房。冇所謂啦，一晚啫！

上房安頓好之後，五位中五學長入咗屈姑間房開會，簡單講解吓聽日嘅流程，同各人負責嘅工作。開開吓會，有個中一妹妹雯雯敲門揾屈姑。

「屈姑娘，......點...點...我唔...唔識用...去廁所！...」雯雯塊面紅晒。

「咁大個女，去廁所都唔識？」屈姑拗晒頭。

「個廁所...冇馬桶...唔識用！...」雯雯塊面再脹紅啲，對手掩住小腹，佢應該好急！



呢間殘舊賓館，客房入面嗰個唔係坐厠，係踎廁。雯雯應該由細到大未用過踎廁。

「嗱，我教你，入去廁所，兩隻腳擘開，企响屎坑上面，除褲，踎底，屙，用廁紙清潔，著返條褲，沖廁，洗手，完！」屈姑企起身，模擬成個去廁所嘅過程，我哋幾個學長笑到收唔到掣！......雯雯個樣想喊！

「好啦好啦，我陪你返房，教你去廁所嘞！」屈姑同雯雯去佢間房。「你哋响度等我，一陣再開會。」

見雯雯咁樣，我都有啲尿急，我返房去個廁所，再返去開會。返到房，見到個不速之客 - 子軒個fd傻強入咗嚟，佢兩個响張床上面用手機打機。

「嗱，玩一陣好喇，九點就要返自己房㗎喇！」我學長mode上身。



我去完廁所就返去屈姑間房開會，兼傾吓計。傾到差唔多十點我哋班學長先各自返房。

返到入房，熄剩盞床頭燈，傻強冇返自己房，兩隻嘢攬埋一舊，瞓到「腳腳」聲，扯晒鼻鼾。

咦，我醒起樣嘢！......

儍強係同咸濕仔一間房嘅，咁咪即係依家咸濕仔得一個人响房囉！好，去揾吓咸濕仔先！......

我攞咗傻強張房卡，入咗咸濕仔間房！......