【校園青春】為咗報復初戀，我搵咗個MK仔做水泡，最後仲懲治咗全校最受歡迎嘅男神: 第三十六章：似曾相識的溫柔

過咗大概十分鐘，電話震咗。
螢幕上顯示住一個新嘅名——「浚」。
我深呼吸一口氣，扮到聲線慵懶啲，接通咗電話：「喂？」

「喂，做緊咩呀？」阿浚把聲透過電話傳過嚟，帶住少少磁性，聽得我耳仔都軟埋。
「冇呀……準備瞓覺囉。」我把聲嬌滴滴咁。
「咁早？唔使同你個『表弟』傾計咩？」佢特登加重咗「表弟」兩個字，語氣帶住明顯嘅試探。

我知道戲肉嚟啦。
「唉……」我長嘆一聲，語氣即刻變得委屈，「唔好提佢啦。」




「做咩呀？佢對你唔好咩？」
「何止唔好……」我開始發揮我嘅作文功力，「佢成日都發脾氣㗎，又小氣，對我呼呼喝喝咁。其實我哋感情好差㗎啦，我都頂佢唔順，應該都就快分手。」
我將阿傑講成一個十惡不赦嘅渣男，將自己塑造成一個受盡委屈、急需人呵護嘅小綿羊。

電話嗰頭靜咗一秒，然後傳嚟阿浚低低嘅笑聲。
「咁慘呀？」佢頓咗頓，然後用一種好似哄細路女，又帶住強烈暗示嘅語氣講：
「咁……你知唔知有個男仔叫阿浚，佢好溫柔㗎？」

轟——！
我個腦好似俾雷劈中咁。




呢句說話，呢個語氣，呢種自戀得嚟又好受落嘅 flirting 技巧。
太似啦。
當年我住喺隔籬屋嗰陣，阿俊都係咁樣同我講電話。
「你知唔知隔籬屋有個哥哥好靚仔㗎？」
時光好似重疊咗咁。
我揸住電話，面紅耳熱，心跳加速到就快跳出喉嚨。
「係咩？我唔知喎，要了解下先知係咪真係咁溫柔。」我忍住笑，欲拒還迎咁答佢。

嗰晚，我哋傾咗好耐。佢係咁 flirt 我，我就係咁受。
掛斷電話嗰陣，我望住天花板，嘴角嘅笑容點都收唔埋。