凱琪的天空: 16 農家菜

第三日一早就morning call，食咗簡單早飯之後，所有中一同學今日要落田！

距離村校十五分鐘路程，有塊水稻田，徐校長已預備咗啲水靴，俾同學試吓落田插秧。緊接住就係學吓收割農作物，我哋割咗啲菜苗，摘咗啲番茄，仲有掘咗啲薯仔番薯，然後攞啲收成返去村校，煮一餐「農家菜」。

响徐校長嘅協助下，啲中一同學煮咗蒜蓉炒菜苗、番茄炒蛋，薯仔蚊肥豬肉，仲有煲番薯糖水做甜品。呢餐農家菜，無論賣相、味道，都相當唔錯㗎！個個都食得好開懐！

下午三點，收拾行裝，扽返兩個幾鐘頭車出梧州，聽日先返香港。

去到梧州，差唔多六點。我哋今晚唔係住前晚嗰間賓館，今晚我哋住梧州希爾頓酒店，三星級㗎！



啲中一同學好開心，尤其係雯雯，因為唔使再用踎廁！更加開心嘅係咸濕仔，點解？......因為响我安排下，咸濕仔今晚同我住同一間房！

事情，是咁的......

「Heidi師姐，我今晚可唔可以同你調房呀？」今朝落田嗰陣，傻強問我。

「咁唔啱規矩喎，個個同學都話調房，咁我哋咪好唔得閒？」我心諗，同咸濕仔同房唔好咩？

「求下你啦，Heidi師姐！」傻強哀求我。



「好啦，怕咗你呀！......不過我要問下屈姑娘先，如果佢唔批准，我都冇辦法㗎！」

回程嗰陣，我响車上面問屈姑，屈姑話如果我唔介意，都可以調嘅！就咁，儍強開心，又益咗咸濕仔，win win雙贏！

去完屈姑間房開檢討會，我就返房。好緊張，唔知咸濕仔有乜反應呢？

入到房，見到咸濕仔一手揸住手機，一手揸住電視遙控，挨响張床瞓著咗。我熄咗電視，熄晒啲房燈，走咗入洗手間，細細聲咁叫：

「咸~濕~仔~！......沖~唔~沖~涼~呀~！」